ಆರು ತಿಂಗಳೊಳಗೆ ಮರಳದ ವಲಸಿಗರ ಇಖಾಮಾ ರದ್ದು- ನವೆಂಬರ್ 1 ರಿಂದ ಜಾರಿ

ಕುವೈತ್ ಸಿಟಿ: ಕುವೈತ್‌ನಲ್ಲಿ ಖಾಸಗಿ ವಲಯದಲ್ಲಿ ಕೆಲಸ ಮಾಡುತ್ತಿರುವ ಅನಿವಾಸಿಗಳು ಆರು ತಿಂಗಳೊಳಗೆ ಮರಳಬೇಕೆಂಬ ನಿಯಮವನ್ನು ಬಿಗಿಗೊಳಿಸುತ್ತಿದ್ದಾರೆ. ಆರು ತಿಂಗಳಿಗಿಂತ ಹೆಚ್ಚು ಕಾಲ ದೇಶದ ಹೊರಗೆ ಉಳಿದುಕೊಂಡಿರುವವರಿಗೆ ಇಖಾಮಾ ರದ್ದುಗೊಳಿಸಲಾಗುವುದು ಎಂದು ಸ್ಥಳೀಯ ಮಾಧ್ಯಮಗಳು ಪ್ರಕಟಿಸಿದ ವರದಿ ತಿಳಿಸಿದೆ. ಹೊಸ ನಿಯಮಗಳು ನವೆಂಬರ್ 1 ರಿಂದ ಜಾರಿಗೆ ಬರಲಿವೆ.

ಕುವೈತ್ ಕಾನೂನಿನ ಪ್ರಕಾರ, ದೇಶದ ಹೊರಗಿರಲು ವಲಸಿಗರಿಗೆ ಗರಿಷ್ಠ ಅವಧಿ ಆರು ತಿಂಗಳುಗಳು. ಇದು ಮೊದಲೇ ಜಾರಿಯಲ್ಲಿದ್ದರೂ, ಕೋವಿಡ್ -19 ಸಾಂಕ್ರಾಮಿಕ ಸಮಯದಲ್ಲಿ ಮಾನವೀಯ ಪರಿಗಣನೆಗಳನ್ನು ಗಮನದಲ್ಲಿಟ್ಟುಕೊಂಡು ಅನಿವಾಸಿಗಳಿಗೆ ಆರು ತಿಂಗಳಿಗಿಂತ ಹೆಚ್ಚು ಕಾಲ ದೇಶದ ಹೊರಗೆ ಇರಲು ಮತ್ತು ಅವರ ನಿವಾಸ ದಾಖಲೆಗಳನ್ನು ಆನ್‌ಲೈನ್‌ನಲ್ಲಿ ನವೀಕರಿಸಲು ಕ್ಯಾಬಿನೆಟ್ ವಿಶೇಷ ಅನುಮತಿಯನ್ನು ನೀಡಿತ್ತು.

ಹೊಸ ವರದಿಗಳ ಪ್ರಕಾರ, ಖಾಸಗಿ ವಲಯದಲ್ಲಿ ಕೆಲಸ ಮಾಡುವ ವಲಸಿಗರು (ಆರ್ಟಿಕಲ್ 18 ವೀಸಾ) ಆರು ತಿಂಗಳಿಗಿಂತ ಹೆಚ್ಚು ಕಾಲ ದೇಶದಿಂದ ಹೊರಗಿದ್ದರೆ ನವೆಂಬರ್ 1 ರಿಂದ ಇಖಾಮಾವನ್ನು ರದ್ದುಗೊಳಿಸುವ ಶಿಫಾರಸನ್ನು ಅನುಮೋದಿಸಲು ಗೃಹ ಸಚಿವಾಲಯದ ಅಡಿಯಲ್ಲಿನ ನಿವಾಸ ಇಲಾಖೆ ನಿರ್ಧರಿಸಿದೆ.

ಮೇ 1 ರ ಮೊದಲು ಕುವೈತ್‌ನಿಂದ ಹೊರಡಿದ ವಲಸಿಗರು ನವೆಂಬರ್ 1 ರ ಮೊದಲು ದೇಶಕ್ಕೆ ಹಿಂತಿರುಗದಿದ್ದರೆ ಅವರ ವೀಸಾವನ್ನು ರದ್ದುಗೊಳಿಸಲಾಗುತ್ತದೆ. ಆರ್ಟಿಕಲ್ 22 ಮತ್ತು 24 ರ ಅಡಿಯಲ್ಲಿ ವಲಸಿಗರಿಗೆ ನೀಡಲಾದ ಅವಲಂಬಿತ ಮತ್ತು ಕುಟುಂಬ ವೀಸಾಗಳಿಗೆ ಅದೇ ಷರತ್ತು ಅನ್ವಯಿಸಲಾಗಿದೆ ಎಂದು ಕುವೈತ್‌ನ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. ಆದರೆ ಈ ವಿಚಾರದಲ್ಲಿ ಸ್ಪಷ್ಟತೆ ಲಭ್ಯವಾಗಿಲ್ಲ.