ಶುಭ ಸುದ್ದಿ: ಒಮಾನ್ ಮೂಲಕ ಸ್ವದೇಶಕ್ಕೆ ಮರಳಲು ಅವಕಾಶ- ಶಾರ್ಜಾದಿಂದ ಮಸ್ಕತ್‌ಗೆ ಬಸ್ ಸಂಚಾರ ಆರಂಭ

ಶಾರ್ಜಾ/ಮಸ್ಕತ್: ಗಲ್ಫ್ ರಾಷ್ಟ್ರಗಳಲ್ಲಿನ ಪ್ರಚಲಿತ ಸಂಘರ್ಷದ ಪರಿಸ್ಥಿತಿಯ ನಡುವೆಯೂ ಅನಿವಾಸಿ ಭಾರತೀಯರಿಗೆ ನಿಮ್ಮಳ ನೀಡುವ ಸುದ್ದಿ ಹೊರಬಿದ್ದಿದೆ. ಯುಎಇಯಿಂದ ಒಮಾನ್ ದೇಶಕ್ಕೆ ಬಸ್ ಸೇವೆಗಳನ್ನು ಆರಂಭಿಸಲಾಗಿದ್ದು, ಪ್ರಯಾಣಿಕರು ಇನ್ನು ಮುಂದೆ ಒಮಾನ್ ಮೂಲಕ ಸಂಚರಿಸಲು ಹಾದಿ ಸುಗಮವಾಗಿದೆ.

ಬಸ್ ಸೇವೆ ಮತ್ತು ಪ್ರಯಾಣದ ಹಾದಿ

ಶಾರ್ಜಾದಿಂದ ಒಮಾನ್‌ನ ಮಸ್ಕತ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ನೇರ ಬಸ್ ಸಂಚಾರವನ್ನು ಆರಂಭಿಸಲಾಗಿದೆ. ಯುಎಇಯಿಂದ ನೇರವಾಗಿ ಭಾರತಕ್ಕೆ ತೆರಳಲು ತೊಂದರೆ ಅನುಭವಿಸುತ್ತಿರುವ ಪ್ರವಾಸಿಗರು ಈಗ ಒಮಾನ್ ತಲುಪಿ ಅಲ್ಲಿಂದ ಸ್ವದೇಶಕ್ಕೆ ಪ್ರಯಾಣ ಬೆಳೆಸಬಹುದಾಗಿದೆ.

ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ವಿಮಾನಗಳ ಪುನಾರಂಭ

ಒಮಾನ್‌ನಿಂದ ಭಾರತದ ವಿವಿಧ ನಗರಗಳಿಗೆ ಸ್ಥಗಿತಗೊಂಡಿದ್ದ ವಿಮಾನ ಸಂಚಾರವನ್ನು ನಾಳೆಯಿಂದ (ಮಾರ್ಚ್ 3) ಪುನಾರಂಭಿಸುವುದಾಗಿ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ಘೋಷಿಸಿದೆ. ಮಸ್ಕತ್‌ನಿಂದ ಭಾರತದ ಈ ಕೆಳಗಿನ ಆರು ಪ್ರಮುಖ ನಗರಗಳಿಗೆ ವಿಮಾನಗಳು ಹಾರಾಟ ನಡೆಸಲಿವೆ:

• ಕೊಚ್ಚಿ, ಕೋಝಿಕ್ಕೋಡ್, ಮಂಗಳೂರು, ದೆಹಲಿ, ಮುಂಬೈ ಮತ್ತು ತಿರುಚಿರಾಪಳ್ಳಿ

ವಿಮಾನ ನಿಷೇಧ ಮತ್ತು ಸಡಿಲಿಕೆ

ಯುಎಇ, ಸೌದಿ ಅರೇಬಿಯಾ, ಖತಾರ್, ಕುವೈತ್ ಮತ್ತು ಬಹ್ರೈನ್ ದೇಶಗಳಿಗೆ ವಿಧಿಸಲಾಗಿರುವ ವಿಮಾನ ನಿಷೇಧವು ಮಾರ್ಚ್ 3ರ ಮಧ್ಯರಾತ್ರಿಯವರೆಗೆ ಮುಂದುವರಿಯಲಿದೆ. ಪ್ರಸ್ತುತ ತುರ್ತು ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು, ವಿಮಾನ ಪ್ರಯಾಣ ರದ್ದುಗೊಳಿಸುವವರಿಗೆ ಅಥವಾ ಸಮಯ ಬದಲಾವಣೆ ಮಾಡುವವರಿಗೆ ದಂಡವಿಲ್ಲದೆ ವಿಶೇಷ ರಿಯಾಯಿತಿಗಳನ್ನು ನೀಡುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.