ಖಾಸಗಿತನ ಉಲ್ಲಂಘನೆ: ಗಂಡನ ಮೊಬೈಲ್ ಕದ್ದು ನೋಡಿದ ಯುವತಿ ವಿರುದ್ದ ದೂರು

ರಾಸಲ್ ಖೈಮ: ಅನೈತಿಕ ಸಂಬಂಧ ಕುರಿತು ತಿಳಿಯಲು ಗಂಡನ ಮೊಬೈಲ್ ಕದ್ದು ನೋಡಿದ ಯುವತಿಯ ವಿರುದ್ದ ಪ್ರಕರಣ ದಾಖಲಿಸಲಾಗಿದೆ. ಅನುಮತಿ ಪಡೆಯದೆ ಮೊಬೈಲ್ ಪರಿಶೋಧನೆ ಮೂಲಕ ಆಕೆ ಖಾಸಗಿತನವನ್ನು ಉಲ್ಲಂಘನೆ ಮಾಡಿದ್ದಾರೆ ಎಂದು ಗಂಡ ದೂರು ನೀಡಿದ್ದಾರೆ.

ಫೋನ್ ಪರಿಶೋಧನೆ ಮಾಡಿದ ಬಗ್ಗೆ ಹೆಂಡತಿ ನ್ಯಾಯಾಲಯದಲ್ಲಿ ಒಪ್ಪಿಕೊಂಡಿದ್ದಾರೆ. ಆದರೆ ಗಂಡನಿಗೆ ಬೇರೆ ಒಬ್ಬಳು ಮಹಿಳೆಯೊಂದಿಗೆ ಸಂಬಂಧವಿದ್ದು, ಆಕೆಯೊಂದಿಗೆ ಗಂಡ ಯಾವಾಗಲೂ ಮಾತನಾಡುವುದು, ಸಂದೇಶ ಕಳುಹಿಸುವುದು ಮಾಡುತ್ತಾರೆ ಎಂದ ಹೆಂಡತಿ, ಅಜ್ಞಾತಳಾದ ಆ ಮಹಿಳೆಯ ಕುರಿತು ತಿಳಿಯುವ ಸಲುವಾಗಿ ನಾನು ಮೊಬೈಲ್ ತಪಾಸಣೆ ನಡೆಸಿರುವುದಾಗಿ ತಿಳಿಸಿದ್ದಾರೆ.

ಆದರೆ, ಖಾಸಗಿತನ ಉಲ್ಲಘಿಸಿದ ತಪ್ಪಿಗೆ ಫೆಡರಲ್ ಕಾನೂನು ಪ್ರಕಾರ ಆಕೆಗೆ ಶಿಕ್ಷೆ ವಿಧಿಸಬೇಕು ಎಂದು ಪ್ರೊಸಿಕ್ಯೂಷನ್ ವಾದಿಸಿದೆ. ಯುಎಇ ಕಾನೂನಿನ ಪ್ರಕಾರ ಖಾಸಗಿತನದ ಉಲ್ಲಂಘನೆಯು ಬಂದನ, ದಂಡ ಲಭಿಸಬಹುದಾದ ಅಪರಾಧವಾಗಿದೆ. ಅದೇ ವೇಳೆ ದಾಂಪತ್ಯವನ್ನು ಉತ್ತಮರೀತಿಯಲ್ಲಿ ಮುಂದಕ್ಕೆ ಕೊಂಡು ಹೋಗಲು ಪರಿಶ್ರಮ ಪಟ್ಟರೂ ಪತಿಯಾದವನು ಆಕೆಯನ್ನು ವಂಚಿಸಿದ್ದಾನೆ ಎಂದು ಯುವತಿಯ ವಕೀಲ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.