ಯುಎಇಯ ಅಜ್ಮಾನ್‌ನಿಂದ ಸೌದಿ ಅರೇಬಿಯಾಕ್ಕೆ ಬಸ್ ಸೇವೆ- ಟೆಕೆಟ್ ದರ 250 ದಿರ್ಹಮ್

ಅಜ್ಮಾನ್‌: ಯುಎಇಯ ಅಜ್ಮಾನ್‌ನಿಂದ ಸೌದಿ ಅರೇಬಿಯಾಕ್ಕೆ ಬಸ್ ಸೇವೆಯನ್ನು ಪ್ರಾರಂಭಿಸಲಾಗಿದೆ. ಅಜ್ಮಾನ್‌ನಿಂದ ರಿಯಾದ್, ದಮ್ಮಾಮ್, ಜಿದ್ದಾ ಮತ್ತು ಮಕ್ಕಾಗೆ ಪ್ರತಿದಿನ ಮೂರು ಬಸ್ಸುಗಳು ಪ್ರಯಾಣಿಸಲಿದೆ. 250 ರಿಂದ 600 ದಿರ್ಹಮ್‌ಗಳವರೆಗೆ ಟಿಕೆಟ್ ದರ ಇರಲಿದೆ.

ಸೌದಿ ಅರೇಬಿಯಾಕ್ಕೆ ಹೋಗುವ ಬಸ್ಸುಗಳು ಅಜ್ಮಾನ್ ಸಾರಿಗೆ ಪ್ರಾಧಿಕಾರದ ಅಲ್ತಲ್ಲಾ ಬಸ್ ನಿಲ್ದಾಣದಿಂದ ಹೊರಡಲಿದೆ. ಸೌದಿ ವೀಸಾ ಹೊಂದಿರುವವರು ಬಸ್‌ನಲ್ಲಿ ಪ್ರಯಾಣಿಸಬಹುದು. ಯುಎಇ-ಸೌದಿ ಗಡಿಯನ್ನು ತಲುಪಲು ಆರು ಗಂಟೆಗಳ ಪ್ರಯಾಣವಿದೆ. ರಿಯಾದ್ ಮತ್ತು ದಮ್ಮಾಮ್‌ಗೆ ಪ್ರಯಾಣಿಸಲು 12 ಗಂಟೆಗಳು ಮತ್ತು ಜಿದ್ದಾ ಮತ್ತು ಮಕ್ಕಾಗೆ 24 ಗಂಟೆಗಳ ಪ್ರಯಾಣವಿದೆ.

ಸೌದಿ ಅರೇಬಿಯಾದಿಂದ ಅಜ್ಮಾನ್‌ಗೆ ಮೂರು Saptco ಬಸ್‌ಗಳು ಸೇವೆ ಸಲ್ಲಿಸಲಿವೆ. ಕೋವಿಡ್ ನಿಯಂತ್ರಣದಂತೆ, ಒಂದು ಬಸ್ ನಲ್ಲಿ 24 ಪ್ರಯಾಣಿಕರಿಗೆ ಮಾತ್ರ ಅವಕಾಶ ಕಲ್ಪಿಸಲಾಗಿದೆ. ಪ್ರಯಾಣಿಕರು ಎರಡು ಡೋಸ್ ಲಸಿಕೆಯನ್ನು ಪೂರ್ಣಗೊಳಿಸಿರಬೇಕು. ನಿರ್ಗಮಿಸುವ ಮೊದಲು ನಕಾರಾತ್ಮಕ ಪಿಸಿಆರ್ ಪರೀಕ್ಷೆಯನ್ನು ಸಹ ಹೊಂದಿರಬೇಕು.

ಯುಎಇ-ಸೌದಿ ಅರೇಬಿಯಾಕ್ಕೆ ಪ್ರಯಾಣಿಸುವ ಸಾಮಾನ್ಯ ವಲಸಿಗರಿಗೆ ಬಸ್ ಸೇವೆಯು ಉತ್ತಮ ವರದಾನವಾಗಲಿದೆ. ಮೊದಲ ಕೆಲವು ದಿನಗಳಲ್ಲಿ ಸೌದಿ ಸೇವೆಗೆ ಉತ್ತಮ ಪ್ರತಿಕ್ರಿಯೆ ದೊರೆತಿದೆ ಎಂದು ಅಜ್ಮಾನ್ ಸಾರಿಗೆ ಪ್ರಾಧಿಕಾರದ ಅಧಿಕಾರಿಗಳು ತಿಳಿಸಿದ್ದಾರೆ.