ಇಂಡಿಯನ್ ಗ್ರ್ಯಾಂಡ್ ಮುಫ್ತಿ ಮಧ್ಯಪ್ರವೇಶ- 800 ಭಾರತೀಯರ ಬಿಡುಗಡೆ

ರಿಯಾದ್ | ವಿವಿಧ ಕಾರಣಗಳಿಗಾಗಿ ಸೌದಿ ಅರೇಬಿಯಾದ ಗಡೀಪಾರು ಕೇಂದ್ರದಲ್ಲಿ ಬಂಧನಕ್ಕೊಳಗಾಗಿದ್ದ ಮಲಯಾಳಿಗಳು ಸೇರಿದಂತೆ ಭಾರತೀಯರು ಬಿಡುಗಡೆ ಹೊಂದಿ ಈ ವಾರ ಮನೆ ಸೇರಲಿದ್ದಾರೆ. ಸೌದಿ ಸರ್ಕಾರದ ಕರುಣೆಯಿಂದ ಸುಮಾರು 800 ಭಾರತೀಯರನ್ನು ಬಿಡುಗಡೆ ಮಾಡಲಾಗುತ್ತಿದೆ.

ಕೋವಿಡ್ ವ್ಯಾಪಕಗೊಂಡ ಹಿನ್ನೆಲೆಯಲ್ಲಿ, ಹೇಗಾದರೂ ಮನೆ ಸೇರಬೇಕು ಎಂಬ ಇರಾದೆಯಿಂದ ಹಲವು ಬಾಗಿಲುಗಳನ್ನು ತಟ್ಟಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಸಂಬಂಧಿಕರು ಮತ್ತು ಸ್ನೇಹಿತರು ಈ ವಿಷಯವನ್ನು ಭಾರತೀಯ ಗ್ರ್ಯಾಂಡ್ ಮುಫ್ತಿ ಕಾಂತಪುರಂ ಎ. ಪಿ. ಅಬೂಬಕರ್ ಮುಸ್ಲಿಯಾರ್ ಅವರ ಗಮನಕ್ಕೆ ತಂದ ನಂತರ ಅವರು ಮಧ್ಯಪ್ರವೇಶಿಸಿದರು.

ತ್ವರಿತ ಪರಿಹಾರಕ್ಕಾಗಿ ಸೌದಿ ಅರೇಬಿಯಾದ ಭಾರತೀಯ ರಾಯಭಾರ ಕಚೇರಿಯನ್ನು ಸಂಪರ್ಕಿಸಿ, ಸೌದಿ ಅರೇಬಿಯನ್ ಸರ್ಕಾರದ ಪ್ರತಿನಿಧಿಗಳನ್ನು ಸಹ ಸಂಪರ್ಕಿಸಿದರು.ಇದರ ಫಲವಾಗಿ ಇದೀಗ 800 ಭಾರತೀಯರಿಗೆ ಬಿಡುಗಡೆ ಭಾಗ್ಯ ಲಭಿಸಿದೆ.

ಅವರು ಚೆನ್ನೈ, ವಿಶಾಖಪಟ್ಟಣಂ ಮತ್ತು ಕೊಚ್ಚಿ ವಿಮಾನ ನಿಲ್ದಾಣಗಳಿಗೆ ಆಗಮಿಸಲಿದ್ದಾರೆ. ಭಾರತದಲ್ಲಿ ಕ್ವಾರಂಟೈನ್ ಸೌಲಭ್ಯವನ್ನು ದೃಢೀಕರಿಸಿದ ನಂತರವೇ ಅವರನ್ನು ಸೌದಿಯಿಂದ ವಾಪಸ್ ಕಳುಹಿಸಲಾಗುತ್ತದೆ. ಜೈಲಿನಲ್ಲಿ ಸೌದಿ ಅಧಿಕಾರಿಗಳು ಗೌರವದಿಂದ ವರ್ತಿಸಿದ್ದರು, ಮನೆಗೆ ಮರಳುವುದು ತುಂಬಾ ಸಮಾಧಾನಕರವಾಗಿದೆ ಎಂದು ಬಂಧಿತರು ಹೇಳುತ್ತಾರೆ.

ಈ ಬಗ್ಗೆ ಮಧ್ಯಪ್ರವೇಶಿಸಿದ ವಿಷಯ ಸಂಬಂಧಿಸಿದಂತೆ ಕಾಂತಪುರಂ ಉಸ್ತಾದರು ಕೇಂದ್ರ ವಿದೇಶಾಂಗ ಸಚಿವರಿಗೆ ಪತ್ರ ಬರೆದಿದ್ದಾರೆ.