ಇಸ್ರೇಲ್‌ಗೆ ಬೇಹುಗಾರಿಕೆ ಆರೋಪ: ಭಾರತೀಯ ಎಂಜಿನಿಯರ್ ಬಂಧನ ಎಂಬುದು ಸುಳ್ಳು ಸುದ್ದಿ

ಮನಾಮ (ಬಹ್ರೇನ್): ಇರಾನ್‌ನ ಇತ್ತೀಚಿನ ದಾಳಿಗಳಿಗೆ ಸಂಬಂಧಿಸಿದ ವಿಡಿಯೋಗಳನ್ನು ಚಿತ್ರೀಕರಿಸಿದ ಮತ್ತು ಹಂಚಿಕೊಂಡ ಆರೋಪದ ಮೇಲೆ ಬಹ್ರೇನ್ ಸರ್ಕಾರವು ಆರು ಮಂದಿ ಏಷ್ಯನ್ ಪ್ರಜೆಗಳನ್ನು ಮಂಗಳವಾರ ಬಂಧಿಸಿದೆ. ಈ ನಡುವೆ, ಬಂಧಿತರಲ್ಲಿ ನಿತಿನ್ ಮೋಹನ್ ಎಂಬ ಭಾರತೀಯ ಮೂಲದ ಟೆಲಿಕಾಂ ಎಂಜಿನಿಯರ್ ಕೂಡ ಸೇರಿದ್ದಾರೆ ಎನ್ನಲಾದ ಸುದ್ದಿಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.

ಆದರೆ, ಇದು ಸುಳ್ಳು ಸುದ್ದಿಯಾಗಿದೆ ಎಂದು ಫಾಕ್ಟ್ ಚೆಕ್ ಮೂಲಕ ಪತ್ತೆ ಹಚ್ಚಲಾಗಿದೆ ಎಂದು ಇಂಡಿಯಾ ಟುಡೇ ವರದಿ ಮಾಡಿದೆ.

ವದಂತಿಯ ಹಿನ್ನೆಲೆ:

ಪ್ರಸ್ತುತ ಭಾರತದಲ್ಲಿ ನಿರ್ಬಂಧಕ್ಕೊಳಗಾಗಿರುವ ಪಾಕಿಸ್ತಾನ ಮೂಲದ ‘X’ (ಟ್ವಿಟರ್) ಖಾತೆಯೊಂದು ಈ ಬಗ್ಗೆ ಪೋಸ್ಟ್ ಮಾಡಿದ್ದು, “ಬಹ್ರೇನ್ ಅಧಿಕಾರಿಗಳು ಇಸ್ರೇಲ್ ಗುಪ್ತಚರ ಸಂಸ್ಥೆಗೆ ಮಾಹಿತಿ ಸೋರಿಕೆ ಮಾಡಿದ ಆರೋಪದ ಮೇಲೆ ಭಾರತೀಯ ಪ್ರಜೆ ನಿತಿನ್ ಮೋಹನ್ ಎಂಬುವವರನ್ನು ಬಂಧಿಸಿದ್ದಾರೆ” ಎಂದು ಪ್ರತಿಪಾದಿಸಿರುವುದಾಗಿ ಇಂಡಿಯಾ ಟುಡೇ ತಿಳಿಸಿದೆ. .

ಆರೋಪಗಳೇನು?

ವೈರಲ್ ಆಗಿರುವ ವರದಿಯ ಪ್ರಕಾರ:

• ಬಂಧಿತ ವ್ಯಕ್ತಿಯು ಬಹ್ರೇನ್‌ನ ಪ್ರಮುಖ ಸ್ಥಳಗಳ ಸೂಕ್ಷ್ಮ ಭೂ-ವೈಜ್ಞಾನಿಕ ದತ್ತಾಂಶ (Geospatial data), ಫೋಟೋಗಳು ಮತ್ತು ವಿಡಿಯೋಗಳನ್ನು ಸಂಗ್ರಹಿಸುತ್ತಿದ್ದ ಎನ್ನಲಾಗಿದೆ.
• ಈ ಮಾಹಿತಿಯನ್ನು ಇಸ್ರೇಲ್‌ನ ಗುಪ್ತಚರ ಸಂಸ್ಥೆಗೆ ರವಾನಿಸುತ್ತಿದ್ದ ಎಂಬ ಗಂಭೀರ ಆರೋಪವನ್ನು ಹೊರಿಸಲಾಗಿದೆ.

ನಿಜಾಂಶವೇನು?

ಬಹ್ರೇನ್ ಸರ್ಕಾರವು ಆರು ಮಂದಿ ಏಷ್ಯನ್ ಪ್ರಜೆಗಳನ್ನು ಬಂಧಿಸಿರುವುದನ್ನು ಅಧಿಕೃತವಾಗಿ ಖಚಿತಪಡಿಸಿದ್ದರೂ, ಬಂಧಿತರ ಪೂರ್ಣ ವಿವರ ಅಥವಾ ಅವರು ಯಾವ ದೇಶದವರು ಎಂಬ ಬಗ್ಗೆ ಸ್ಪಷ್ಟ ಮಾಹಿತಿಯನ್ನು ಇನ್ನು ಬಹಿರಂಗಪಡಿಸಿಲ್ಲ. ಈ ನಡುವೆ ನಿತಿನ್ ಮೋಹನ್ ಎಂಬುವವರ ಫೋಟೋ ಹರಿದಾಡುತ್ತಿದ್ದು, ಇದು ಸಾಮಾಜಿಕ ಜಾಲತಾಣಗಳಲ್ಲಿ ಪರ-ವಿರೋಧದ ಚರ್ಚೆಗೆ ನಾಂದಿ ಹಾಡಿದೆ.