ಯುಎಇಯಲ್ಲಿ ಉದ್ಯೋಗ ನಷ್ಟ ಹೊಂದುವವರಿಗೆ ಇನ್ಮುಂದೆ Insurance ಲಭ್ಯ

ಅಬುಧಾಬಿ: ಕೆಲಸ ಕಳೆದುಕೊಂಡರೂ ಮೂರು ತಿಂಗಳವರೆಗೆ ಸಂಬಳ ನೀಡುವ ಹೊಸ ವಿಮಾ (Insurance) ಯೋಜನೆಯನ್ನು ಯುಎಇಯಲ್ಲಿ ಆರಂಭಿಸಲಾಗಿದೆ. ಉದ್ಯೋಗಿಗಳಿಗೆ ಹೊಸ ಉದ್ಯೋಗ ಸಿಗುವವರೆಗೆ ಅವರನ್ನು ರಕ್ಷಿಸುವ ಉದ್ದೇಶದಿಂದ ಇಂತಹ ಸಾಮಾಜಿಕ ಭದ್ರತಾ ಯೋಜನೆಯನ್ನು ಜಾರಿಗೊಳಿಸಲಾಗುತ್ತಿದೆ ಎಂದು ಮಾನವ ಸಂಪನ್ಮೂಲ ಸ್ವದೇಶೀಕರಣ ಸಚಿವಾಲಯ(Ministry Of Human Resources & Emiratisation) ಮಾಹಿತಿ ನೀಡಿದೆ.

ಯುಎಇ ಸೆಂಟ್ರಲ್ ಬ್ಯಾಂಕ್ ಪರವಾನಗಿ ಪಡೆದ ರಾಷ್ಟ್ರೀಯ ವಿಮಾ ಕಂಪನಿಗಳಿಂದ ನಿರುದ್ಯೋಗ ವಿಮೆಯನ್ನು ಜಾರಿಗೊಳಿಸಲಾಗುತ್ತದೆ. ಕೆಲಸ ಕಳೆದುಕೊಂಡರೂ ಶೇ.60ರಷ್ಟು ಸಂಬಳ ಸಿಗಲಿದೆ ಎಂಬುದು ವೈಶಿಷ್ಟ್ಯ. ಈ ಕವರ್ ಗರಿಷ್ಠ ಮೂರು ತಿಂಗಳವರೆಗೆ ಅಥವಾ ನೀವು ಹೊಸ ಉದ್ಯೋಗವನ್ನು ಕಂಡುಕೊಳ್ಳುವವರೆಗೆ ಲಭ್ಯವಿದೆ. ಈ ರೀತಿ ತಿಂಗಳಿಗೆ ಗರಿಷ್ಠ 20,000 ದಿರ್ಹಮ್ ಪಡೆಯಬಹುದು.

ಫಲಾನುಭವಿಗಳು ನಿಗದಿತ ಮೊತ್ತವನ್ನು ಪಾವತಿಸಿ ವಿಮಾ ಯೋಜನೆಗೆ ಸೇರಬೇಕು. ಕನಿಷ್ಠ 12 ತಿಂಗಳ ಉದ್ಯೋಗವನ್ನು ಪೂರ್ಣಗೊಳಿಸಿದ ನಂತರ ತಮ್ಮ ಕೆಲಸವನ್ನು ಕಳೆದುಕೊಳ್ಳುವವರಿಗೆ ಅವರ ಸಂಬಳದ 60 ಪ್ರತಿಶತವನ್ನು ನೀಡಲಾಗುತ್ತದೆ. ವಿಮಾ ಯೋಜನೆಗೆ ಸೇರಿದ ದಿನಾಂಕದಿಂದ ಇದನ್ನು ಲೆಕ್ಕ ಹಾಕಲಾಗುತ್ತದೆ. ಖಾಸಗಿ ವಲಯದ ಮತ್ತು ಫೆಡರಲ್ ಸರ್ಕಾರಿ ನೌಕರರು ಈ ಯೋಜನೆಗೆ ಸೇರಬಹುದಾಗಿದೆ.

ಶಿಸ್ತು ಕ್ರಮದ ಭಾಗವಾಗಿ ವಜಾಗೊಳಿಸಲ್ಪಟ್ಟವರು ಈ ಪ್ರಯೋಜನಗಳನ್ನು ಪಡೆಯುವಂತಿಲ್ಲ. ವಂಚನೆಯಿಂದಲೋ, ಉದ್ಯೋಗ ಮಾಡದ ಕಂಪನಿಗಳ ಹೆಸರಲ್ಲೋ ವಿಮೆ ಹಣ ಪಡೆಯಲು ಯತ್ನಿಸಿದರೆ ಶಿಕ್ಷೆಗೆ ಗುರಿಪಡಿಸಲಾಗುವುದು. ಸ್ವಂತ ಉದ್ಯಮ ನಡೆಸುತ್ತಿರುವವರು ಮತ್ತು ಹೂಡಿಕೆದಾರರು ಈ ವಿಮಾ ಯೋಜನೆಗೆ ಸೇರುವಂತಿಲ್ಲ ಎಂದೂ ತಿಳಿಸಲಾಗಿದೆ.