ಉಮ್ರಾ ಯಾತ್ರಿಕರಿಗೆ ಸಿಹಿ ಸುದ್ದಿ: ಒಂದು ವರ್ಷ ಕಾಲಾವಧಿಯ ‘ಮಲ್ಟಿ ಎಂಟ್ರಿ’ ಉಮ್ರಾ ವೀಸಾ ಬಿಡುಗಡೆ

ರಿಯಾದ್: ಸೌದಿ ಅರೇಬಿಯಾ ಉಮ್ರಾ ಯಾತ್ರಿಕರಿಗೆ ಸಂತಸದ ಸುದ್ದಿಯೊಂದನ್ನು ನೀಡಿದ್ದು, ಒಂದು ವರ್ಷದ ಅವಧಿಯ ಉಮ್ರಾ ವೀಸಾವನ್ನು ಪರಿಚಯಿಸಿದೆ. ಹಜ್ ಮತ್ತು ಉಮ್ರಾ ಸಚಿವಾಲಯವು ಒಂದು ವರ್ಷದ ಅವಧಿಯ ‘ಮಲ್ಟಿಪಲ್ ಎಂಟ್ರಿ’ (Multiple Entry) ಉಮ್ರಾ ವೀಸಾವನ್ನು ಘೋಷಿಸಿದೆ. ಈ ವೀಸಾ ಅವಧಿಯಲ್ಲಿ ಹಲವು ಬಾರಿ ದೇಶಕ್ಕೆ ಬರಲು ಮತ್ತು ಗರಿಷ್ಠ 90 ದಿನಗಳವರೆಗೆ ತಂಗಲು ಸಾಧ್ಯವಾಗಲಿದೆ.

ವೀಸಾ ಮಂಜೂರಾದ ದಿನದಿಂದ ಒಂದು ವರ್ಷದವರೆಗೆ ಈ ವೀಸಾದ ಅವಧಿ ಜಾರಿಯಲ್ಲಿರುತ್ತದೆ. ಈ ಅವಧಿಯೊಳಗೆ ಒಟ್ಟು 90 ದಿನಗಳವರೆಗೆ ಸೌದಿಯಲ್ಲಿ ತಂಗಬಹುದು. ಪ್ರತಿಯೊಬ್ಬರೂ ಬಂದಿಳಿದು ಹಿಂತಿರುಗುವಾಗ, ಅವರು ತಂಗಿದ ದಿನಗಳನ್ನು ಈ 90 ದಿನಗಳಿಂದ ಕಳೆಯಲಾಗುತ್ತದೆ (ಡಿಡಕ್ಟ್ ಮಾಡಲಾಗುತ್ತದೆ).

ಹಜ್ ಅವಧಿಯಲ್ಲಿ ನಿಯಂತ್ರಣ
ಹಜ್ ಸಮಯದಲ್ಲಿ ಈ ವೀಸಾಗೆ ನಿಯಂತ್ರಣವಿರುತ್ತದೆ. ದುಲ್ ಕಅದ್ 1 ರಿಂದ ದುಲ್ ಹಿಜ್ಜಾ 13 ರವರೆಗಿನ ಹಜ್ ಸೀಸನ್‌ನಲ್ಲಿ ಈ ವೀಸಾ ಬಳಸಿ ಸೌದಿಗೆ ಪ್ರವೇಶಿಸಲು ಅನುಮತಿ ಇರುವುದಿಲ್ಲ. ಈ ವೀಸಾದಲ್ಲಿ ಬರುವವರು ಪ್ರತಿ ಭೇಟಿಯಲ್ಲೂ ‘ನುಸುಕ್’ (Nusuk) ಪ್ಲಾಟ್‌ಫಾರ್ಮ್ ಮೂಲಕ ಅಧಿಕೃತ ಕಂಪನಿಗಳಿಂದ ಉಮ್ರಾ ಪ್ಯಾಕೇಜ್ ಖರೀದಿಸುವುದು ಕಡ್ಡಾಯವಾಗಿದೆ. ಪ್ಯಾಕೇಜ್‌ನ ಅವಧಿಯು ವೀಸಾದಲ್ಲಿ ಬಾಕಿ ಇರುವ ದಿನಗಳಿಗಿಂತ ಹೆಚ್ಚಿರಬಾರದು. ಸೌದಿಗೆ ಪ್ರಯಾಣಿಸುವ ಮೊದಲು ‘ನುಸುಕ್’ ಆಪ್ ಮೂಲಕ ಉಮ್ರಾ ಪರ್ಮಿಟ್ (ಅನುಮತಿ) ಪಡೆದುಕೊಳ್ಳಬೇಕು.

ಮೊದಲ ಬಾರಿಗೆ ಬರುವಾಗ ನುಸುಕ್ ಮೂಲಕ ಪ್ಯಾಕೇಜ್ ಪಡೆದು ವೀಸಾ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸಬೇಕು. ನಂತರ ಅದೇ ವೀಸಾದಲ್ಲಿ ಮತ್ತೆ ಬರುವಾಗ, ಹೊಸ ಪ್ಯಾಕೇಜ್ ಪಡೆದು ನುಸುಕ್ ಆಪ್ ಮೂಲಕ ಮತ್ತೆ ಪರ್ಮಿಟ್ ಪಡೆದುಕೊಳ್ಳಬೇಕು. ವಿಮಾನ ನಿಲ್ದಾಣಕ್ಕೆ ತಲುಪಿದಾಗ ಮತ್ತು ಹಿಂತಿರುಗುವಾಗ ನಿಮ್ಮ ವೀಸಾದಲ್ಲಿ ಬಾಕಿ ಇರುವ ದಿನಗಳು ಸಿಸ್ಟಮ್‌ನಲ್ಲಿ ಅಪ್‌ಡೇಟ್ ಆಗಲಿದೆ.

ಈ ಯೋಜನೆಯು ಪ್ರಪಂಚದಾದ್ಯಂತದ ಮುಸ್ಲಿಂ ಯಾತ್ರಿಕರಿಗೆ ಉಮ್ರಾ ನಿರ್ವಹಿಸಲು ಮತ್ತು ಸೌದಿ ಅರೇಬಿಯಾದ ಸಾಂಸ್ಕೃತಿಕ ಹಾಗೂ ಐತಿಹಾಸಿಕ ಸ್ಥಳಗಳನ್ನು ವೀಕ್ಷಿಸಲು ಸುಲಭ ಮತ್ತು ಅನುಕೂಲಕರ ವಾತಾವರಣವನ್ನು ಕಲ್ಪಿಸುವ ಉದ್ದೇಶವನ್ನು ಹೊಂದಿದೆ. ವಿದ್ಯುನ್ಮಾನ (Online/E-visa) ವ್ಯವಸ್ಥೆಯ ಮೂಲಕ ಸುಲಭವಾಗಿ ಈ ವೀಸಾಗೆ ಅರ್ಜಿ ಸಲ್ಲಿಸಬಹುದು ಎಂದು ಸಚಿವಾಲಯ ತಿಳಿಸಿದೆ.