ಎಕ್ಸಿಟ್ ರೀ-ಎಂಟ್ರಿ ವೀಸಾ: ಅವಧಿಯೊಳಗೆ ಮರಳದಿದ್ದಲ್ಲಿ ಮೂರು ವರ್ಷಗಳ ಪ್ರವೇಶ ನಿರ್ಬಂಧ- ಜವಾಝಾತ್

ರಿಯಾದ್: ಸೌದಿ ಅರೇಬಿಯಾದಿಂದ ರಜೆಯ ಮೇಲೆ ಮನೆಗೆ ತೆರಳಿದವರು, ಅವಧಿಯೊಳಗೆ ಹಿಂತಿರುಗದಿದ್ದಲ್ಲಿ ಮೂರು ವರ್ಷಗಳವರೆಗೆ ದೇಶಕ್ಕೆ ಮರಳಲು ಸಾಧ್ಯವಿಲ್ಲ ಎಂದು ಪಾಸ್‌ಪೋರ್ಟ್ ಅಧಿಕಾರಿಗಳು ಪುನಃ ಎಚ್ಚರಿಸಿದ್ದಾರೆ.

ಎಕ್ಸಿಟ್ ರೀ-ಎಂಟ್ರಿ ವೀಸಾದಲ್ಲಿ ದೇಶವನ್ನು ತೊರೆದು ವೀಸಾ ಮುಕ್ತಾಯ ದಿನಾಂಕದ ನಂತರ ಹಿಂತಿರುಗದವರಿಗೆ ಮೂರು ವರ್ಷಗಳವರೆಗೆ ಸೌದಿ ಅರೇಬಿಯಾವನ್ನು ಪ್ರವೇಶಿಸುವುದನ್ನು ನಿರ್ಬಂಧಿಸಲಾಗಿದೆ. ಆದರೆ ,ಹಳೆಯ ಪ್ರಾಯೋಜಕರ ಹೊಸ ವೀಸಾದೊಂದಿಗೆ ಹಿಂತಿರುಗಬಹುದು.

ಮೂರು ವರ್ಷಗಳ ಅವಧಿಯನ್ನು ಮರು-ಪ್ರವೇಶ ವೀಸಾದ ಮುಕ್ತಾಯ ದಿನಾಂಕದಿಂದ ಹಿಜ್ರಾ ಕ್ಯಾಲೆಂಡರ್ ಅನ್ನು ಆಧರಿಸಿ ಲೆಕ್ಕಹಾಕಲಾಗುತ್ತದೆ. ಈ ನಿಯಮವು ಅವಲಂಬಿತ (ಕುಟುಂಬ) ವೀಸಾ ಹೊಂದಿರುವವರಿಗೆ ಅನ್ವಯಿಸುವುದಿಲ್ಲ. ಅಂತಹ ವೀಸಾಗಳನ್ನು ಹೊಂದಿರುವವರು ರೀ-ಎಂಟ್ರಿ ವೀಸಾದಲ್ಲಿ ಮನೆಗೆ ತೆರಳಿ, ನಿಗದಿತ ಸಮಯದೊಳಗೆ ಹಿಂದಿರುಗದಿದ್ದರೂ ಮರು-ಪ್ರವೇಶಕ್ಕೆ ನಿರ್ಬಂಧವಿರುವುದಿಲ್ಲ. ಅಂತಹ ಜನರು ಅವಲಂಬಿತ ವೀಸಾ ಹೊಂದಿರುವವರನ್ನು ವ್ಯವಸ್ಥೆಯಿಂದ ತೆಗೆದುಹಾಕಲು ಅಬ್ಶಿರಿನ ತವಾಸುಲ್ ಸೇವೆಯನ್ನು ಬಳಸಬಹುದು ಎಂದು ಜವಾಝಾತ್ ಹೇಳಿದೆ.

ಮರು-ಪ್ರವೇಶದ ಮೇಲೆ ದೇಶಕ್ಕೆ ಹಿಂತಿರುಗದ ವಿದೇಶಿಯರನ್ನು ವೀಸಾ ಅವಧಿ ಮುಗಿದ ಎರಡು ತಿಂಗಳ ನಂತರ ಸ್ವಯಂಚಾಲಿತವಾಗಿ ಸಿಸ್ಟಮ್‌ನಿಂದ ತೆಗೆದುಹಾಕಲಾಗುತ್ತದೆ ಎಂದು ಜವಾಝಾತ್ ಹೇಳಿದೆ.