ಡ್ರಗ್ ಮಾಫಿಯಾ ವಿರುದ್ಧ ‘ಆಪರೇಷನ್ ತೂಫಾನ್’- ಮೊದಲ ದಿನವೇ 137 ಮಂದಿ ಬಂಧನ

ತಿರುವನಂತಪುರಂ: ಲಹರಿ (ಮಾದಕ ದ್ರವ್ಯ) ಮಾಫಿಯಾ ವಿರುದ್ಧ ಕೇರಳ ಸರ್ಕಾರ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದ್ದು, ಇದರ ಭಾಗವಾಗಿ ಆರಂಭಿಸಲಾದ ‘ಆಪರೇಷನ್ ತೂಫಾನ್’ ಕಾರ್ಯಾಚರಣೆಯ ಮೊದಲ ದಿನವೇ ಭರ್ಜರಿ ಯಶಸ್ಸು ಸಿಕ್ಕಿದೆ. ರಾಜ್ಯಾದ್ಯಂತ ನಡೆಸಿದ ದಾಳಿಯಲ್ಲಿ 137 ಜನರನ್ನು ಬಂಧಿಸಲಾಗಿದ್ದು, ಒಟ್ಟು 104 ಪ್ರಕರಣಗಳನ್ನು ದಾಖಲಿಸಲಾಗಿದೆ. ಈ ವೇಳೆ ಸುಮಾರು 500 ಗ್ರಾಂ ಎಂಡಿಎಂಎ (MDMA) ಮಾದಕ ದ್ರವ್ಯವನ್ನು ವಶಪಡಿಸಿಕೊಳ್ಳಲಾಗಿದೆ.

ಕರ್ನಾಟಕ, ಆಂಧ್ರದಿಂದ ಕೇರಳಕ್ಕೆ ಡ್ರಗ್ಸ್ ಸರಬರಾಜು
ಕೇರಳಕ್ಕೆ ಎಂಡಿಎಂಎ ಮುಖ್ಯವಾಗಿ ಕರ್ನಾಟಕ ಮತ್ತು ವಿದೇಶಗಳಿಂದ ಸರಬರಾಜಾಗುತ್ತಿದೆ ಹಾಗೂ ಗಾಂಜಾ ಆಂಧ್ರಪ್ರದೇಶ ಮತ್ತು ಒಡಿಶಾದಿಂದ ಬರುತ್ತಿದೆ ಎಂದು ರಾಜ್ಯ ಪೊಲೀಸ್ ಮಹಾನಿರ್ದೇಶಕ (ಡಿಜಿಪಿ) ರವಾಡ ಚಂದ್ರಶೇಖರ್ ತಿಳಿಸಿದ್ದಾರೆ. ಮಾದಕ ದ್ರವ್ಯ ತಡೆಗೆ ವಿಮಾನ ನಿಲ್ದಾಣಗಳಲ್ಲಿ ಇನ್ನು ಮುಂದೆ ಕಣ್ಗಾವಲು ಮತ್ತಷ್ಟು ಬಲಪಡಿಸಲಾಗುವುದು. ಪ್ರಸ್ತುತ ಮೊದಲ ದಿನ ವಶಪಡಿಸಿಕೊಂಡಿರುವ ಒಟ್ಟು ಎಂಡಿಎಂಎ ಮಾರುಕಟ್ಟೆ ಮೌಲ್ಯ ಸುಮಾರು 30 ಲಕ್ಷ ರೂಪಾಯಿ ಎಂದು ಅವರು ಮಾಹಿತಿ ನೀಡಿದ್ದಾರೆ.

ಕೊಚ್ಚಿ, ಮಲಪ್ಪುರಂ ಮತ್ತು ಕೋಯಿಕ್ಕೋಡ್ ಜಿಲ್ಲೆಗಳಿಂದ ವಾಣಿಜ್ಯ ಪ್ರಮಾಣದಲ್ಲಿ (Commercial quantity) ಮಾದಕ ದ್ರವ್ಯಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಡ್ರಗ್ಸ್ ಜಾಲದ ವಿರುದ್ಧ ಅಂತರರಾಜ್ಯ ಮಟ್ಟದಲ್ಲೂ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗುವುದು ಮತ್ತು ನೆರೆ ರಾಜ್ಯಗಳೊಂದಿಗೆ ಈ ಕುರಿತು ಶೀಘ್ರದಲ್ಲೇ ಮಾತುಕತೆ ನಡೆಸಲಾಗುವುದು ಎಂದು ಡಿಜಿಪಿ ತಿಳಿಸಿದರು.

“ಹಲವು ಬಾರಿ ಡ್ರಗ್ಸ್ ದಂಧೆಯ ಮುಖ್ಯ ಸೂತ್ರಧಾರರನ್ನು (ಕಿಂಗ್‌ಪಿನ್) ಹಿಡಿಯುವುದು ಸವಾಲಾಗಿ ಪರಿಣಮಿಸುತ್ತದೆ. ಆದರೆ ಈ ಬಾರಿ ಅಂತಹ ಎಲ್ಲಾ ತಾಂತ್ರಿಕ ಮತ್ತು ಪ್ರಾಯೋಗಿಕ ಸಮಸ್ಯೆಗಳನ್ನು ಬಗೆಹರಿಸಿ ತನಿಖೆಯನ್ನು ಯಶಸ್ವಿಯಾಗಿ ಮುನ್ನಡೆಸುವ ವಿಶ್ವಾಸವಿದೆ” ಎಂದು ಡಿಜಿಪಿ ರವಾಡ ಚಂದ್ರಶೇಖರ್ ಹೇಳಿದರು.

ಫ್ಲಾಟ್ ಮೇಲೆ ದಾಳಿ: ಮೂವರ ಬಂಧನ, ಲಕ್ಷಾಂತರ ಮೌಲ್ಯದ ಡ್ರಗ್ಸ್ ಜಪ್ತಿ
ಕಾರ್ಯಾಚರಣೆಯ ಭಾಗವಾಗಿ ಕಾಕ್ಕನಾಡ್‌ನ ಕೊಲ್ಲಂಕುಡಿಮುಗಲ್‌ನಲ್ಲಿರುವ ‘ಅಲ್ಟಿಮಾ’ ಫ್ಲಾಟ್ ಮೇಲೆ ಡ್ಯಾನ್ಸಾಫ್ (DANSAF) ತಂಡ ವಿಶೇಷ ದಾಳಿ ನಡೆಸಿದೆ. ಈ ವೇಳೆ 437 ಗ್ರಾಂ ಎಂಡಿಎಂಎ ಜೊತೆಗೆ ಮೂವರು ಆರೋಪಿಗಳನ್ನು ಬಂಧಿಸಲಾಗಿದೆ.
ಬಂಧಿತ ಆರೋಪಿಗಳು:

• ಆಷಿಫ್ (36) – ಕಳಮಶ್ಶೇರಿ ನಿವಾಸಿ
• ಅರ್ಜುನ್ (30) – ಪಾಲಕ್ಕಾಡ್ ನಿವಾಸಿ
• ರತೀಶ್ (33) – ಕಾಸರಗೋಡು ನಿವಾಸಿ

ಈ ನಿರ್ದಿಷ್ಟ ಫ್ಲಾಟ್‌ನಿಂದ ಜಪ್ತಿ ಮಾಡಲಾದ ಎಂಡಿಎಂಎ ಮೌಲ್ಯ ಸುಮಾರು 14 ಲಕ್ಷ ರೂ. ಎಂದು ಅಂದಾಜಿಸಲಾಗಿದೆ. ಇದರೊಂದಿಗೆ ಆರೋಪಿಗಳ ಫ್ಲಾಟ್‌ನಿಂದ 1 ಲಕ್ಷ ರೂಪಾಯಿ ನಗದನ್ನು ಸಹ ವಶಪಡಿಸಿಕೊಳ್ಳಲಾಗಿದೆ. ಸದ್ಯ ಆರೋಪಿಗಳ ಬ್ಯಾಂಕ್ ಖಾತೆಗಳಿಗೆ ಇತ್ತೀಚೆಗೆ ಜಮೆಯಾಗಿರುವ ದೊಡ್ಡ ಮೊತ್ತದ ಹಣದ ಮೂಲ ಮತ್ತು ಅವರ ನೆಟ್‌ವರ್ಕ್ ಕುರಿತು ಡ್ಯಾನ್ಸಾಫ್ ತಂಡ ತೀವ್ರ ತನಿಖೆ ನಡೆಸುತ್ತಿದೆ.