ವಾಷಿಂಗ್ ಮೆಷಿನ್‌ನಲ್ಲಿ ಹಾಕಿ ಪುಟ್ಟ ಮಗುವಿನ ಹತ್ಯೆ- ವಿದೇಶೀ ಮನೆಗೆಲಸದಾಕೆಯ ಬಂಧನ

ಕುವೈತ್ ಸಿಟಿ: ವಾಷಿಂಗ್ ಮೆಷಿನ್ ನಲ್ಲಿ ಹಾಕಿ ಮಗುವನ್ನು ಕೊಂದ ವಿದೇಶಿ ಕೆಲಸದಾಕೆಯನ್ನು ಕುವೈತ್ ನಲ್ಲಿ ಬಂಧಿಸಲಾಗಿದೆ. ಒಂದೂವರೆ ವರ್ಷದ ಸ್ಥಳೀಯ ಮಗು ಮೃತಪಟ್ಟಿದೆ. ಕ್ರೂರ ಘಟನೆಯಿಂದ ಕುವೈತ್ ಜನ ಸಮೂಹ ಬೆಚ್ಚಿಬಿದ್ದಿದೆ. ಫಿಲಿಪ್ಪೀನ್ಸ್‌ನ ಗೃಹ ಕೆಲಸಗಾರ್ತಿಯನ್ನು ಬಂಧಿಸಲಾಗಿದೆ.ಈ ಹೃದಯವಿದ್ರಾವಕ ಘಟನೆಯಿಂದ ದೇಶವೇ ನಲುಗಿ ಹೋಗಿದೆ.

ಮುಬಾರಕ್ ಅಲ್ ಕಬೀರ್ ಗವರ್ನರೇಟ್‌ನಲ್ಲಿರುವ ಮನೆಯೊಂದರಲ್ಲಿ ಈ ಕ್ರೂರ ಘಟನೆ ನಡೆದಿದೆ. ಮಗುವಿನ ಕಿರುಚಾಟ ಕೇಳಿ ಪೋಷಕರು ಓಡಿ ಬಂದು ಮಗುವನ್ನು ಜಾಬೀರ್ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಆದರೆ ಗಂಭೀರವಾಗಿ ಗಾಯಗೊಂಡ ಮಗುವಿನ ಜೀವ ಉಳಿಸಲು ಸಾಧ್ಯವಾಗಲಿಲ್ಲ. ಮಗುವಿನ ಪೋಷಕರು ನೀಡಿದ ಮಾಹಿತಿಯ ಆಧಾರದ ಮೇಲೆ ಪೊಲೀಸರು ಅನಿವಾಸಿ ಮನೆಕೆಲಸಗಾರ್ತಿಯನ್ನು ಬಂಧಿಸಿದ್ದಾರೆ.

ವಿವರವಾದ ವಿಚಾರಣೆಗಾಗಿ ಆಕೆಯನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ. ಪೊಲೀಸರು ಮತ್ತು ಪತ್ತೆದಾರರು ಪ್ರಕರಣದ ವಿವರವಾದ ತನಿಖೆಯನ್ನು ಪ್ರಾರಂಭಿಸಿದ್ದಾರೆ.