ಮೂರು ಪ್ರಮುಖ ವಿಷಯಗಳಲ್ಲಿ ತೀವ್ರ ಭಿನ್ನಾಭಿಪ್ರಾಯ- ಶಾಂತಿ ಮಾತುಕತೆ ವಿಫಲ

ಇಸ್ಲಾಮಾಬಾದ್: ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ಇಸ್ಲಾಮಾಬಾದ್‌ನಲ್ಲಿ ನಡೆದ ಅಮೆರಿಕ ಮತ್ತು ಇರಾನ್ ನಡುವಿನ ಮಹತ್ವದ ಕದನ ವಿರಾಮ ಮಾತುಕತೆಗಳು ಯಾವುದೇ ತೀರ್ಮಾನವಿಲ್ಲದೆ ಅಂತ್ಯಗೊಂಡಿವೆ. ಮೂರು ಪ್ರಮುಖ ವಿಷಯಗಳಲ್ಲಿ ಉಭಯ ದೇಶಗಳ ನಡುವೆ ತೀವ್ರ ಭಿನ್ನಾಭಿಪ್ರಾಯ ಉಂಟಾದ ಹಿನ್ನೆಲೆಯಲ್ಲಿ ಈ ಬೆಳವಣಿಗೆ ನಡೆದಿದೆ ಎಂದು ಇರಾನ್ ವಿದೇಶಾಂಗ ಸಚಿವಾಲಯ ತಿಳಿಸಿದೆ.
ವಿಫಲತೆಗೆ ಕಾರಣವಾದ ಪ್ರಮುಖ ಅಂಶಗಳು
ಮಾತುಕತೆಯ ವೇಳೆ ಇರಾನ್ 10 ಅಂಶಗಳನ್ನು ಮುಂದಿಟ್ಟರೆ, ಅಮೆರಿಕ ತನ್ನದೇ ಆದ ಪ್ರಸ್ತಾಪಗಳನ್ನು ಮಂಡಿಸಿತ್ತು. ಆದರೆ ಕೆಳಗಿನ ಮೂರು ವಿಷಯಗಳಲ್ಲಿ ಉಭಯ ದೇಶಗಳು ಪಟ್ಟು ಬಿಡದ ಕಾರಣ ಮಾತುಕತೆ ಮುರಿದುಬಿದ್ದಿದೆ:
1. ಹೋರ್ಮುಜ್ ಜಲಸಂಧಿ:ಈ ಆಯಕಟ್ಟಿನ ಪ್ರದೇಶದ ಮೇಲಿನ ಸಂಪೂರ್ಣ ನಿಯಂತ್ರಣವನ್ನು ಇರಾನ್ ಬಿಟ್ಟುಕೊಡಬೇಕೆಂಬ ಅಮೆರಿಕದ ಬೇಡಿಕೆಯನ್ನು ಇರಾನ್ ತಿರಸ್ಕರಿಸಿದೆ.
2. ಯುರೇನಿಯಂ ಪುಷ್ಟೀಕರಣ:ಯುರೇನಿಯಂ ಪುಷ್ಟೀಕರಣ ಪ್ರಕ್ರಿಯೆಯನ್ನು ಸಂಪೂರ್ಣವಾಗಿ ನಿಲ್ಲಿಸಬೇಕೆಂಬ ಅಮೆರಿಕದ ಪ್ರಸ್ತಾವನೆಗೆ ಇರಾನ್ ಒಪ್ಪಿಗೆ ಸೂಚಿಸಿಲ್ಲ.
3. ಲೆಬನಾನ್ ಸಂಘರ್ಷ:ಲೆಬನಾನ್‌ನಲ್ಲಿ ಇಸ್ರೇಲ್ ನಡೆಸುತ್ತಿರುವ ದಾಳಿಗಳನ್ನು ನಿಲ್ಲಿಸುವ ವಿಷಯದಲ್ಲೂ ಯಾವುದೇ ಒಮ್ಮತ ಮೂಡಿಬಂದಿಲ್ಲ.
ಅಮೆರಿಕದ ನಡೆಗೆ ಇರಾನ್ ಅಸಮಾಧಾನ
“ಅಪನಂಬಿಕೆ ಮತ್ತು ಸಂಶಯದ ವಾತಾವರಣದಲ್ಲಿ ಮಾತುಕತೆ ನಡೆದಿದೆ. ಯುದ್ಧದ ಮೂಲಕ ಸಾಧಿಸಲು ಸಾಧ್ಯವಾಗದ್ದನ್ನು ರಾಜತಾಂತ್ರಿಕತೆಯ ಮೂಲಕ ಪಡೆಯಲು ಅಮೆರಿಕ ಪ್ರಯತ್ನಿಸುತ್ತಿದೆ,” ಎಂದು ಇರಾನ್ ಮಾಧ್ಯಮಗಳು ಟೀಕಿಸಿವೆ. ಇರಾನ್‌ನ ರಾಷ್ಟ್ರೀಯ ಹಿತಾಸಕ್ತಿಗಳನ್ನು ರಕ್ಷಿಸುವ ಒಪ್ಪಂದಗಳಿಗೆ ಮಾತ್ರ ತಾವು ಸಿದ್ಧ ಎಂದು ಸಚಿವಾಲಯ ಸ್ಪಷ್ಟಪಡಿಸಿದೆ. ಅಲ್ಲದೆ, ಮಾತುಕತೆ ಪುನರಾರಂಭಿಸಲು ತಾವು ಯಾವುದೇ ಆತುರ ತೋರುತ್ತಿಲ್ಲ ಮತ್ತು “ಚೆಂಡು ಈಗ ಅಮೆರಿಕದ ಅಂಗಳದಲ್ಲಿದೆ” ಎಂದು ಇರಾನ್‌ನ ತಸ್ನಿಮ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಅಮೆರಿಕದ ನಿಯೋಗವು ಚರ್ಚೆಯಿಂದ ಹಿಂದೆ ಸರಿಯಲು “ನೆಪವೊಂದನ್ನು ಹುಡುಕುತ್ತಿತ್ತು” ಎಂದು ಇರಾನ್ ನಿಯೋಗವನ್ನು ಉದ್ಧರಿಸಿ ಅಲ್ಲಿನ ಮಾಧ್ಯಮಗಳು ಆರೋಪಿಸಿವೆ.
ಅಮೆರಿಕದ ಪ್ರತಿನಿಧಿಗಳು ತಮ್ಮ ಬೇಡಿಕೆಗಳಲ್ಲಿ ಸಣ್ಣ ಮಟ್ಟದ ಸುಧಾರಣೆ ಅಥವಾ ರಾಜಿಗೂ ಸಿದ್ಧರಿರಲಿಲ್ಲ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಮ್ಮ ಮುಖ ಉಳಿಸಿಕೊಳ್ಳಲು ಅಮೆರಿಕಕ್ಕೆ ಈ ಮಾತುಕತೆಯ ಅವಶ್ಯಕತೆಯಿತ್ತು. ಇರಾನ್ ವಿರುದ್ಧದ ಯುದ್ಧದಲ್ಲಿ ಸೋಲು ಮತ್ತು ಅನಿಶ್ಚಿತತೆಯನ್ನು ಎದುರಿಸುತ್ತಿದ್ದರೂ, ತಮ್ಮ ಬೇಡಿಕೆಗಳಲ್ಲಿ ರಾಜಿ ಮಾಡಿಕೊಳ್ಳಲು ಅವರು ಸಿದ್ಧರಿರಲಿಲ್ಲ ಎಂದು ಇರಾನ್ ಮಾಧ್ಯಮಗಳು ತಿಳಿಸಿವೆ.

ಪ್ರಸ್ತುತ ಉದ್ವಿಗ್ನತೆಯನ್ನು ಶಮನಗೊಳಿಸಲು ಪಾಕಿಸ್ತಾನದ ಮಧ್ಯಸ್ಥಿಕೆಯಲ್ಲಿ ಕಳೆದ ಬುಧವಾರ ತಾತ್ಕಾಲಿಕ ಕದನ ವಿರಾಮ ಘೋಷಿಸಿ ಮಾತುಕತೆಗೆ ಚಾಲನೆ ನೀಡಲಾಗಿತ್ತು.
ಪ್ರಸ್ತುತ ಮಾತುಕತೆ ವಿಫಲವಾಗಿರುವುದರಿಂದ ಪಶ್ಚಿಮ ಏಷ್ಯಾದಲ್ಲಿ ಮತ್ತೆ ಯುದ್ಧದ ಕಾರ್ಮೋಡ ಕವಿದಂತಾಗಿದೆ. ಮುಂದಿನ ಹಂತದ ಮಾತುಕತೆಗೆ ಯಾವುದೇ ದಿನಾಂಕ ಅಥವಾ ಸ್ಥಳ ನಿಗದಿಯಾಗಿಲ್ಲ.