ರಿಯಾದ್,ಡಿ.1: ವಿವಿಧ ದೇಶಗಳಿಂದ ಸೌದಿ ಅರೇಬಿಯಾಕ್ಕೆ ಹಿಂದಿರುಗುವ ವಿಮಾನಗಳ ದಿನಾಂಕವನ್ನು ನಾಳೆ ಪ್ರಕಟಿಸಲಾಗುವುದು. ಜನವರಿಯಿಂದ ವಿಮಾನಯಾನ ಪ್ರಾರಂಭಿಸುವುದಾಗಿ ಸೆಪ್ಟೆಂಬರ್ನಲ್ಲಿ ಸೌದಿ ಅರೇಬಿಯಾ ಘೋಷಿಸಿತ್ತು.
ನಾಳೆಯ ಪ್ರಕಟಣೆಯಲ್ಲಿ ವಲಸಿಗರು ಹಿಂದಿರುಗುವ ದಿನಾಂಕವನ್ನು ಘೋಷಿಸುವ ನಿರೀಕ್ಷೆಯಿದೆ. ಕೋವಿಡ್ ಪ್ರಕರಣಗಳು ಹೆಚ್ಚಾಗಿರುವ ಹಿನ್ನೆಲೆಯಲ್ಲಿ , ಪ್ರಯಾಣ ನಿಷೇಧ ಪಟ್ಟಿಯಲ್ಲಿರುವ ಭಾರತಕ್ಕೆ ಸೇವೆಗಳನ್ನು ಪುನರಾರಂಭಿಸುವ ನಿರೀಕ್ಷೆಯಲ್ಲಿದ್ದಾರೆ ವಲಸಿಗರು.
ಸೆಪ್ಟೆಂಬರ್ನಲ್ಲಿ, ಸೌದಿ ಅರೇಬಿಯಾ ತನ್ನ ವಿಮಾನ ಪ್ರಯಾಣ ನಿಷೇಧವನ್ನು ಭಾಗಶಃ ತೆಗೆದುಹಾಕಿತು. ಭಾರತವನ್ನು ಹೊರತುಪಡಿಸಿ ಎಲ್ಲಾ ಸ್ಥಳಗಳಿಗೆ ಸೇವೆಗಳನ್ನು ಭಾಗಶಃ ಪುನರಾರಂಭಿಸಿದೆ. ಆದರೆ, ಜನವರಿಯಲ್ಲಿ ಪೂರ್ಣ ಸೇವೆಯನ್ನು ಪುನರಾರಂಭಿಸುವುದಾಗಿಯೂ, ಡಿಸೆಂಬರ್‌ನಲ್ಲಿ ಅದರ ದಿನಾಂಕವನ್ನು ಪ್ರಕಟಿಸುವುದಾಗಿ ಸೌದಿ ಅರೇಬಿಯಾ ತಿಳಿಸಿತ್ತು. ಈ ನಿಟ್ಟಿನಲ್ಲಿ ಆಂತರಿಕ ಸಚಿವಾಲಯವು ನಾಳೆ ವಿಮಾನ ಹಾರಾಟದ ನಿಖರವಾದ ದಿನಾಂಕವನ್ನು ಪ್ರಕಟಿಸಲಿದೆ ಎಂದು ಸೌದಿ ಅರೇಬಿಯಾದ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.
ಪ್ರಯಾಣಿಕರು ಪಾಲಿಸಬೇಕಾದ ನಿಯಮಗಳು ಮತ್ತು ಷರತ್ತುಗಳನ್ನು ಇದೇ ವೇಳೆ ಘೋಷಿಸುವ ನಿರೀಕ್ಷೆಯಿದೆ . ಕೋವಿಡ್ ಪ್ರಕರಣಗಳು ಹೆಚ್ಚಿರುವ ಭಾರತ ಸೇರಿದಂತೆ ಕೆಲವು ದೇಶಗಳು ಸೌದಿ ಪ್ರಯಾಣ ನಿಷೇಧ ಪಟ್ಟಿಯಲ್ಲಿವೆ. ಭಾರತದ ಮೇಲಿನ ನಿಷೇಧವನ್ನು ತೆಗೆದುಹಾಕಿದ ನಂತರ ಸೇವೆ ಪ್ರಾರಂಭವಾಗುತ್ತದೆಯೇ ಎಂದು ನಾಳೆ ತಿಳಿಯಲಿದೆ.
ಇತರ ದೇಶಗಳಿಗೆ ಸೇವೆಯನ್ನು ಘೋಷಿಸಿ, ಭಾರತಕ್ಕೆ ಸೇವೆಯನ್ನು ಘೋಷಿಸದಿದ್ದಲ್ಲಿ ವಲಸಿಗರು ‘ಏರ್ ಬಬಲ್’ ಒಪ್ಪಂದದ ಸೇವೆಯನ್ನೇ ಅವಲಂಬಿಸಬೇಕಾಗಿದೆ. ಈ ಒಪ್ಪಂದ ಕುರಿತ ಚರ್ಚೆಯನ್ನು ರಾಯಭಾರ ಕಚೇರಿ ಪೂರ್ಣಗೊಳಿಸಿದ್ದು, ಶೀಘ್ರದಲ್ಲೇ ಶುಭ ಸುದ್ದಿಯನ್ನು ನೀಡಲಾಗುವುದು ಎಂದು ಭಾರತೀಯ ರಾಯಭಾರಿ ಇತ್ತೀಚೆಗೆ ತಿಳಿಸಿದ್ದರು.
