ಸೌದಿ: ಕಾರ್ಮಿಕರ ಬಹುನಿರೀಕ್ಷಿತ ಉದ್ಯೋಗ ಕಾನೂನು- ಮಾ. 14 ರಿಂದ ಜಾರಿ

ರಿಯಾದ್: ಸೌದಿ ಕಾರ್ಮಿಕರ ಬಹುನಿರೀಕ್ಷಿತ ಪರಿಷ್ಕೃತ ಉದ್ಯೋಗ ಕಾನೂನುಗಳು ಮಾರ್ಚ್ 14 ರ ಭಾನುವಾರದಿಂದ ಜಾರಿಗೆ ಬರಲಿವೆ. ನವೆಂಬರ್ 4 ರಂದು ಸೌದಿ ಮಾನವ ಸಂಪನ್ಮೂಲ ಅಭಿವೃದ್ಧಿ ಸಚಿವಾಲಯ ಈ ಘೋಷಣೆ ಮಾಡಿದೆ.

ಕಾರ್ಮಿಕ ವಿವಾದಗಳನ್ನು ತೊಡೆದುಹಾಕಲು ಹಾಗೂ ಉದ್ಯೋಗದಾತ ಮತ್ತು ಉದ್ಯೋಗಿಗಳ ನಡುವಿನ ಒಪ್ಪಂದದ ಸಂಬಂಧವನ್ನು ಸುಧಾರಿಸುವ ನಿಟ್ಟಿನಲ್ಲಿ ಈ ಯೋಜನೆಯನ್ನು ಕಾರ್ಯಗತಗೊಳಿಸಲಾಗುತ್ತಿದೆ.

ಈ ಯೋಜನೆಯು ಖಾಸಗಿ ವಲಯದಲ್ಲಿ ಕೆಲಸ ಮಾಡುವ ಎಲ್ಲಾ ವಿದೇಶಿ ಕಾರ್ಮಿಕರಿಗೂ ಅನ್ವಯ. ಆದರೆ ಈ ಬದಲಾವಣೆ ಗೃಹ ಕಾರ್ಮಿಕರಿಗೆ ಅನ್ವಯಿಸುವುದಿಲ್ಲ. ಅಬ್ಷೀರ್ ಮತ್ತು ಖಿವಾ ಮುಂತಾದ ಪೋರ್ಟಲ್‌ಗಳ ಮೂಲಕ ಈ ಸೇವೆ ಲಭ್ಯವಿದೆ.

ಪರಿಷ್ಕೃತ ಕಾನೂನಿನ ಪ್ರಯೋಜನ

• ಕಾರ್ಮಿಕ ಮತ್ತು ಉದ್ಯೋಗದಾತ ನಡುವೆ ಸಹಿ ಮಾಡಿದ ಒಪ್ಪಂದದ ಆಧಾರದ ಮೇಲೆ ಕಾರ್ಮಿಕ ವಿವಾದಗಳಿಗೆ ಸಂಬಂಧಿಸಿದ ತೀರ್ಪು ನೀಡಲಾಗುತ್ತದೆ.

• ಒಪ್ಪಂದದ ಅವಧಿ ಮುಗಿದ ನಂತರ ಉದ್ಯೋಗಿಯು ಉದ್ಯೋಗದಾತರ ಒಪ್ಪಿಗೆಯಿಲ್ಲದೆ ಉದ್ಯೋಗಗಳನ್ನು ಬದಲಾಯಿಸಲು ಮತ್ತು ಪ್ರಾಯೋಜಕತ್ವವನ್ನು ಬದಲಾಯಿಸಲು ಅನುಮತಿಸಲಾಗುವುದು.

• ಒಪ್ಪಂದದ ಅವಧಿಯೊಳಗೆ ಕೆಲಸಗಾರನು ಉದ್ಯೋಗವನ್ನು ಬದಲಾಯಿಸಲು ಬಯಸಿದರೆ, ಉದ್ಯೋಗದಾತರಿಗೆ 90 ದಿನಗಳ ಮುಂಚಿತವಾಗಿ ನೋಟಿಸ್ ನೀಡಬೇಕು. ಆದರೆ ಈ ರೀತಿಯಾಗಿ ಸೇವೆಯನ್ನು ಕೊನೆಗೊಳಿಸಿದರೆ, ಉದ್ಯೋಗದಾತರಿಗೆ ಪರಿಹಾರವನ್ನು ಪಾವತಿಸಲು ಕೆಲಸಗಾರನು ಜವಾಬ್ದಾರನಾಗಿರುತ್ತಾನೆ.

• ಒಪ್ಪಂದದ ಅವಧಿ ಮುಗಿಯುವ ಮೊದಲು ನೌಕರನನ್ನು ವಜಾ ಮಾಡಿದರೆ ಉದ್ಯೋಗದಾತನು ಕೆಲಸಗಾರನಿಗೆ ಪರಿಹಾರವನ್ನು ಪಾವತಿಸಬೇಕಾಗುತ್ತದೆ.

• ಉದ್ಯೋಗದಾತ ಮತ್ತು ಉದ್ಯೋಗಿ ನಡುವಿನ ಒಪ್ಪಂದದ ಸೇವೆ ಕೊನೆಗೊಂಡಲ್ಲಿ, ಕೆಲಸಗಾರನು ತನ್ನದೇ ಆದ ನಿರ್ಗಮನ ಮತ್ತು ಮರು-ಪ್ರವೇಶ ವೀಸಾಗಳನ್ನು ಪಡೆದುಕೊಂಡು ಮನೆಗೆ ಮರಳಬಹುದು. ಇದಕ್ಕೆ ಪ್ರಾಯೋಜಕರ ಅನುಮತಿ ಅಗತ್ಯವಿಲ್ಲ.

ಆದಾಗ್ಯೂ, ಕೆಲಸಗಾರನು ದೇಶವನ್ನು ತೊರೆದಾಗ, ಪ್ರಾಯೋಜಕರಿಗೆ ವಿದ್ಯುನ್ಮಾನವಾಗಿ ಸಂದೇಶ ಲಭಿಸಲಿದೆ.