ಏರ್ ಇಂಡಿಯಾ ಎಕ್ಸ್‌ಪ್ರೆಸ್‌: ಹೆಚ್ಚಿನ ವಿಮಾನ ಸೇವೆಗಳ ಪುನರಾರಂಭ

ದುಬೈ: ಗಲ್ಫ್ ರಾಷ್ಟ್ರಗಳಿಗೆ ತೆರಳುವ ಪ್ರಯಾಣಿಕರಿಗೆ ಅನುಕೂಲವಾಗುವಂತೆ ಏರ್ ಇಂಡಿಯಾ ಎಕ್ಸ್‌ಪ್ರೆಸ್ ತನ್ನ ವಿಮಾನ ಸೇವೆಗಳನ್ನು ಹಂತಹಂತವಾಗಿ ವಿಸ್ತರಿಸುತ್ತಿದೆ. ಇಂದಿನಿಂದ ಗಲ್ಫ್ ವಲಯಕ್ಕೆ ಪ್ರತಿದಿನ 40ಕ್ಕೂ ಹೆಚ್ಚು ವಿಮಾನಗಳು ಸಂಚರಿಸಲಿವೆ ಎಂದು ಸಂಸ್ಥೆಯು ಪ್ರಕಟಿಸಿದೆ.
ಮಂಗಳೂರು, ಬೆಂಗಳೂರು ಹಾಗೂ ಕೇರಳದ ನಾಲ್ಕು ಪ್ರಮುಖ ವಿಮಾನ ನಿಲ್ದಾಣಗಳು ಸೇರಿದಂತೆ ಭಾರತದ ವಿವಿಧ ನಗರಗಳಿಂದ ಕತಾರ್, ಬಹ್ರೇನ್, ಯುಎಇ, ಒಮಾನ್ ಮತ್ತು ಸೌದಿ ಅರೇಬಿಯಾಕ್ಕೆ ವಿಮಾನ ಸೇವೆಗಳನ್ನು ಪುನರಾರಂಭಿಸಲಾಗಿದೆ.

ಕಳೆದ ಕೆಲವು ದಿನಗಳಿಂದ ಉಂಟಾಗಿದ್ದ ವಿಮಾನ ರದ್ದತಿ ಮತ್ತು ವಿಳಂಬದಿಂದ ತೊಂದರೆಗೀಡಾಗಿದ್ದ ಸಾವಿರಾರು ಅನಿವಾಸಿ ಭಾರತೀಯರಿಗೆ ಈ ನಿರ್ಧಾರವು ದೊಡ್ಡ ಸಮಾಧಾನ ತಂದಿದೆ.

ವಿವಿಧ ನಗರಗಳ ನಡುವಿನ ಸಂಚಾರದ ವಿವರ:

• ದುಬೈ: ಕಣ್ಣೂರು, ತಿರುಚಿರಾಪಳ್ಳಿ, ಮಂಗಳೂರು ಮತ್ತು ಲಕ್ನೋ ನಗರಗಳಿಂದ ದುಬೈಗೆ ವಿಮಾನಗಳು ಸಂಚರಿಸಲಿವೆ.

• ಅಬುಧಾಬಿ: ಕೊಚ್ಚಿ, ಕೋಯಿಕ್ಕೋಡ್, ಮಂಗಳೂರು, ಮುಂಬೈ ಮತ್ತು ದೆಹಲಿಯಿಂದ ಅಬುಧಾಬಿ ಸೇವೆ ಲಭ್ಯವಿದೆ.
• ಶಾರ್ಜಾ: ಕಣ್ಣೂರು, ಕೋಯಿಕ್ಕೋಡ್, ಅಮೃತಸರ, ಜೈಪುರ ಮತ್ತು ವಾರಣಾಸಿಯಿಂದ ಶಾರ್ಜಾಕ್ಕೆ ವಿಮಾನಗಳು ಹಾರಲಿವೆ.
• ರಾಸ್ ಅಲ್ ಖೈಮಾ ಮತ್ತು ಅಲ್ ಐನ್: ರಾಸ್ ಅಲ್ ಖೈಮಾಕ್ಕೆ ಕೊಚ್ಚಿ ಮತ್ತು ಕೋಯಿಕ್ಕೋಡ್‌ನಿಂದ ಸೇವೆ ಇದ್ದರೆ, ಇಂದಿನಿಂದ ಕೋಯಿಕ್ಕೋಡ್‌ನಿಂದ ಅಲ್ ಐನ್‌ಗೆ ವಿಮಾನ ಸಂಚಾರ ಆರಂಭವಾಗಲಿದೆ.
• ಒಮಾನ್ (ಮಸ್ಕತ್): ಕಣ್ಣೂರು, ತಿರುವನಂತಪುರಂ, ಮುಂಬೈ ಮತ್ತು ದೆಹಲಿಯಿಂದ ಮಸ್ಕತ್‌ಗೆ ವಿಮಾನಗಳು ಲಭ್ಯವಿವೆ.
• ಸೌದಿ ಅರೇಬಿಯಾ, ಜಿದ್ದಾ: ಕೋಯಿಕ್ಕೋಡ್, ಮಂಗಳೂರು, ಬೆಂಗಳೂರು ಮತ್ತು ಹೈದರಾಬಾದ್‌ನಿಂದ ಸೇವೆ ಪುನರಾರಂಭಗೊಂಡಿದೆ.
• ರಿಯಾದ್: ಕಣ್ಣೂರು ಮತ್ತು ಕೊಚ್ಚಿಯಿಂದ ರಿಯಾದ್‌ಗೆ ವಿಮಾನಗಳು ಸಂಚರಿಸಲಿವೆ.
• ದಮ್ಮಾಮ್: ಕೊಚ್ಚಿ, ಕೋಯಿಕ್ಕೋಡ್ ಮತ್ತು ಮಂಗಳೂರಿನಿಂದ ವಿಮಾನ ಸೇವೆ ಆರಂಭವಾಗಿದೆ.
• ಕತಾರ್ (ದೋಹಾ): ಕೊಚ್ಚಿ ಮತ್ತು ಕೋಯಿಕ್ಕೋಡ್‌ನಿಂದ ದೋಹಾಕ್ಕೆ ಇಂದಿನಿಂದಲೇ ವಿಮಾನ ಸಂಚಾರ ಪುನರಾರಂಭಗೊಂಡಿದೆ ಎಂದು ಸಂಸ್ಥೆ ತಿಳಿಸಿದೆ.