ಸರ್ಕಾರದ ಸುತ್ತೋಲೆಗಳು ಒಂದೇ ಧರ್ಮಕ್ಕೆ ಸೀಮಿತಗೊಳ್ಳದಿರಲಿ- ಬಿ.ಎಂ.ಫಾರೂಕ್

ಮಂಗಳೂರು : ರಾಜ್ಯದ ಗೃಹ ಸಚಿವರೊಂದಿಗೆ ಮಂಗಳೂರಿನ ಜಿಲ್ಲಾಧಿಕಾರಿ ಕಚೇರಿಯಲ್ಲಿ ಮುಸ್ಲಿಂ ಸಮುದಾಯದ ಮುಖಂಡರ ಜೊತೆ ವೀಡಿಯೋ ಕಾನ್ಫರೆನ್ಸ್ ನಡೆಸಲಾಯಿತು.

ಈ ಸಂದರ್ಭದಲ್ಲಿ ಎಂಎಲ್ಸಿ ಬಿ.ಎಂ ಫಾರೂಕುರವರು ವಿವಿಧ ಅಭಿಪ್ರಾಯಗಳನ್ನು ಮುಂದಿರಿಸಿದರು. ವಕ್ಫ್ ಇಲಾಖೆಯಿಂದ ಹೊರಡಿಸಿದ ಸುತ್ತೋಲೆಯಲ್ಲಿ ಮಸೀದಿಯ ಆಝಾನ್ ನ ಶಬ್ದ ಕಡಿಮೆಗೊಳಿಸಬೇಕೆಂದು ಹೇಳಿರುವುದು ಖಂಡನೀಯ.

ಮುಸ್ಲಿಮರ ಪವಿತ್ರ ತಿಂಗಳಾದ ರಂಝಾನ್ ಪ್ರತಿಯೊಬ್ಬ ಮುಸ್ಲಿಮನಿಗೂ ಅತ್ಯಂತ ಶ್ರೇಷ್ಠ ತಿಂಗಳಾಗಿದ್ದು, ಕೊರೋನ ಹಿನ್ನಲೆಯಲ್ಲಿ ಎಲ್ಲಾ ಮಸೀದಿಗಳೂ ಕೂಡ ಮುಚ್ಚಲ್ಪಟ್ಟಿದೆ. ಇದೀಗ ಅಝಾನ್ ಶಬ್ದವನ್ನೂ ಕಡಿಮೆಗೊಳಿಸಬೇಕೆಂದು ಹೇಳುವುದರಲ್ಲಿ ಅರ್ಥವಿಲ್ಲವೆಂದು ಹೇಳಿದ ಅವರು ಕೇವಲ ಮುಸ್ಲಿಮರ ಹಬ್ಬಗಳಿಗೆ ಮಾತ್ರ ಇಂತಹ ಸುತ್ತೋಲೆಗಳನ್ನು ಹೊರಡಿಸುವುದು ಖಂಡನೀಯ ಎಂದು ಹೇಳಿದರು.

ರಾಜ್ಯದ ಆಶ್ರಮ, ಮಸೀದಿ ಮುಂತಾದ ಕಡೆ ಹಸಿದವರಿಗೆ ಅನ್ನ ನೀಡುತ್ತಿದ್ದು, ಇದು ಶ್ಲಾಘನೀಯ ಇದನ್ನು ನಿಲ್ಲಿಸಿದರೆ ಅದೆಷ್ಟೋ ಬಡ, ನಿರ್ಗತಿಕರು ಹಸಿವಿನಿಂದ ಸಾವೀಗೀಡಾಗಬಹುದು. ಆದ್ದರಿಂದ ಇದನ್ನು ರದ್ದುಗೊಳಿಸದೆ ಸಾಮಾಜಿಕ ಅಂತರವನ್ನು ಕಾಯ್ದುಕೊಂಡು ಯಥಾಸ್ಥಿತಿಯಲ್ಲಿ ಮುಂದುವರಿಯಲು ಅನುವು ಮಾಡಿಕೊಡಬೇಕೆಂದು ಅವರು ವಿನಂತಿಸಿದರು.
ಈ ಸಂದರ್ಭದಲ್ಲಿ ಮಾಜಿ ಸಚಿವರಾದ ಯು.ಟಿ ಖಾದರ್, ರಾಜ್ಯ ವಕ್ಫ್ ಬೋರ್ಡ್ ಸಲಹಾ ಸಮಿತಿ ಸದಸ್ಯ ಮೌಲಾನ ಶಾಫಿ ಸ ಅದಿ ಬೆಂಗಳೂರು, ಮುಸ್ಲಿಂ ಸೆಂಟ್ರಲ್ ಕಮಿಟಿ ಅಧ್ಯಕ್ಷ ಹಾಜಿ ಮಸೂದ್ ಅಹ್ಮದ್, ಕರ್ನಾಟಕ ಮುಸ್ಲಿಂ ಜಮಾಅತ್ ಜಿಲ್ಲಾಧ್ಯಕ್ಷ ಯೆನಪೋಯ ಅಬ್ದುಲ್ಲ ಕುಂಞಿ, ಕಾರ್ಯಾಧ್ಯಕ್ಷ ಎಸ್.ಎಂ. ಆರ್ ರಶೀದ್ ಹಾಜಿ, ಪ್ರಧಾನ ಕಾರ್ಯದರ್ಶಿ ಮುಮ್ತಾಝ್ ಅಲಿ, ಸಲಫಿ ಮೂವ್ಮೆಂಟ್ ನ ಹಾಜಿ ಅಬ್ದುಲ್ ರಝಾಕ್, ಜಮಾಅತೆ ಇಸ್ಲಾಮಿಯ ಮಹಮ್ಮದ್ ಕುಂಞಿ, ಮಾಜಿ ಶಾಸಕ ಮೊಯ್ದೀನ್ ಬಾವ, ಮುಸ್ಲಿಂ ಸೆಂಟ್ರಲ್ ಕಮಿಟಿ ನಾಯಕರಾದ ಮಸೂದ್ ಕೋಡಿಜಾಲ್, ಹನೀಫ್ ಹಾಜಿ, ಕಾಂಗ್ರೆಸ್ ಮುಖಂಡರಾದ ಇಬ್ರಾಹಿಂ ಕೋಡಿಜಾಲ್, ಜಿಲ್ಲಾಧಿಕಾರಿ ಸಿಂಧೂ ರೂಪೇಶ್, ಜಿಲ್ಲಾ ಪೋಲೀಸ್ ಅಧಿಕಾರಿ ಬಿ.ಎಂ ಲಕ್ಷ್ಮೀಪ್ರಸಾದ್, ಪೋಲೀಸ್ ಕಮಿಷನರ್ ಹರ್ಷ ಸಹಿತ ಮುಸ್ಲಿಂ ಸಮುದಾಯದ ಹಲವು ನಾಯಕರು ಭಾಗವಹಿಸಿದ್ದರು.