ಮೂರು ತಿಂಗಳಿಗಿಂತ ಹೆಚ್ಚು ಕಾಲ ದೇಶದಿಂದ ಹೊರಗಿರುವ ಗೃಹ ಕಾರ್ಮಿಕರ ವೀಸಾ ರದ್ದು

ಕುವೈಟ್ ಸಿಟಿ: ದೇಶೀಯ ವೀಸಾ ಕಾನೂನಿನಲ್ಲಿ ಆಮೂಲಾಗ್ರ ಬದಲಾವಣೆಯೊಂದಿಗೆ ಕುವೈಟ್, ಮೂರು ತಿಂಗಳಿಗಿಂತ ಹೆಚ್ಚು ಕಾಲ ದೇಶದಿಂದ ಹೊರಗಿರುವ ಗೃಹ ಕಾರ್ಮಿಕರ ವೀಸಾವನ್ನು ರದ್ದುಗೊಳಿಸಲು ಕುವೈತ್ ಅಧಿಕಾರಿಗಳು ಉದ್ಯೋಗದಾತರಿಗೆ ಅನುಮತಿ ನೀಡಿದ್ದಾರೆ.

ದೇಶವನ್ನು ತೊರೆದ ಮೂರು ತಿಂಗಳೊಳಗೆ ಮನೆಗೆಲಸಗಾರರು ಹಿಂತಿರುಗದಿದ್ದರೆ ಅವರ ರೆಸಿಡೆನ್ಸಿಯನ್ನು ರದ್ದುಗೊಳಿಸಲು ಕುವೈಟ್ ಪ್ರಾಯೋಜಕರಿಗೆ ಅನುಮತಿ ನೀಡಲಾಗಿದೆ ಎಂದು ಆಂತರಿಕ ಸಚಿವಾಲಯ ತಿಳಿಸಿದೆ. ಈ ಸೌಲಭ್ಯವನ್ನು ಸರ್ಕಾರದ ಏಕೀಕೃತ ಅಪ್ಲಿಕೇಶನ್ ಸಹೇಲ್ ಮೂಲಕ ಒದಗಿಸಲಾಗಿದೆ.

ರೆಸಿಡೆನ್ಸಿ ವ್ಯವಹಾರಗಳ ಕಚೇರಿಗಳಿಗೆ ಭೇಟಿ ನೀಡುವ ಮೂಲಕವೂ ಗೃಹ ಕಾರ್ಮಿಕರ ವೀಸಾವನ್ನು ರದ್ದುಗೊಳಿಸಬಹುದು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಉಪಪ್ರಧಾನಿ ಮತ್ತು ಆಂತರಿಕ ಸಚಿವ ಶೈಖ್ ತಲಾಲ್ ಅಲ್ ಖಾಲಿದ್ ಅಲ್ ಅಹ್ಮದ್ ಅಲ್ ಸಬಾಹ್ ಅವರ ಸಲಹೆಯ ಮೇರೆಗೆ ಹೊಸ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ನವೆಂಬರ್ 5 ರಿಂದ ಹೊಸ ಕಾನೂನು ಜಾರಿಗೆ ಬರಲಿದೆ. ಅದೇ ಸಮಯದಲ್ಲಿ, ಆರು ತಿಂಗಳಿಗಿಂತ ಹೆಚ್ಚು ಕಾಲ ದೇಶದಿಂದ ಹೊರಗಿರುವ ಯಾವುದೇ ವೀಸಾ ಹೊಂದಿರುವವರು ಮತ್ತೆ ದೇಶಕ್ಕೆ ಪ್ರವೇಶಿಸದಿದ್ದರೆ ಅವರ ನಿವಾಸವು ಸ್ವಯಂಚಾಲಿತವಾಗಿ ರದ್ದುಗೊಳ್ಳಲಿದೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.