ಕಿನ್ಯದಲ್ಲಿ ಹಬ್ಬಗಳ ಮೂಲಕ ಗಟ್ಟಿಯಾದ ಸೌಹಾರ್ದದ ಬಂಧ

ಉಳ್ಳಾಲ: ಧರ್ಮ ಮತ್ತು ಆಚರಣೆಗಳು ವಿಭಿನ್ನವಾಗಿದ್ದರೂ ಪರಸ್ಪರ ಗೌರವ, ಸಹಬಾಳ್ವೆ ಹಾಗೂ ಸೌಹಾರ್ದದ ಮೂಲಕ ಸಮಾಜವನ್ನು ಮತ್ತಷ್ಟು ಗಟ್ಟಿಗೊಳಿಸಬಹುದು ಎಂಬುದಕ್ಕೆ ಕಿನ್ಯ ಗ್ರಾಮದ ಬೆಳರಿಂಗೆ ಇತ್ತೀಚೆಗೆ ನಡೆದ ಎರಡು ಕಾರ್ಯಕ್ರಮಗಳು ಸಾಕ್ಷಿಯಾಗಿವೆ.

ವಿಶ್ವ ಪ್ರವಾದಿ ಮುಹಮ್ಮದ್ ﷺ ಅವರ ಜನ್ಮದಿನದ ಅಂಗವಾಗಿ ಆ. 24ರಂದು ಉಕ್ಕುಡ, ಮಿಂಪ್ರಿ ಹಾಗೂ ಬುಖಾರಿನಗರ ಮದರಸಗಳ ವಿದ್ಯಾರ್ಥಿಗಳಿಂದ ನಡೆದ ಬೃಹತ್ ಕಾಲ್ನಡಿಗೆ ಜಾಥಾಕ್ಕೆ ಬೆಳರಿಂಗೆ ಹಿಂದೂ ಬಾಂಧವರು ಆತ್ಮೀಯ ಸ್ವಾಗತ ಕೋರಿದರು. ಜಾಥಾದಲ್ಲಿ ಪಾಲ್ಗೊಂಡವರಿಗೆ ತಂಪು ಪಾನೀಯ ಹಾಗೂ ಸಿಹಿತಿಂಡಿ ವಿತರಿಸುವ ಮೂಲಕ ಈದ್ ಮಿಲಾದ್ ಆಚರಣೆಯಲ್ಲಿ ಸೌಹಾರ್ದದ ಸಹಭಾಗಿತ್ವ ಮೆರೆದರು.

ಕಿನ್ಯ ಬ್ರಹ್ಮಶ್ರೀ ನಾರಾಯಣ ಗುರು ಯುವ ಸಂಚಲನ ವೇದಿಕೆಯ ಪ್ರಮುಖರಾದ ಜಯಂತ ಪೂಜಾರಿ ಅವರು ಜಾಥಾದಲ್ಲಿ ಪಾಲ್ಗೊಂಡವರನ್ನು ಸ್ವಾಗತಿಸಿ ಶುಭಾಶಯ ಕೋರಿದರು. ಈ ಸಂದರ್ಭದಲ್ಲಿ ಶ್ರೀ ಮಲರಾಯ ಧೂಮಾವತಿ ಬಂಟ ದೇವಸ್ಥಾನದ ಅರ್ಚಕ ರವಿ ಪೂಜಾರಿ, ಕಿಶೋರ್ ಬಂಗೇರ ಸೇರಿದಂತೆ ಹಲವರು ಉಪಸ್ಥಿತರಿದ್ದರು. ನಿಕಟಪೂರ್ವ ಕಿನ್ಯ ಗ್ರಾಮ ಪಂಚಾಯತ್ ಉಪಾಧ್ಯಕ್ಷ ಫಾರೂಕ್ ಕಿನ್ಯ ಅವರು ಸರ್ವರನ್ನೂ ಅಭಿನಂದಿಸಿದರು. ಉಕ್ಕುಡ ಜುಮಾ ಮಸೀದಿ ಅಧ್ಯಕ್ಷ ಅಬ್ಬಾಸ್ ಕೆ.ಬಿ., ಅಹ್ಮದ್ ಬಾವು ಹಾಗೂ ಆಸೀಫ್ ಲೋನಾವಾಲ ಸೇರಿದಂತೆ ಪ್ರಮುಖರು ಉಪಸ್ಥಿತರಿದ್ದರು.

ಇದಕ್ಕೆ ಪ್ರತಿಯಾಗಿ, ಸೆ. 5ರಂದು ಬೆಳರಿಂಗೆ ಮಹಮ್ಮಾಯಿ ಮಿತ್ರ ಮಂಡಳಿಯ ವತಿಯಿಂದ ನಡೆದ 36ನೇ ಶ್ರೀಕೃಷ್ಣ ಜನ್ಮಾಷ್ಟಮಿ ಮೊಸರು ಕುಡಿಕೆ ಹಾಗೂ ಬೃಹತ್ ಶೋಭಾಯಾತ್ರೆಯ ಸಂದರ್ಭದಲ್ಲಿ ಮುಸ್ಲಿಂ ಫ್ರೆಂಡ್ಸ್ ಸರ್ಕಲ್‌ನ ಸದಸ್ಯರು ಸಾರ್ವಜನಿಕರಿಗೆ ಸಿಹಿತಿಂಡಿ ಹಾಗೂ ತಂಪು ಪಾನೀಯ ವಿತರಿಸಿದರು.

ನಿಕಟಪೂರ್ವ ಕಿನ್ಯ ಗ್ರಾಮ ಪಂಚಾಯತ್ ಉಪಾಧ್ಯಕ್ಷ ಫಾರೂಕ್ ಕಿನ್ಯ ಹಾಗೂ ಹೋಟೆಲ್ ಆಲಿಯಾ ಮಾಲಕ ರೌಫ್ ಅವರ ನೇತೃತ್ವದಲ್ಲಿ, ಸಿರಾಜ್ ಸಾಗ್ ಹಾಗೂ ಮೊಬೈಲ್ ಪಾಯಿಂಟ್ ಮಾಲಕ ಮುಸ್ತಫಾ ಅವರ ಸಹಕಾರದೊಂದಿಗೆ ಈ ಕಾರ್ಯಕ್ರಮ ನಡೆಯಿತು.

ಎರಡೂ ಸಂದರ್ಭಗಳಲ್ಲಿ ಪರಸ್ಪರರ ಧಾರ್ಮಿಕ ಆಚರಣೆಗಳಿಗೆ ಗೌರವ ಸೂಚಿಸುವುದರ ಜೊತೆಗೆ, ಹಬ್ಬದ ಸಂಭ್ರಮವನ್ನು ಒಟ್ಟಾಗಿ ಹಂಚಿಕೊಳ್ಳುವ ಮೂಲಕ ಕಿನ್ಯ ಗ್ರಾಮದ ಜನರು ಸೌಹಾರ್ದದ ಸಂದೇಶವನ್ನು ಸಾರಿದ್ದಾರೆ.

ಪರಸ್ಪರ ಗೌರವವೇ ಸೌಹಾರ್ದದ ಆಧಾರ

ಒಂದು ಸಮುದಾಯದ ಹಬ್ಬದ ಸಂದರ್ಭದಲ್ಲಿ ಮತ್ತೊಂದು ಸಮುದಾಯದವರು ಆತ್ಮೀಯವಾಗಿ ಸ್ವಾಗತಿಸುವುದು, ಮತ್ತೊಂದು ಹಬ್ಬದ ಸಂದರ್ಭದಲ್ಲಿ ಅದೇ ರೀತಿಯ ಪ್ರೀತಿ ಮತ್ತು ಸಹಕಾರವನ್ನು ಹಿಂದಿರುಗಿಸುವುದು ಕೇವಲ ಕಾರ್ಯಕ್ರಮದ ಭಾಗವಲ್ಲ; ಅದು ಸಾಮಾಜಿಕ ಸಂಬಂಧಗಳನ್ನು ಬಲಪಡಿಸುವ ಮಾನವೀಯ ನಡೆ.

“ಹಬ್ಬಗಳು ಬೇರೆ, ಸಂಭ್ರಮ ಒಂದೇ; ಧರ್ಮಗಳು ಬೇರೆ, ಮಾನವೀಯತೆ ಒಂದೇ” ಎಂಬ ಸಂದೇಶವನ್ನು ಕಿನ್ಯ ಬೆಳರಿಂಗೆ ಸಾರಿದೆ.

ದಕ್ಷಿಣ ಕನ್ನಡದ ಬಹುಧರ್ಮೀಯ ಹಾಗೂ ಬಹುಸಂಸ್ಕೃತಿಯ ಸಾಮಾಜಿಕ ಬದುಕಿನಲ್ಲಿ ಇಂತಹ ಸೌಹಾರ್ದದ ನಡೆಗಳು ಶಾಂತಿ ಮತ್ತು ಸಹಬಾಳ್ವೆಯ ವಾತಾವರಣವನ್ನು ಮತ್ತಷ್ಟು ಬಲಪಡಿಸುವಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ. ಕಿನ್ಯದಲ್ಲಿ ಮೂಡಿಬಂದಿರುವ ಈ ಸೌಹಾರ್ದದ ಮಾದರಿ ಜಿಲ್ಲೆಯಾದ್ಯಂತ ಪರಸ್ಪರ ಗೌರವ ಮತ್ತು ಸಹೋದರತ್ವಕ್ಕೆ ಪ್ರೇರಣೆಯಾಗಲಿ ಎಂಬ ಆಶಯ ವ್ಯಕ್ತವಾಗಿದೆ.