ವಾರಾಂತ್ಯ ರಜೆ ಬದಲಾವಣೆಗೆ ಶಿಫಾರಸು- ವಾರದಲ್ಲಿ ಎರಡೂವರೆ ದಿನ ರಜೆ ಸಾಧ್ಯತೆ

ಮನಾಮ: ಬಹ್ರೇನ್‌ನಲ್ಲಿ ಶುಕ್ರವಾರ ಮತ್ತು ಶನಿವಾರದ ಪ್ರಸ್ತುತ ವಾರಾಂತ್ಯದ ರಜಾದಿನಗಳನ್ನು ಬದಲಾಯಿಸುವ ಪ್ರಸ್ತಾಪ ಬಂದಿದೆ. ಬದಲಾಗಿ ವಾರಾಂತ್ಯದ ರಜೆಯನ್ನು ಶನಿವಾರ ಮತ್ತು ಭಾನುವಾರಕ್ಕೆ ವರ್ಗಾಯಿಸುವಂತೆ ಸಂಸದರು ಶಿಫಾರಸು ಮಾಡಿದ್ದಾರೆ. ಶುಕ್ರವಾರವನ್ನು ಅರ್ಧ ಸಮಯದ ಕೆಲಸದ ದಿನವನ್ನಾಗಿ ಮಾಡಲು ಮತ್ತು ವಾರಾಂತ್ಯದ ರಜೆಯನ್ನು ಶನಿವಾರ ಮತ್ತು ಭಾನುವಾರಕ್ಕೆ ವರ್ಗಾಯಿಸಲು ಶಿಫಾರಸು ಮಾಡಲಾಗಿದೆ.

ಡಾ. ಅಲಿ ಅಲ್ ನುಯಿಮಿ ನೇತೃತ್ವದಲ್ಲಿ ಐವರು ಸಂಸದರು ಈ ಪ್ರಸ್ತಾವನೆಯನ್ನು ಸಂಸತ್ತಿನಲ್ಲಿ ಮಂಡಿಸಿದರು. ಇದನ್ನು ಸಂಸತ್ತಿನ ಸ್ಪೀಕರ್ ಅಹ್ಮದ್ ಅಲ್ ಮುಸಲ್ಲಮ್ ಅವರು ಪರಿಶೀಲನೆಗಾಗಿ ಶಾಸಕಾಂಗ ಮತ್ತು ಕಾನೂನು ವ್ಯವಹಾರಗಳ ಸಮಿತಿಗೆ ಕಳುಹಿಸಿದ್ದಾರೆ. ಅನುಮೋದನೆ ದೊರೆತರೆ ಎರಡೂವರೆ ದಿನ ರಜೆ ಲಭ್ಯವಾಗಲಿದೆ.

ಯುಎಇ, ಮೊರಾಕೊ, ಇಂಡೋನೇಷ್ಯಾ, ಮಲೇಷಿಯಾ ಮತ್ತು ಮಾರಿಟಾನಿಯಾ ಪ್ರಸ್ತುತ ಈ ವಿಧಾನವನ್ನು ಹೊಂದಿವೆ. ಈ ಪ್ರಸ್ತಾಪವು ಜಾಗತಿಕ ಮಾರುಕಟ್ಟೆಗೆ ಅನುಗುಣವಾಗಿ ಆರ್ಥಿಕತೆಯನ್ನು ಬದಲಾಯಿಸುವ ಭಾಗವಾಗಿದೆ. ಶನಿವಾರ ಮತ್ತು ಭಾನುವಾರ ರಜಾ ದಿನವಾಗಿರುವುದರಿಂದ ಅಂತರಾಷ್ಟ್ರೀಯ ಹಣಕಾಸು ಮತ್ತು ವ್ಯಾಪಾರ ವಹಿವಾಟು ಸುಗಮಗೊಳಿಸಲು ಹೆಚ್ಚು ಅನುಕೂಲವಾಗುತ್ತದೆ ಎಂಬುದು ಸಂಸದರ ಅಭಿಪ್ರಾಯ.