ಸೌದಿ: ‘ಏಕೀಕೃತ ರಾಷ್ಟ್ರೀಯ ವೀಸಾ ಪ್ಲಾಟ್‌ಫಾರ್ಮ್’ ಅನುಷ್ಠಾನಕ್ಕೆ- ವೀಸಾ ಪ್ರಕ್ರಿಯೆಗಳು ಇನ್ನಷ್ಟು ಸುಲಭ

ರಿಯಾದ್: ಸೌದಿ ಅರೇಬಿಯಾಕ್ಕೆ ಸಂಬಂಧಿಸಿದ ವೀಸಾ ಪ್ರಕ್ರಿಯೆಗಳನ್ನು ಇನ್ನಷ್ಟು ಸರಳ ಹಾಗೂ ದಕ್ಷಗೊಳಿಸಲು ವಿದೇಶಾಂಗ ಸಚಿವಾಲಯದ ಅಡಿಯಲ್ಲಿ ‘ಏಕೀಕೃತ ರಾಷ್ಟ್ರೀಯ ವೀಸಾ ಪ್ಲಾಟ್‌ಫಾರ್ಮ್’ (Unified National Visa Platform) ಅನ್ನು ಸ್ಥಾಪಿಸಲು ಸೌದಿ ಸಚಿವ ಸಂಪುಟ ನಿರ್ಧರಿಸಿದೆ. ಜಿದ್ದಾದ ಅಲ್ ಸಲಾಮ್ ಅರಮನೆಯಲ್ಲಿ ಕ್ರೌನ್ ಪ್ರಿನ್ಸ್ ಮತ್ತು ಪ್ರಧಾನ ಮಂತ್ರಿ ಅಮೀ‌ರ್ ಮೊಹಮ್ಮದ್ ಬಿನ್ ಸಲ್ಮಾನ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಈ ಮಹತ್ವದ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ.

ಸೌದಿ ವಿಷನ್ 2030ರ ಭಾಗವಾಗಿ ದೇಶವು ಜಾರಿಗೆ ತರುತ್ತಿರುವ ಡಿಜಿಟಲ್ ರೂಪಾಂತರದ (Digital transformation) ಇತ್ತೀಚಿನ ಹೆಜ್ಜೆ ಈ ಹೊಸ ಪ್ಲಾಟ್‌ಫಾರ್ಮ್ ಆಗಿದೆ. ವಿದೇಶಾಂಗ ಸಚಿವಾಲಯ, ಆಂತರಿಕ ಸಚಿವಾಲಯ, ಮಾನವ ಸಂಪನ್ಮೂಲ ಮತ್ತು ಸಾಮಾಜಿಕ ಅಭಿವೃದ್ಧಿ ಸಚಿವಾಲಯ ಸೇರಿದಂತೆ ವಿವಿಧ ಸರ್ಕಾರಿ ಇಲಾಖೆಗಳನ್ನು ಒಂದೇ ಡಿಜಿಟಲ್ ನೆಟ್‌ವರ್ಕ್‌ಗೆ ಜೋಡಿಸುವ ಮೂಲಕ ಈ ಹೊಸ ವ್ಯವಸ್ಥೆಯನ್ನು ಸಿದ್ಧಪಡಿಸಲಾಗುತ್ತಿದೆ.

ಇದರೊಂದಿಗೆ ಇನ್ಮುಂದೆ ಉದ್ಯೋಗ ವೀಸಾ (Employment visas), ಸಂದರ್ಶಕರ ವೀಸಾ (Visitor visas), ಉಮ್ರಾ ವೀಸಾ ಮತ್ತು ಪ್ರವಾಸಿ ವೀಸಾಗಳ (Tourist visas) ಅರ್ಜಿಗಳನ್ನು ಹೆಚ್ಚು ವೇಗವಾಗಿ ಮತ್ತು ಪಾರದರ್ಶಕವಾಗಿ ನಿರ್ವಹಿಸಲು ಸಾಧ್ಯವಾಗುತ್ತದೆ. ವೀಸಾ ಅರ್ಜಿದಾರರು ತಮ್ಮ ಮಾಹಿತಿಗಳನ್ನು ಸಲ್ಲಿಸಲು, ಶುಲ್ಕ ಪಾವತಿಸಲು ಮತ್ತು ವೀಸಾದ ಪ್ರಸ್ತುತ ಸ್ಥಿತಿಯನ್ನು (Visa status) ಪರಿಶೀಲಿಸಲು ಕೇವಲ ಒಂದೇ ಒಂದು ಪೋರ್ಟಲ್ ಅನ್ನು ಅವಲಂಬಿಸಿದರೆ ಸಾಕಾಗುತ್ತದೆ.

ಹೊಸ ಏಕೀಕೃತ ವೀಸಾ ಪ್ಲಾಟ್‌ಫಾರ್ಮ್ ಕಾರ್ಯರೂಪಕ್ಕೆ ಬರುವುದರಿಂದ ಭಾರತ ಸೇರಿದಂತೆ ವಿವಿಧ ದೇಶಗಳ ಲಕ್ಷಾಂತರ ಅನಿವಾಸಿಗಳು ಹಾಗೂ ಸಂದರ್ಶಕರಿಗೆ ಬಲು ದೊಡ್ಡ ಸಹಕಾರಿಯಾಗಲಿದೆ. ಇದು ವೀಸಾ ಪ್ರಕ್ರಿಯೆಗಳಲ್ಲಿ ಉಂಟಾಗುವ ವಿಳಂಬ ಮತ್ತು ಮಧ್ಯವರ್ತಿಗಳ ಶೋಷಣೆಯನ್ನು ತಡೆಯಲು ಸಹಾಯ ಮಾಡುತ್ತದೆ. ಹಾಗೆಯೇ, ಪ್ರವಾಸೋದ್ಯಮ ಮತ್ತು ಉಮ್ರಾ ತೀರ್ಥಯಾತ್ರೆಗಾಗಿ ಸೌದಿಗೆ ಭೇಟಿ ನೀಡುವವರಿಗೆ ಹೆಚ್ಚು ಸುಗಮವಾದ ಪ್ರಯಾಣಕ್ಕೆ ಈ ಹೊಸ ವ್ಯವಸ್ಥೆಯು ದಾರಿಯಾಗಲಿದೆ ಎಂದು ಅಂದಾಜಿಸಲಾಗಿದೆ.