ಬೇಸಿಗೆ ಧಗೆ: ಉತ್ತರ ಭಾರತ ತತ್ತರ- ರಾಜಸ್ಥಾನದಲ್ಲಿ ತಾಪಮಾನ 50.8 ಡಿಗ್ರಿ

ಜೈಪುರ: ಬೇಸಿಗೆ ಧಗೆಗೆ ಉತ್ತರ ಭಾರತದ ರಾಜ್ಯಗಳು ತತ್ತರಿಸಿದ್ದು, ರಾಜಸ್ತಾನದಲ್ಲಿ ತಾಪಮಾನ ಹೊಸ ದಾಖಲೆ ಮಟ್ಟ ತಲುಪಿದೆ.

ರಾಜಸ್ಥಾನದಾದ್ಯಂತ ಬಿಸಿಲ ಬೇಗೆ ಮಿತಿ ಮೀರಿದ್ದು, ರಾಜಸ್ಥಾನದ ಚುರುವಿನಲ್ಲಿ ತಾಪಮಾನ 50.8 ಡಿಗ್ರಿ ಸೆಲ್ಸಿಯಸ್​ ತಾಪಮಾನ ದಾಖಲಾಗಿದೆ. ರಾಜಸ್ತಾನದ ಇತಿಹಾಸದಲ್ಲಿ ಇದು ಹೊಸ ದಾಖಲೆಯಾಗಿದ್ದು, ಈ ಹಿಂದೆ ಅಂದರೆ 2016ರ ಮೇ 19ರಂದು ಚುರುನಲ್ಲಿ ಶನಿವಾರ 50.2 ಡಿಗ್ರಿ ಸೆಲ್ಸಿಯಸ್​ ತಾಪಮಾನ ದಾಖಲಾಗಿತ್ತು. ಇದು ಈವರೆಗಿನ ದಾಖಲೆಯಾಗಿತ್ತು. ಆದರೆ ಇಂದು ಅದನ್ನೂ ಮೀರಿದ ಉಷ್ಣಾಂಶ ದಾಖಲಾಗಿದೆ.

ಈ ಬಗ್ಗೆ ಮಾಹಿತಿ ನೀಡಿರುವ ಹವಾಮಾನ ಇಲಾಖೆ ಅಧಿಕಾರಿಗಳು, ‘ಪಶ್ಚಿಮ ರಾಜಸ್ಥಾನ ಮತ್ತು ಪೂರ್ವ ರಾಜಸ್ಥಾನದಲ್ಲಿ ಮುಂದಿನ 5 ದಿನ ಕಟ್ಟೆಚ್ಚರದಿಂದ ಇರುವಂತೆ ತಿಳಿಸಿದ್ದಾರೆ. ಅಂತೆಯೇ ಪಶ್ಚಿಮ ರಾಜಸ್ಥಾನದ ಜೈಸಲ್ಮೇರ್​, ಬಾರ್ಮರ್​, ನಾಗೌರ್​, ಬಿಕನೇರ್​, ಹನುಮಾನ್ ​ಗಢ, ಚುರು, ಜೋಧ್ ​ಪುರ್​, ಜಾಲೋರ್​, ಅಜ್ಮೀರ್​, ಅಳ್ವಾರ್​, ಭರತ್​ಪುರ್​, ಬರಾನ್​, ಬುಂಡಿ, ದೌಸಾ, ಢೋಲ್​ಪುರ್​, ಜೈಪುರ್​, ಚಿತ್ತೋರ್ ಘಡ, ಜಲ್ವಾರ್​, ಜುಂಜುನು, ಕರೌಲಿ, ಕೋಟ, ಶಿಖರ್​, ಸವಾಯ್​ ಮಾಧೋಪುರ್, ಟೋಂಕ್ ಮತ್ತು ಪಾಲಿಯಲ್ಲಿ ಜೂ.4ರವರೆಗೆ ಒಣಹವೆ ಮುಂದುವರಿಯಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.