ಸೌದಿ: ಸಾರ್ವಜನಿಕ ರಜಾದಿನಗಳನ್ನು ಅನುಮತಿಸದ ಖಾಸಗಿ ಕಂಪನಿಗಳ ವಿರುದ್ಧ ಕಠಿಣ ಕ್ರಮ

ರಿಯಾದ್ : ಸೌದಿ ಅರೇಬಿಯಾದಲ್ಲಿ ಸಾರ್ವಜನಿಕ ರಜಾದಿನಗಳನ್ನು ಅನುಮತಿಸದ ಖಾಸಗಿ ಕಂಪನಿಗಳ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಮಾನವ ಸಂಪನ್ಮೂಲ ಸಚಿವಾಲಯ ತಿಳಿಸಿದೆ. ರಜೆ ನೀಡಲು ಸಾಧ್ಯವಿಲ್ಲದ ವಲಯಗಳಲ್ಲಿನ ಕಾರ್ಮಿಕರಿಗೆ ರಜೆಯ ಬದಲಾಗಿ ಅಧಿಕಾವಧಿ ವೇತನವನ್ನು ನೀಡಬೇಕು ಎಂದು ಸಚಿವಾಲಯ ಹೇಳಿದೆ.

ಸೌದಿ ಅರೇಬಿಯಾದ ಸಂಸ್ಥಾಪನಾ ದಿನದಂದು ದೇಶದಲ್ಲಿ ಘೋಷಿಸಲಾದ ಸಾರ್ವಜನಿಕ ರಜೆಗೆ ಸಂಬಂಧಿಸಿ ಈ ವಿವರಣೆಯನ್ನು ನೀಡಲಾಗಿದೆ. ಸೌದಿ ಕಾರ್ಮಿಕ ಕಾನೂನಿನ ಪ್ರಕಾರ, ಸಾರ್ವಜನಿಕ ಮತ್ತು ಖಾಸಗಿ ವಲಯದ ಕೆಲಸಗಾರರು ಸಾರ್ವಜನಿಕ ರಜಾದಿನಗಳಲ್ಲಿ ರಜೆ ಪಡೆಯಲು ಅರ್ಹರಾಗಿರುತ್ತಾರೆ.

ಅಧಿಕೃತ ರಜಾದಿನಗಳಂದು ಕೆಲಸಗಾರನಿಗೆ ರಜೆ ನೀಡಲು ವಿಫಲವಾದ ಕಂಪೆನಿಗಳಿಗೆ, ಪ್ರತಿ ಕೆಲಸಗಾರನಿಗೆ 5,000 ರಿಯಾಲ್‌ ನಂತೆ ದಂಡ ವಿಧಿಸಲಾಗುತ್ತದೆ. ಅದೇ ಸಮಯದಲ್ಲಿ, ರಜೆ ನೀಡಲು ಸಾಧ್ಯವಿಲ್ಲದ ವಲಯಗಳಲ್ಲಿ ಕೆಲಸಗಾರರನ್ನು ನೇಮಿಸಿಕೊಂಡರೆ, ರಜೆಯ ಬದಲಿಗೆ ಹೆಚ್ಚುವರಿ ಸಮಯವನ್ನು ಪಾವತಿಸುವುದು ಕಡ್ಡಾಯವಾಗಿದೆ.

ನಿಗದಿತ ಸಮಯದ ನಂತರ ಕೆಲಸ ಮಾಡುವ ಕಾರ್ಮಿಕರಿಗೆ ಹೆಚ್ಚುವರಿ ವೇತನ ನೀಡಬೇಕು. ಸೌದಿ ಕಾರ್ಮಿಕ ಕಾನೂನು ಅಧಿಕಾವಧಿ ವೇತನಕ್ಕೆ ಸ್ಪಷ್ಟ ಮಾರ್ಗಸೂಚಿಗಳನ್ನು ಹೊಂದಿದೆ. ಓವರ್ಟೈಮ್ ವೇತನವನ್ನು ಗಂಟೆಯ ಆಧಾರದ ಮೇಲೆ ಲೆಕ್ಕಹಾಕಲಾಗುತ್ತದೆ. ನೌಕರನ ಪೂರ್ಣ ವೇತನವನ್ನು 30 ದಿನಗಳಿಂದ ಭಾಗಿಸಿ, ಅವನ ದಿನದ ವೇತನವನ್ನು ಕೆಲಸ ಮಾಡುವ ಗಂಟೆಗಳ ಸಂಖ್ಯೆಯಿಂದ ಭಾಗಿಸಲಾಗುತ್ತದೆ. ಕೆಲಸಗಾರನಿಗೆ ಪ್ರತಿ ಗಂಟೆಗೆ ಹೆಚ್ಚುವರಿ ಸಮಯವನ್ನು ಪಾವತಿಸಲಾಗುತ್ತದೆ,ಗಂಟೆಯ ವೇತನ ಜೊತೆಗೆ ಅವನ ಮೂಲ ವೇತನದ ಅರ್ಧದಷ್ಟು ವೇತನ ನೀಡಬೇಕು.

ಸಾರ್ವಜನಿಕ ರಜಾದಿನಗಳೆಂದರೆ,ಎರಡು ಈದ್ ದಿನಗಳು, ಸೌದಿ ರಾಷ್ಟ್ರೀಯ ದಿನ ಮತ್ತು ಸೌದಿ ಸಂಸ್ಥಾಪಕರ ದಿನ, ಮತ್ತು ಉದ್ಯೋಗ ಒಪ್ಪಂದದಲ್ಲಿ ನಿರ್ದಿಷ್ಟಪಡಿಸಿದ ದಿನಗಳನ್ನು ಹೊರತುಪಡಿಸಿ ಇತರ ಸಮಯಗಳಲ್ಲಿ ಕೆಲಸ ಮಾಡುವ ಕಾರ್ಮಿಕರು ಅಧಿಕಾವಧಿಗೆ ಅರ್ಹರಾಗಿರುತ್ತಾರೆ.