ಯುಎಇ: ಸಣ್ಣ ಸಂಸ್ಥೆಗಳಲ್ಲೂ ಇಮಾರಾತಿಯನ್ನು ನೇಮಿಸಬೇಕು- ದೇಶೀಕರಣ ಕಾನೂನು ಪರಿಷ್ಕರಣೆ

ಅಬುಧಾಬಿ: ಯುಎಇಯಲ್ಲಿನ ಸಣ್ಣ ಸಂಸ್ಥೆಗಳು ಈ ವರ್ಷ ಕನಿಷ್ಠ ಒಬ್ಬ ಸ್ವದೇಶಿಯನ್ನು ನೇಮಿಸಿಕೊಳ್ಳಬೇಕು ಎಂದು ಕಾರ್ಮಿಕ ಸಚಿವಾಲಯ ಶಿಫಾರಸು ಮಾಡಿದೆ. ದೇಶೀಕರಣ ಕಾನೂನನ್ನು ಉಲ್ಲಂಘಿಸುವವರಿಗೆ ಭಾರಿ ದಂಡ ವಿಧಿಸಲಾಗುವುದು ಎಂದು ಸಚಿವಾಲಯ ಎಚ್ಚರಿಸಿದೆ.

20 ರಿಂದ 49 ಉದ್ಯೋಗಿಗಳನ್ನು ಹೊಂದಿರುವ ಸಣ್ಣ ಸಂಸ್ಥೆಗಳು ಈ ವರ್ಷ ಕನಿಷ್ಠ ಒಬ್ಬ ಸ್ಥಳೀಯರನ್ನು ನೇಮಿಸಿಕೊಳ್ಳಬೇಕು ಎಂದು ಸೂಚಿಸಲಾಗಿದೆ. ಇಲ್ಲದಿದ್ದರೆ, 68,000 ದಿರ್ಹಮ್‌ಗಳ ದಂಡವನ್ನು ಪಾವತಿಸಬೇಕಾಗುತ್ತದೆ ಎಂದು ಯುಎಇ ಕಾರ್ಮಿಕ ಮತ್ತು ನೈಸರ್ಗಿಕೀಕರಣ ಸಚಿವಾಲಯ ತಿಳಿಸಿದೆ.

2025ರಲ್ಲಿ ಮತ್ತೊಬ್ಬ ಸ್ಥಳೀಯರನ್ನು ನೇಮಿಸಬೇಕು. ಅಂದರೆ, ಎರಡು ವರ್ಷಗಳೊಳಗೆ, ಸ್ವದೇಶೀಕರಣ ಪ್ರಕ್ರಿಯೆಯ ಭಾಗವಾಗಿ ಸಣ್ಣ ಸಂಸ್ಥೆಗಳಲ್ಲಿ ಕನಿಷ್ಠ ಎರಡು ಎಮಿರಾತಿಗಳನ್ನು ನೇಮಿಸಿಕೊಳ್ಳಬೇಕು.

ಎರಡನೇ ವರ್ಷ ಕಾನೂನನ್ನು ಉಲ್ಲಂಘಿಸಿದರೆ ದಂಡದ ಮೊತ್ತ 1,08,000 ದಿರ್ಹಮ್ ಗಳಿಗೆ ಏರಿಕೆಯಾಗಲಿದೆ. 14 ಪ್ರಮುಖ ವಲಯಗಳಲ್ಲಿ ಇದು ಅನ್ವಯಿಸುತ್ತದೆ. ಐಟಿ, ಹಣಕಾಸು, ರಿಯಲ್ ಎಸ್ಟೇಟ್, ಶಿಕ್ಷಣ, ಆರೋಗ್ಯ, ಕಲೆ ಮತ್ತು ಮನರಂಜನೆ,ಗಣಿಗಾರಿಕೆ ಮತ್ತು ನಿರ್ಮಾಣ ಇತ್ಯಾದಿ ಈ ಕ್ಷೇತ್ರಗಳಲ್ಲಿ ಒಳಗೊಳ್ಳಲಿದೆ.

50ಕ್ಕಿಂತ ಹೆಚ್ಚು ಉದ್ಯೋಗಿಗಳನ್ನು ಹೊಂದಿರುವ ಕಂಪನಿಗಳಿಗೆ ಅನ್ವಯವಾಗುತ್ತಿದ್ದ ದೇಶೀಕರಣ ಕಾನೂನನ್ನು ಸಣ್ಣ ಕಂಪನಿಗಳಿಗೂ ವಿಸ್ತರಿಸುವ ಕ್ಯಾಬಿನೆಟ್ ನಿರ್ಧಾರದ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ.