ಭೂಗತ ‘ಕ್ಷಿಪಣಿ ನಗರಗಳ’ ದೃಶ್ಯಗಳು ಬಿಡುಗಡೆ- ಜಗತ್ತನ್ನೇ ಬೆಚ್ಚಿಬೀಳಿಸಿದ ಇರಾನ್

ಟೆಹ್ರಾನ್ | ಅಮೆರಿಕ ಮತ್ತು ಇಸ್ರೇಲ್ ಬಾಂಬ್‌ ದಾಳಿಗಳ ನಡುವೆಯೂ ಇರಾನ್ ಕುಗ್ಗದೆ ಇರಲು ಕಾರಣವೇನು ಎಂಬ ರಹಸ್ಯವನ್ನು ಅದು ಇದೀಗ ಬಿಚ್ಚಿಟ್ಟಿದೆ. ತನ್ನ ಭೂಗತ ‘ಕ್ಷಿಪಣಿ ನಗರಗಳ’ (Missile Cities) ದೃಶ್ಯಗಳನ್ನು ಬಿಡುಗಡೆ ಮಾಡುವ ಮೂಲಕ ಇರಾನ್ ಜಗತ್ತನ್ನೇ ಬೆಚ್ಚಿಬೀಳಿಸಿದೆ. ಅಮೆರಿಕ ಮತ್ತು ಇಸ್ರೇಲ್‌ಗೆ ಭಾರಿ ಹಾನಿ ಉಂಟುಮಾಡುವ ಸಾಮರ್ಥ್ಯವಿರುವ ‘ಸೂಸೈಡ್ ನೇವಲ್ ಡ್ರೋನ್‌ಗಳ’ (Suicide Naval Drones) ಬೃಹತ್ ಸಂಗ್ರಹವನ್ನು ಇರಾನ್ ಪ್ರದರ್ಶಿಸಿದೆ.

ಹೊರ್ಮುಜ್ ಜಲಸಂಧಿ ಸೇರಿದಂತೆ ಆಯಕಟ್ಟಿನ ಸಮುದ್ರ ಮಾರ್ಗಗಳಲ್ಲಿ ಹಡಗು ಸಂಚಾರವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲು ಇರಾನ್ ಸೈನ್ಯವು ನೂರಾರು ಡ್ರೋನ್ ಬೋಟ್‌ಗಳನ್ನು ನಿಯೋಜಿಸಿದೆ ಎಂಬುದು ವಿಡಿಯೋದಿಂದ ಸ್ಪಷ್ಟವಾಗಿದೆ. ಅಮೆರಿಕದ ಯುದ್ಧನೌಕೆಗಳನ್ನು ಗುರಿಯಾಗಿಸಿಕೊಂಡು ಸಮುದ್ರದಾಳದಲ್ಲಿ ಸಂಚರಿಸುವ ಇಂತಹ ಡ್ರೋನ್‌ಗಳನ್ನು ಇದೇ ಮೊದಲ ಬಾರಿಗೆ ಯುದ್ಧರಂಗದಲ್ಲಿ ಬಳಸುತ್ತಿರುವುದು ಅಮೆರಿಕವನ್ನು ಆಶ್ಚರ್ಯಚಕಿತಗೊಳಿಸಿದೆ.

ಇರಾನ್ ವಿರುದ್ಧ ಇಸ್ರೇಲ್ ಮತ್ತು ಅಮೆರಿಕ ನಡೆಸುತ್ತಿರುವ ಯುದ್ಧವು 14ನೇ ದಿನಕ್ಕೆ ಕಾಲಿಟ್ಟಿದ್ದು, ಎರಡೂ ಕಡೆಗಳಲ್ಲಿ ಭಾರಿ ಸಾವುನೋವುಗಳು ಸಂಭವಿಸಿವೆ ಎಂದು ವರದಿಯಾಗಿದೆ.