ಸೌದಿ ಶೀಘ್ರದಲ್ಲೇ ಸಹಜ ಸ್ಥಿತಿಯತ್ತ- ಮೇ.31ರಿಂದ ಮಸೀದಿ ಪ್ರವೇಶಕ್ಕೆ ಅನುಮತಿ

ರಿಯಾದ್: ಸೌದಿ ಅರೇಬಿಯಾದಲ್ಲಿ ಕೋವಿಡ್ ಹರಡುವಿಕೆಯನ್ನು ತಡೆಯುವ ನಿಟ್ಟಿನಲ್ಲಿ ಏರ್ಪಡಿಸಲಾದ ನಿರ್ಬಂಧಗಳನ್ನು ಸಡಿಲಿಸುವುದಾಗಿ ಗೃಹ ಸಚಿವಾಲಯ ಘೋಷಿಸಿದೆ. ಸರ್ಕಾರಿ ಮತ್ತು ಖಾಸಗಿ ಸಂಸ್ಥೆಗಳಿಗೆ ಹಾಜರಾಗಲು ಇರುವ ನಿರ್ಬಂಧವನ್ನು ಸಚಿವಾಲಯ ತೆಗೆದುಹಾಕಿದೆ. ಗುರುವಾರದಿಂದ ಎಲ್ಲರೂ ಅತೀವ ಮುಂಜಾಗ್ರತೆಯಿಂದ ಕೆಲಸಕ್ಕೆ ಹಾಜರಾಗಬಹುದು. ದೇಶದ ಎಲ್ಲಾ ಸಣ್ಣ ಮತ್ತು ದೊಡ್ಡ ವಾಣಿಜ್ಯ ವ್ಯವಹಾರ ಕೇಂದ್ರಗಳಲ್ಲಿ ಕೆಲಸ ಆರಂಭಿಸಬಹುದಾಗಿದೆ.

ದೇಶೀಯ ವಿಮಾನಗಳ ಮೇಲಿನ ನಿರ್ಬಂಧವನ್ನೂ ರದ್ದುಪಡಿಸಲಾಗಿದೆ. ವೈಮಾನಿಕ ಸೇವೆಯನ್ನು ಸುರಕ್ಷತೆಯೊಂದಿಗೆ ಹಂತಹಂತವಾಗಿ ಆರಂಭಿಸಲಾಗುತ್ತದೆ. ದೇಶದ ಪ್ರಾಂತ್ಯಗಳ ನಡುವಿನ ಪ್ರಯಾಣ ತಡೆಯನ್ನು ಭಾಗಶಃ ಹಿಂತೆಗೆದುಕೊಳ್ಳಲಾಯಿತು. ಗುರುವಾರದಿಂದ ಶನಿವಾರದವರೆಗೆ(ಮೇ.28-30) ಬೆಳಿಗ್ಗೆ 6 ರಿಂದ ಮಧ್ಯಾಹ್ನ 3 ರವರೆಗೆ ಜನರು ಪ್ರಾಂತ್ಯಗಳ ನಡುವೆ ಮತ್ತು ನಗರಗಳ ನಡುವೆ ಪ್ರಯಾಣಿಸಬಹುದು.

ಎರಡನೇ ಹಂತದ ಸಡಿಲಿಕೆ ಮೇ 31 ಕ್ಕೆ ಆರಂಭ. ಬೆಳಿಗ್ಗೆ 6 ರಿಂದ ರಾತ್ರಿ 8 ರವರೆಗೆ ಪ್ರಾಂತ್ಯಗಳ ನಡುವೆ ಪ್ರಯಾಣ ನಡೆಸಬಹುದು. ಆದರೆ ಮಕ್ಕಾಕಡೆಗೆ ಯಾತ್ರೆ ಮತ್ತು ಉಮ್ರಾ ಸ್ಥಗಿತ ಗೊಳಿಸಿರುವುದನ್ನು ಮುಂದುವರಿಸಲಾಗಿದೆ. ಜೂನ್ 21 ರಿಂದ ದೇಶ ಸಾಮಾನ್ಯ ಸ್ಥಿತಿಗೆ ಮರಳಲಿದೆ.ಅಂದಿನಿಂದ ಮಕ್ಕಾ ಹೊರತುಪಡಿಸಿ ದೇಶದ ಎಲ್ಲೆಡೆ ಪ್ರಯಾಣಿಸಬಹುದು. ಅಂತರರಾಷ್ಟ್ರೀಯ ವಿಮಾನಯಾನ ಪ್ರಾರಂಭವಾಗುವ ದಿನಾಂಕವನ್ನು ಘೋಷಿಸಲಾಗಿಲ್ಲ.

ಮಕ್ಕಾ ಹೊರತುಪಡಿಸಿ ದೇಶದ ಎಲ್ಲಾ ಮಸೀದಿಗಳಲ್ಲಿ ಮುಂದಿನ ಭಾನುವಾರದಿಂದ(ಮೇ.31) ಪ್ರಾರ್ಥನೆಗಳಿಗೆ ಅವಕಾಶ ನೀಡಲಾಗಿದೆ,ಆದರೆ ಸಚಿವಾಲಯದ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕಿದೆ. ರೆಸ್ಟೋರೆಂಟ್‌ಗಳು ಮತ್ತು ಕೆಫೆಗಳಿಗೆ ಏರ್ಪಡಿಸಲಾಗಿದ್ದ ನಿಯಂತ್ರಣವನ್ನೂ ಸಡಿಲಿಸಲಾಗಿದೆ. ಸಚಿವಾಲಯದ ಅಧಿಸೂಚನೆ ನಿಯಮಗಳಿಗೆ ಅನುಸಾರವಾಗಿ ಕೆಲಸ ಮಾಡಬಹುದು.

ಕ್ಷೌರಿಕನ ಅಂಗಡಿಗಳು, ಜಿಮ್, ಸಿನೆಮಾ, ವಿವಾಹಗಳು, ಮನರಂಜನೆ ಮತ್ತು ಇತರ ಕಾರ್ಯಕ್ರಮಗಳ ನಿಷೇಧ ಮುಂದುವರಿಯಲಿದೆ. ಐವತ್ತಕ್ಕಿಂತ ಹೆಚ್ಚಿನ ಜನರು ಸೇರುವ ಯಾವುದೇ ಕಾರ್ಯಕ್ರಮವನ್ನು ಅನುಮತಿಸಲಾಗುವುದಿಲ್ಲ.