ಸೌದಿ ಅರೇಬಿಯಾದಲ್ಲಿ ಮಾರ್ಚ್ 11 ರಂದು ರಂಜಾನ್ ಉಪವಾಸ ಪ್ರಾರಂಭ ಸಾಧ್ಯತೆ

ಜಿದ್ದಾ: ಸೌದಿ ಅರೇಬಿಯಾದಲ್ಲಿ ಮಾರ್ಚ್ 11 ರಂದು ರಂಜಾನ್ ಉಪವಾಸ ಪ್ರಾರಂಭವಾಗುವ ಸಾಧ್ಯತೆಯಿದೆ ಎಂದು ಖಗೋಳಶಾಸ್ತ್ರ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಪವಿತ್ರ ರಂಜಾನ್ ಮಾಸಕ್ಕೆ ಇನ್ನು ಕೆಲವೇ ದಿನಗಳು ಬಾಕಿ ಇರುವಾಗ ಇಸ್ಲಾಮಿಕ್ ವ್ಯವಹಾರಗಳ ಸಚಿವಾಲಯ ಮಸೀದಿ ನೌಕರರಿಗೆ ವಿಶೇಷ ಸೂಚನೆಗಳನ್ನು ನೀಡಿದೆ. ಇಫ್ತಾರ್‌ಗಾಗಿ ದೇಣಿಗೆ ಸಂಗ್ರಹಿಸದಂತೆ ಮತ್ತು ಪ್ರಾರ್ಥನೆಯ ವೇಳಾಪಟ್ಟಿಯನ್ನು ಅನುಸರಿಸಲು ಸಚಿವಾಲಯ ಸಲಹೆ ನೀಡಿದೆ. ರಂಜಾನ್‌ಗೆ ಮುನ್ನ ಮಸೀದಿಗಳ ದುರಸ್ತಿ ಕಾರ್ಯವನ್ನು ಪೂರ್ಣಗೊಳಿಸುವಂತೆಯೂ ಸಚಿವಾಲಯ ಕೇಳಿಕೊಂಡಿದೆ.

ದೇಶಾದ್ಯಂತ ಮಸೀದಿಗಳಲ್ಲಿ ರಂಜಾನ್ ಹಬ್ಬದ ಸಿದ್ಧತೆಗಳು ಭರದಿಂದ ಸಾಗಿವೆ. ಮಸೀದಿಗಳ ಬಳಿ ನಡೆಯುವ ಇಫ್ತಾರ್ ವಿತರಣೆಗೆ ದೇಣಿಗೆ ಸಂಗ್ರಹಿಸದಂತೆ ಇಸ್ಲಾಮಿಕ್ ವ್ಯವಹಾರಗಳ ಸಚಿವಾಲಯ ಮಸೀದಿ ಇಮಾಮ್‌ಗಳು ಮತ್ತು ಮುಅದ್ಸಿನ್‌ಗಳಿಗೆ ಸೂಚನೆ ನೀಡಿದೆ. ಮಸೀದಿಯೊಳಗೆ ಇಫ್ತಾರ್ ಹಂಚುವುದನ್ನು ಕೂಡ ನಿಷೇಧಿಸಲಾಗಿದೆ.

ರಂಜಾನ್ ಸಮಯದಲ್ಲಿ, ಇಮಾಮ್‌ಗಳು ಮತ್ತು ಮುಅದ್ಸಿನ್‌ಗಳು ರಜೆ ಪಡೆಯದೆ, ಕೆಲಸಕ್ಕೆ ವರದಿ ಮಾಡಬೇಕು. ಉಮ್ ಅಲ್-ಕುರಾ ಕ್ಯಾಲೆಂಡರ್ ಪ್ರಕಾರ ಪ್ರತಿ ಪ್ರಾರ್ಥನೆಯ ಸಮಯವನ್ನು ಕಟ್ಟುನಿಟ್ಟಾಗಿ ಅನುಸರಿಸಬೇಕು.

ರಂಜಾನ್‌ನಲ್ಲಿ, ಇಶಾ ಮತ್ತು ಸುಬ್ಹ್ ಪ್ರಾರ್ಥನೆಗಳಿಗೆ ಅಝಾನ್ ಮತ್ತು ಇಖಾಮಾ ನಡುವೆ ಹತ್ತು ನಿಮಿಷಗಳ ಮಧ್ಯಂತರವನ್ನು ನಿಗದಿಪಡಿಸಲಾಗಿದೆ. ಇಮಾಮ್‌ಗಳು ಮತ್ತು ಮುಅದ್ಸಿನ್‌ಗಳು ಭಿಕ್ಷಾಟನೆಯ ಆರ್ಥಿಕ, ಸಾಮಾಜಿಕ ಮತ್ತು ಭದ್ರತೆಯ ಪರಿಣಾಮಗಳ ಬಗ್ಗೆ ವಿಶ್ವಾಸಿಗಳಿಗೆ ಶಿಕ್ಷಣ ನೀಡಬೇಕು. ಅಧಿಕೃತ ಮತ್ತು ವಿಶ್ವಾಸಾರ್ಹ ವೇದಿಕೆಗಳ ಮೂಲಕ ದೇಣಿಗೆಗಳನ್ನು ಪ್ರೋತ್ಸಾಹಿಸಬೇಕು ಎಂದು ಸಚಿವಾಲಯ ಸಲಹೆ ನೀಡಿದೆ. ರಂಜಾನ್‌ಗೆ ಮುನ್ನ ಮಸೀದಿಗಳಲ್ಲಿ ನಿರ್ವಹಣೆ ಮತ್ತು ಸ್ವಚ್ಛತಾ ಕಾರ್ಯವನ್ನು ಪೂರ್ಣಗೊಳಿಸಬೇಕು. ಮಹಿಳೆಯರಿಗೆ ಪ್ರತ್ಯೇಕ ಪ್ರಾರ್ಥನಾ ಸ್ಥಳವನ್ನು ಸ್ಥಾಪಿಸುವ ಪ್ರಸ್ತಾವನೆಯನ್ನೂ ಸಚಿವಾಲಯ ನೀಡಿದೆ.