ಅಮೆರಿಕಾ-ಇರಾನ್ ಉದ್ವಿಗ್ನತೆ: ಸಂಘರ್ಷದ ನಡುವೆಯೂ ಮುಂದುವರಿದ ಸಂಧಾನ ಮಾತುಕತೆ

ವಾಷಿಂಗ್ಟನ್: ಉದ್ವಿಗ್ನತೆಯ ನಡುವೆಯೂ ಒಪ್ಪಂದಕ್ಕೆ ಬರಲು ಅಮೆರಿಕಾ ಇರಾನ್ ಜೊತೆ ಸಂವಹನ ಮುಂದುವರಿಸಿದೆ ಎಂದು ಅಮೆರಿಕದ ಮಾಧ್ಯಮ ಸಂಸ್ಥೆ ‘ಆಕ್ಸಿಯೋಸ್’ ವರದಿ ಮಾಡಿದೆ. ಮುಂಬರುವ ದಿನಗಳಲ್ಲಿ ಪಾಕಿಸ್ತಾನ, ಈಜಿಪ್ಟ್ ಮತ್ತು ಟರ್ಕಿಯ ಸಂಧಾನಕಾರರು ಅಮೆರಿಕಾ ಮತ್ತು ಇರಾನ್ ಜೊತೆ ಮಾತುಕತೆ ನಡೆಸಲಿದ್ದಾರೆ ಎಂದು ವರದಿ ತಿಳಿಸಿದೆ.

ಏಪ್ರಿಲ್ 21ಕ್ಕೆ ಕದನ ವಿರಾಮದ ಅವಧಿ ಮುಕ್ತಾಯವಾಗುವ ಮೊದಲು, ಮುಂದಿನ ಹಂತದ ಚರ್ಚೆಗಳಿಗೆ ಪೂರಕವಾಗಿ ಭಿನ್ನಾಭಿಪ್ರಾಯಗಳನ್ನು ಬಗೆಹರಿಸಲು ಸಾಧ್ಯವಾಗುತ್ತದೆ ಎಂದು ಸಂಧಾನಕಾರರು ಆಶಿಸಿದ್ದಾರೆ. ಆದರೆ, ಅಮೆರಿಕದ ನೌಕಾ ದಿಗ್ಬಂಧನವು ಇರಾನ್ ಅನ್ನು ಹಿಮ್ಮೆಟ್ಟಿಸದಿದ್ದರೆ, ಮತ್ತೆ ದಾಳಿಗಳನ್ನು ಆರಂಭಿಸುವ ಬಗ್ಗೆ ಅಧ್ಯಕ್ಷ ಟ್ರಂಪ್ ಆಲೋಚಿಸುತ್ತಿದ್ದಾರೆ ಎಂದು ಅಧಿಕಾರಿಗಳನ್ನು ಉಲ್ಲೇಖಿಸಿ ಆಕ್ಸಿಯೋಸ್ ವರದಿ ಮಾಡಿದೆ.

ಅಮೆರಿಕಾ ಮತ್ತು ಇರಾನ್ ಮಧ್ಯಸ್ಥಿಕೆ ರಾಷ್ಟ್ರಗಳ ಮೂಲಕ ಸಮಗ್ರ ಒಪ್ಪಂದ ರೂಪಿಸಲು ಚರ್ಚೆಗಳನ್ನು ಮುಂದುವರಿಸುತ್ತಿವೆ ಎಂದು ‘ಫೈನಾನ್ಷಿಯಲ್ ಟೈಮ್ಸ್’ ಕೂಡ ವರದಿ ಮಾಡಿದೆ.
ಇದರ ನಡುವೆ, ಹೊರ್ಮುಜ್ ಜಲಸಂಧಿಯಲ್ಲಿ ಅಮೆರಿಕಾ ದಿಗ್ಬಂಧನವನ್ನು ಆರಂಭಿಸಿದೆ. ತಮ್ಮ ಅನುಮತಿಯಿಲ್ಲದೆ ದಿಗ್ಬಂಧನ ಪ್ರದೇಶಕ್ಕೆ ಬರುವ ಇರಾನ್ ಹಡಗುಗಳನ್ನು ಹೊಡೆದುರುಳಿಸುವುದಾಗಿ ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ.

ಈ ಮಧ್ಯೆ, ಅಮೆರಿಕದ ‘ಟ್ರಿಪೋಲಿ’ ಯುದ್ಧನೌಕೆಯು ಅರಬ್ಬಿ ಸಮುದ್ರದಲ್ಲಿ ಬೀಡುಬಿಟ್ಟಿದ್ದು, ಹಲವಾರು F-35 ಯುದ್ಧವಿಮಾನಗಳನ್ನು ಸನ್ನದ್ಧ ಸ್ಥಿತಿಯಲ್ಲಿ ಇರಿಸಲಾಗಿದೆ ಎಂದು ಯುಎಸ್ ಸೆಂಟ್ರಲ್ ಕಮಾಂಡ್ ತಿಳಿಸಿದೆ. ಆದರೆ, ಹೊರ್ಮುಜ್ ಜಲಸಂಧಿಯಲ್ಲಿ ಯಾವುದೇ ಮಿಲಿಟರಿ ಹಸ್ತಕ್ಷೇಪ ನಡೆದರೆ ಅದು ಬಿಕ್ಕಟ್ಟನ್ನು ಮತ್ತಷ್ಟು ಉಲ್ಬಣಗೊಳಿಸುತ್ತದೆ ಎಂದು ಇರಾನ್ ಎಚ್ಚರಿಸಿದೆ.