ಸೌದಿ: ಪ್ರಯಾಣ ನಿಷೇಧಿತ ದೇಶಗಳ ಪಟ್ಟಿಯಲ್ಲಿ ಮತ್ತೆ ಭಾರತ- ವಲಸಿಗರಿಗೆ ಆತಂಕ

ರಿಯಾದ್: ಸೌದಿ ಪ್ರಜೆಗಳಿಗೆ ಭಾರತಕ್ಕೆ ಪ್ರಯಾಣಿಸುವುದನ್ನು ಮತ್ತೆ ನಿಷೇಧಿಸಲಾಗಿದೆ. ಸೌದಿ ಪಾಸ್‌ಪೋರ್ಟ್ ನಿರ್ದೇಶನಾಲಯ (ಜವಾಝಾತ್) ಕೋವಿಡ್‌ನಿಂದಾಗಿ ಸೌದಿ ನಾಗರಿಕರು ಪ್ರಯಾಣಿಸಬಾರದ ದೇಶಗಳ ಪಟ್ಟಿಯಲ್ಲಿ ಭಾರತವನ್ನು ಮತ್ತೆ ಸೇರಿಸಿದೆ.

ಕೋವಿಡ್ ಹರಡುವಿಕೆ ಕ್ಷೀಣಿಸಿದ ಮತ್ತು ಬೆದರಿಕೆ ಕಡಿಮೆಯಾದ ಕಾರಣ ಪ್ರಯಾಣ ನಿಷೇಧಿತ ದೇಶಗಳ ಪಟ್ಟಿಯಿಂದ ಭಾರತದ ಹೆಸರನ್ನು ತೆಗೆದುಹಾಕಲಾಗಿತ್ತು ಆದರೆ, ನವೀಕರಿಸಿದ ಪಟ್ಟಿಯಲ್ಲಿ ಭಾರತವನ್ನು ಒಳಪಡಿಸಲಾಗಿದೆ.

ಸೌದಿ ಪ್ರಜೆಗಳು ಭಾರತ ಸೇರಿದಂತೆ, ಲೆಬನಾನ್, ಟರ್ಕಿ, ಯೆಮೆನ್, ಸಿರಿಯಾ, ಇಂಡೋನೇಷ್ಯಾ, ಇರಾನ್, ಅರ್ಮೇನಿಯಾ, ಕಾಂಗೋ, ಲಿಬಿಯಾ, ಬೆಲಾರಸ್, ವಿಯೆಟ್ನಾಂ, ಇಥಿಯೋಪಿಯಾ, ಸೊಮಾಲಿಯಾ, ಅಫ್ಘಾನಿಸ್ತಾನ್ ಮತ್ತು ವೆನೆಜುವೆಲಾಕ್ಕೆ ಪ್ರಯಾಣಿಸುವುದನ್ನು ನಿಷೇಧಿಸಲಾಗಿದೆ.

ಈ ಹಿಂದೆ ಪ್ರಯಾಣ ನಿಷೇಧಿಸಲ್ಪಟ್ಟ ದೇಶಗಳ ಜನರಿಗೆ ಸೌದಿ ಪ್ರವೇಶವನ್ನೂ ನಿರ್ಬಂಧಿಸಲಾಗಿತ್ತು. ಇದು ಅನಿವಾಸಿ ಭಾರತೀಯರನ್ನು ಮತ್ತೆ ಆತಂಕಕ್ಕೀಡು ಮಾಡಿದೆ.