ಒಮಿಕ್ರಾನ್ ಭೀತಿ- ನಾಲ್ಕು ರಾಷ್ಟ್ರಗಳ ಪ್ರಯಾಣಿಕರಿಗೆ ಹೊಸ ಮಾನದಂಡ

ಅಬುಧಾಬಿ: ಕೋವಿಡ್ 19 ರೂಪಾಂತರ ಒಮಿಕ್ರಾನ್ ಹರಡುವ ಹಿನ್ನೆಲೆಯಲ್ಲಿ ,ನೈಜೀರಿಯಾ, ಕೀನ್ಯಾ, ರುವಾಂಡಾ ಮತ್ತು ಇಥಿಯೋಪಿಯಾದಿಂದ ನೇರ ವಿಮಾನಗಳಲ್ಲಿ ಯುಎಇಗೆ ಆಗಮಿಸುವವರಿಗೆ ರಾಷ್ಟ್ರೀಯ ತುರ್ತು ಪರಿಸ್ಥಿತಿ, ಬಿಕ್ಕಟ್ಟು ಮತ್ತು ವಿಪತ್ತು ನಿರ್ವಹಣೆ (NCEMA) ಮತ್ತು ಜನರಲ್ ಸಿವಿಲ್ ಏವಿಯೇಷನ್ ​​​​ಅಥಾರಿಟಿ ನಿನ್ನೆ ಹೊಸ ಪ್ರಯಾಣ ಮಾನದಂಡಗಳನ್ನು ಬಿಡುಗಡೆ ಮಾಡಿದೆ. 

ತಿದ್ದುಪಡಿ ಮಾಡಲಾದ ಕಾನೂನಿನ ಪ್ರಕಾರ, ಈ ನಾಲ್ಕು ದೇಶಗಳಿಂದ ನೇರ ವಿಮಾನಗಳಲ್ಲಿ ಯುಎಇಗೆ ಆಗಮಿಸುವವರು 48 ಗಂಟೆಗಳ ಒಳಗೆ ಪಡೆದ ಪಿಸಿಆರ್ ನೆಗಟಿವ್ ಫಲಿತಾಂಶವನ್ನು ಹೊಂದಿರಬೇಕು. ಅದೂ ಅಲ್ಲದೇ, ಹೊರಟು 6 ಗಂಟೆಗಳ ಒಳಗೆ ವಿಮಾನ ನಿಲ್ದಾಣದಲ್ಲೂ ರಾಪಿಡ್ ಟೆಸ್ಟ್ ನ್ನೂ ನಡೆಸಬೇಕಾಗಿದೆ. 

ಟ್ರಾನ್ಸಿಟ್ ಫ್ಲೈಟ್‌ಗಳಲ್ಲಿ ಯುಎಇಗೆ ಆಗಮಿಸುವವರು, 48 ಗಂಟೆಗಳ ಒಳಗಿನ  PCR ಋಣಾತ್ಮಕ ಪರೀಕ್ಷೆಯ ಫಲಿತಾಂಶ ಮತ್ತು ಹೊರಟು 6 ಗಂಟೆಗಳ ಒಳಗೆ ವಿಮಾನ ನಿಲ್ದಾಣದಲ್ಲಿ ನಡೆಸಿದ  ಪಿಸಿಆರ್ ಪರೀಕ್ಷೆಯ ಫಲಿತಾಂಶವನ್ನೂ ಕೈಯಲ್ಲಿರಿಸಬೇಕಾಗಿದೆ. ಜೊತೆಗೆ ಯುಎಇ ಗೆ ಹೊರಡುವ ಮುಂಚಿತವಾಗಿ ಟ್ರಾನ್ಸಿಟ್ ವಿಮಾನ ನಿಲ್ದಾಣದಲ್ಲೂ ರಾಪಿಡ್ ಟೆಸ್ಟ್ ನಡೆಸುವ ಅಗತ್ಯವಿದೆ. 

ವಿಮಾನಗಳ ವೇಳಾಪಟ್ಟಿಯಲ್ಲಿನ ಬದಲಾವಣೆಗಳು, ಯಾವುದೇ ವಿಳಂಬಗಳು ಅಥವಾ ಇತರ ಅಡಚಣೆಗಳಿಲ್ಲ ಎಂಬುದನ್ನು ಖಚಿತಪಡಿಸಲು , ಪ್ರಯಾಣಿಕರು ತಮ್ಮ ವಿಮಾನಯಾನ ಸಂಸ್ಥೆಗಳೊಂದಿಗೆ ನಿಯಮಿತವಾಗಿ ಸಂವಹನ ನಡೆಸಬೇಕು ಎಂದು ಹೊಸ ಮಾನದಂಡಗಳಲ್ಲಿ ಪ್ರತ್ಯೇಕವಾಗಿ ಹೇಳಲಾಗಿದೆ.