ದೆಹಲಿಯಲ್ಲಿ ನವಜಾತ ಶಿಶುಗಳನ್ನು ಮಾರುವ ‘ಮಕ್ಕಳ’ ಮಾರುಕಟ್ಟೆ: ಬೃಹತ್ ಮಾಫಿಯಾ ಪತ್ತೆ

ನವದೆಹಲಿ: ರಾಜಸ್ಥಾನ ಮತ್ತು ಗುಜರಾತ್‌ನ ಬಡ ದಂಪತಿಗಳಿಂದ ನವಜಾತ ಶಿಶುಗಳನ್ನು ಖರೀದಿಸಿ, ದೆಹಲಿಯಲ್ಲಿ ಮಕ್ಕಳಿಲ್ಲದೆ ಕಂಗಾಲಾಗಿರುವ ದಂಪತಿಗಳಿಗೆ ಲಕ್ಷಾಂತರ ರೂಪಾಯಿಗಳಿಗೆ ಮಾರಾಟ ಮಾಡುತ್ತಿದ್ದ ಬೃಹತ್ ಅಂತರರಾಜ್ಯ ಮಾನವ ಕಳ್ಳಸಾಗಣೆ ಜಾಲವನ್ನು ದೆಹಲಿ ಪೊಲೀಸರು ಪತ್ತೆಹಚ್ಚಿದ್ದಾರೆ.

ಕೇವಲ ನಾಲ್ಕರಿಂದ ಐದು ದಿನ ಪ್ರಾಯದ ಶಿಶುಗಳನ್ನು ಈ ರೀತಿ ಕಳ್ಳಸಾಗಣೆ ಮಾಡಲಾಗುತ್ತಿತ್ತು. ಮಾನವ ಕಳ್ಳಸಾಗಣೆದಾರರು, ಮಕ್ಕಳಿಲ್ಲದ ದಂಪತಿಗಳು ಮತ್ತು ಆಸ್ಪತ್ರೆಯ ಮಾಲೀಕರು ಈ ಕ್ರೂರ ದಂಧೆಯ ಪ್ರಮುಖ ಕೊಂಡಿಗಳಾಗಿದ್ದಾರೆ.
ಈ ಜಾಲವು ಹೆಣ್ಣು ಮಕ್ಕಳಿಗೆ 3 ರಿಂದ 4 ಲಕ್ಷ ರೂಪಾಯಿ ಹಾಗೂ ಗಂಡು ಮಕ್ಕಳಿಗೆ 6 ರಿಂದ 8 ಲಕ್ಷ ರೂಪಾಯಿಗಳವರೆಗೆ ಬೆಲೆ ನಿಗದಿಪಡಿಸಿತ್ತು. ಮಧ್ಯ ದೆಹಲಿಯ ಪಹಾರ್‌ಗಂಜ್‌ನಲ್ಲಿ ಮಹಿಳೆಯೊಬ್ಬಳು ನಿಯಮಿತವಾಗಿ ಬೇರೆ ಬೇರೆ ಶಿಶುಗಳೊಂದಿಗೆ ಬರುವುದನ್ನು ಗಮನಿಸಿದ ಸ್ಥಳೀಯರೊಬ್ಬರು ನೀಡಿದ ರಹಸ್ಯ ಮಾಹಿತಿಯ ಆಧಾರದ ಮೇಲೆ ಪೊಲೀಸರು ಈ ದಂಧೆಯನ್ನು ಪತ್ತೆಹಚ್ಚಿದರು.

ಈ ಪ್ರದೇಶದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ ಮತ್ತು ಗುಪ್ತಚರ ಮಾಹಿತಿ ಬಳಸಿ ಪೊಲೀಸರು ಜ್ಯೋತಿ ಅಲಿಯಾಸ್ ಕಮಲೇಶ್ ಎಂಬ ಮಹಿಳೆಯನ್ನು ಗುರುತಿಸಿದರು. ನಂತರ, ಮಹಿಳಾ ಪೊಲೀಸ್ ಅಧಿಕಾರಿಯೊಬ್ಬರು ಮಗುವನ್ನು ಖರೀದಿಸುವ ನೆಪದಲ್ಲಿ ಆಕೆಯನ್ನು ಸಂಪರ್ಕಿಸಿದರು. ತರುವಾಯ, 20,000 ರೂಪಾಯಿ ಮುಂಗಡ ಹಣ (ಟೋಕನ್ ಮೊತ್ತ) ನಿಗದಿಪಡಿಸಿ, ಜೂನ್ 5 ರಂದು ಮಗುವನ್ನು ಹಸ್ತಾಂತರಿಸಲು ಬಂದ ಕಮಲೇಶ್ ಎಂಬಾಕೆಯನ್ನು ಪೊಲೀಸರು ಸ್ಥಳದಲ್ಲೇ ಬಂಧಿಸಿದರು.
ಇದರ ಹಿಂದೆ ದೊಡ್ಡ ಜಾಲವಿದೆ
ಆಕೆಯನ್ನು ವಿಚಾರಣೆ ನಡೆಸಿದಾಗ ರಾಜಸ್ಥಾನ ಮತ್ತು ಗುಜರಾತ್‌ನಿಂದ ಮಕ್ಕಳನ್ನು ಕದ್ದು ಅಥವಾ ಖರೀದಿಸಿ ಮಧ್ಯಪ್ರದೇಶ ಮತ್ತು ಹರಿಯಾಣದ ದಂಪತಿಗಳಿಗೆ ಮಾರಾಟ ಮಾಡುವ ಅಂತರರಾಜ್ಯ ಜಾಲದ ಮಾಹಿತಿ ಹೊರಬಂದಿದೆ. ಕಮಲೇಶ್ ವಿಚಾರಣೆಯಿಂದ ಆಕೆಯ ಸಹಚರರಾದ ಶಾಲು, ಲಲಿತ್ ಮತ್ತು ನಂತರ ಮಕ್ಕಳನ್ನು ಸಂಗ್ರಹಿಸಿ ಮಾರಾಟ ಮಾಡುವಲ್ಲಿ ಭಾಗಿಯಾಗಿದ್ದ ಪ್ರತಿಭಾ ಮತ್ತು ವಿಪಿನ್ ಅವರ ಸುಳಿವು ಪೊಲೀಸರಿಗೆ ಸಿಕ್ಕಿತು.
ಬಂಧನಕ್ಕೊಳಗಾದ ದಂಧೆಕೋರರು
ದಲ್ಲಾಳಿಯನ್ನು ಭೇಟಿಯಾಗಲು ಹೋಗುತ್ತಿದ್ದಾಗ ಬಂಧನಕ್ಕೊಳಗಾದ ಪ್ರತಿಭಾ ಮತ್ತು ವಿಪಿನ್ ಅವರಿಂದ ಪೊಲೀಸರು ಸುಮಾರು ಮೂರು ಲಕ್ಷ ರೂಪಾಯಿಗಳನ್ನು ವಶಪಡಿಸಿಕೊಂಡಿದ್ದಾರೆ. ತರುವಾಯ ಎರಡು ವಾರಗಳ ಕಾಲ ನಡೆಸಿದ ಸುದೀರ್ಘ ವಿಚಾರಣೆಯ ನಂತರ, ಒಂದು ತಿಂಗಳಿಗಿಂತ ಕಡಿಮೆ ವಯಸ್ಸಿನ 5 ಶಿಶುಗಳನ್ನು ಪೊಲೀಸರು ರಕ್ಷಿಸಿದ್ದಾರೆ.

ಆಸ್ಪತ್ರೆ ಕೇಂದ್ರಿತ ವಂಚನೆ ದಂಧೆ
ರೋಹಿಣಿಯ ಬೇಗಂಪುರದಲ್ಲಿರುವ ‘ಹೀರಾಸ್ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆ’ (Hira’s Multispeciality Hospital) ಈ ಮಾನವ ಕಳ್ಳಸಾಗಣೆಯ ಪ್ರಮುಖ ಕೇಂದ್ರವಾಗಿದೆ ಎಂದು ತನಿಖೆಯಲ್ಲಿ ಸ್ಪಷ್ಟವಾಗಿದೆ. ಆಸ್ಪತ್ರೆಯ ಮಾಲೀಕ ಡಾ. ವಿವೇಕಿ ಈ ಜಾಲದ ಪ್ರಮುಖ ಸೂತ್ರಧಾರಿಯಾಗಿದ್ದಾನೆ. ಮಕ್ಕಳನ್ನು ಖರೀದಿಸಲು ಬರುವ ದಂಪತಿಗಳಿಗೆ ಹಸ್ತಾಂತರಿಸುವವರೆಗೆ ಅವರನ್ನು ಇದೇ ಆಸ್ಪತ್ರೆಯಲ್ಲಿ ಇರಿಸಲಾಗುತ್ತಿತ್ತು. ಮಕ್ಕಳು ಇದೇ ಆಸ್ಪತ್ರೆಯಲ್ಲಿ ಜನಿಸಿದ್ದಾರೆ ಎಂದು ನಂಬಿಸಲು ನಕಲಿ ಜನನ ಪ್ರಮಾಣಪತ್ರಗಳು, ಹೆರಿಗೆ ದಾಖಲೆಗಳು ಮತ್ತು ಇನ್‌ವಾಯ್ಸ್‌ಗಳನ್ನು ಇಲ್ಲಿ ಸೃಷ್ಟಿಸಿಕೊಡಲಾಗುತ್ತಿತ್ತು. ಮಕ್ಕಳನ್ನು ಖರೀದಿಸಲು ಬರುವವರು ಮತ್ತು ಕಳ್ಳಸಾಗಣೆದಾರರು ನಡುವೆ ಡಾ. ವಿವೇಕಿ ದಲ್ಲಾಳಿಯಾಗಿ ಕೆಲಸ ಮಾಡುತ್ತಿದ್ದರು.

ಹೆಣ್ಣು ಮಕ್ಕಳನ್ನು 1 ಲಕ್ಷ ರೂಪಾಯಿಗೆ ಖರೀದಿಸಿ 3 ರಿಂದ 4 ಲಕ್ಷ ರೂಪಾಯಿಗೆ ಹಾಗೂ ಗಂಡು ಮಕ್ಕಳನ್ನು 2 ಲಕ್ಷ ರೂಪಾಯಿಗೆ ಖರೀದಿಸಿ 6 ರಿಂದ 8 ಲಕ್ಷ ರೂಪಾಯಿಗೆ ಮಾರಾಟ ಮಾಡಲಾಗುತ್ತಿತ್ತು. ಈ ಮಾಹಿತಿಯ ಆಧಾರದ ಮೇಲೆ ಪೊಲೀಸರು ಗುಜರಾತ್‌ನ ಸಬರಕಂತಾದಿಂದ ಸಬಾಭಾಯ್ ಗಮರ್ ಅಲಿಯಾಸ್ ಕಾಲಿಯಾ ಎಂಬಾತನನ್ನು ಬಂಧಿಸಿದ್ದಾರೆ. ಉದಯಪುರ ಮೂಲದ ಈತ ರಾಜಸ್ಥಾನದ ಪಾಲಿ ಮತ್ತು ಸಬರಕಂತಾದ ಬಡ ದಂಪತಿಗಳಿಂದ ಮಕ್ಕಳನ್ನು ಖರೀದಿಸಿ, ಡಾ. ವಿವೇಕಿ ಆಸ್ಪತ್ರೆಯ ಮೂಲಕ ಮಾರಾಟ ಮಾಡುತ್ತಿದ್ದ.

ಪೋಷಕರು ಮಕ್ಕಳನ್ನು ಸ್ವಯಂಪ್ರೇರಿತರಾಗಿ ಮಾರಾಟ ಮಾಡಿದ್ದಾರೆಯೇ, ಒತ್ತಾಯಪೂರ್ವಕವಾಗಿ ಮಾರಾಟ ಮಾಡಲಾಗಿದೆಯೇ ಅಥವಾ ಮಕ್ಕಳನ್ನು ಕದಿಯಲಾಗಿದೆಯೇ ಎಂದು ಕಂಡುಹಿಡಿಯಲು ಪೊಲೀಸರು ಅವರ ನಿಜವಾದ ಪೋಷಕರನ್ನು ಹುಡುಕುತ್ತಿದ್ದಾರೆ. ಪೋಷಕರು ಸ್ವಯಂಪ್ರೇರಿತರಾಗಿ ಮಕ್ಕಳನ್ನು ಮಾರಾಟ ಮಾಡಿರುವುದು ಸಾಬೀತಾದರೆ ಅವರನ್ನೂ ಈ ಪ್ರಕರಣದಲ್ಲಿ ಆರೋಪಿಗಳನ್ನಾಗಿ ಮಾಡಲಾಗುವುದು ಎಂದು ಸೆಂಟ್ರಲ್ ಡಿಸ್ಟ್ರಿಕ್ಟ್ ಡಿಸಿಪಿ ರೋಹಿತ್ ರಾಜ್‌ಬೀರ್ ಸಿಂಗ್ ತಿಳಿಸಿದ್ದಾರೆ.
ಒಂದು ವರ್ಷದಲ್ಲಿ ಸುಮಾರು 30 ಶಿಶುಗಳ ಮಾರಾಟ
ಕಳೆದ ಒಂದು ವರ್ಷದಲ್ಲಿ ಈ ಗ್ಯಾಂಗ್ ಸುಮಾರು 30 ಶಿಶುಗಳನ್ನು ಕಳ್ಳಸಾಗಣೆ ಮಾಡಿದೆ ಎಂದು ತಿಳಿದುಬಂದಿದೆ. ಹರಿಯಾಣದ ಪಾನಿಪತ್‌ನಿಂದ ಮಗುವನ್ನು ಖರೀದಿಸಿದ್ದ ಸನ್ನಿ ಅರೋರಾ ಮತ್ತು ರಿತು ಅರೋರಾ ದಂಪತಿಗಳನ್ನು ಹಾಗೂ ಮಧ್ಯಪ್ರದೇಶದ ಗ್ವಾಲಿಯರ್‌ನಿಂದ ಮಗುವನ್ನು ಖರೀದಿಸಿದ್ದ ಮತ್ತೊಂದು ದಂಪತಿಯನ್ನು ಪೊಲೀಸರು ಪತ್ತೆಹಚ್ಚಿ ವಶಕ್ಕೆ ಪಡೆದಿದ್ದಾರೆ. ಇವರನ್ನೂ ಪ್ರಕರಣದಲ್ಲಿ ಆರೋಪಿಗಳನ್ನಾಗಿ ಮಾಡಲಾಗುವುದು. ಒಂದು ಪ್ರಕರಣದಲ್ಲಿ ಗಂಡು ಮಗುವನ್ನು ಕೇಳಿದ ದಂಪತಿಗೆ, ತಮ್ಮ ಬಳಿ ಇದ್ದ ಹೆಣ್ಣು ಮಗುವನ್ನೂ ಸೇರಿಸಿ ಅವಳಿ ಮಕ್ಕಳೆಂದು ನಂಬಿಸಿ ಒಟ್ಟು 9 ಲಕ್ಷ ರೂಪಾಯಿಗೆ ಈ ತಂಡ ಮಾರಾಟ ಮಾಡಿತ್ತು.

ಬಂಧಿತರಾದ ಕಮಲೇಶ್ ಮತ್ತು ಪ್ರತಿಭಾ ಈ ಹಿಂದೆಯೂ ಮಾನವ ಕಳ್ಳಸಾಗಣೆ ಪ್ರಕರಣಗಳಲ್ಲಿ ಭಾಗಿಯಾಗಿದ್ದರು. ಹೀರಾಸ್ ಮಲ್ಟಿಸ್ಪೆಷಾಲಿಟಿ ಆಸ್ಪತ್ರೆಯಲ್ಲಿ ಲ್ಯಾಬ್ ಟೆಕ್ನಿಷಿಯನ್ ಆಗಿ ಕೆಲಸ ಮಾಡುತ್ತಿದ್ದ ಪ್ರತಿಭಾ, ಆಸ್ಪತ್ರೆ ಮತ್ತು ಮಾಫಿಯಾ ನಡುವಿನ ಪ್ರಮುಖ ಕೊಂಡಿಯಾಗಿದ್ದಳು. ಗುರುಗ್ರಾಮದಲ್ಲಿ ಮನೆಗೆಲಸ ಮಾಡುತ್ತಿದ್ದ ಓಂವತಿ ಎಂಬ ಮಹಿಳೆಯೂ ಮಕ್ಕಳನ್ನು ಸಂಗ್ರಹಿಸುವ ಈ ಜಾಲದ ಭಾಗವಾಗಿದ್ದಳು.
ತನಿಖೆಯಲ್ಲಿ ಪ್ರಮುಖ ಪಾತ್ರ ವಹಿಸಿದ ಸಬ್ ಇನ್ಸ್‌ಪೆಕ್ಟರ್‌ಗಳಾದ ಪ್ರಗತಿ, ಯಾಮಿನಿ ಮತ್ತು ಹೆಡ್ ಕಾನ್‌ಸ್ಟೆಬಲ್ ಸುಷ್ಮಾ ಎಂಬ ಮೂವರು ಮಹಿಳಾ… ಪೊಲೀಸ್ ಅಧಿಕಾರಿಗಳ ಕಾರ್ಯವನ್ನು ಡಿಸಿಪಿ ವಿಶೇಷವಾಗಿ ಶ್ಲಾಘಿಸಿದ್ದಾರೆ. ರಕ್ಷಿಸಲಾದ ಐದು ಶಿಶುಗಳನ್ನು ಮಕ್ಕಳ ಕಲ್ಯಾಣ ಸಮಿತಿಗೆ (CWC) ಹಸ್ತಾಂತರಿಸಲಾಗಿದ್ದು, ಸದ್ಯ ಅವುಗಳನ್ನು ‘ಪಾಲ್ನಾ’ ಕೇಂದ್ರದ ರಕ್ಷಣೆಯಲ್ಲಿ ಇರಿಸಲಾಗಿದೆ.