ಸೌದಿ: ಕೋವಿಡ್ ನಿಯಮ ಉಲ್ಲಂಘನೆ- ಒಂದೇ ವಾರದಲ್ಲಿ 23 ಸಾವಿರ ಪ್ರಕರಣ ಪತ್ತೆ

ರಿಯಾದ್|ಕೋವಿಡ್ ನಿಯಮ ಉಲ್ಲಂಘನೆಗಳನ್ನು ಪತ್ತೆ ಮಾಡಲು ಸೌದಿ ಆಂತರಿಕ ಸಚಿವಾಲಯ ತಪಾಸಣೆಗಳನ್ನು ಬಿಗಿಗೊಳಿಸಿದೆ. ಕಳೆದ ವಾರದಲ್ಲಿ 23,000 ಉಲ್ಲಂಘನೆಗಳನ್ನು ಪತ್ತೆ ಹಚ್ಚಲಾಗಿದೆ ಎಂದು ಗೃಹ ಸಚಿವಾಲಯ ಹೇಳಿದೆ.

ಮಾಸ್ಕ್ ಧರಿಸದ ಕಾರಣ ಹೆಚ್ಚಿನವರನ್ನು ಬಂಧಿಸಲಾಗಿದೆ.ಕೋವಿಡ್ ಪ್ರೋಟೋಕಾಲ್ ಪಾಲಿಸದ ಸಂಸ್ಥೆಗಳ ವಿರುದ್ಧವೂ ಕ್ರಮ ಕೈಗೊಳ್ಳಲಾಗಿದೆ. ದೇಶದಲ್ಲಿ ಕೋವಿಡ್ ಹರಡುವಿಕೆಯಲ್ಲಿ ಇಳಿಕೆಯಾಗಿದ್ದರೂ, ಕೋವಿಡ್ ಪ್ರೋಟೋಕಾಲ್ ಅನ್ನು ಅನುಸರಿಸುವಲ್ಲಿ ಯಾವುದೇ ರಿಯಾಯಿತಿಗಳನ್ನು ಘೋಷಿಸಲಾಗಿಲ್ಲ.ಕೋವಿಡ್ ಉಲ್ಲಂಘನೆಗಳ ವಿರುದ್ಧ ಗೃಹ ಸಚಿವಾಲಯವು ತಪಾಸಣೆ ಮುಂದುವರಿಸಿದೆ.

ಸಚಿವಾಲಯ ಬಿಡುಗಡೆ ಮಾಡಿದ ಅಂಕಿಅಂಶಗಳ ಪ್ರಕಾರ, ಕಳೆದ ವಾರದಲ್ಲಿ 23,000 ಉಲ್ಲಂಘನೆಗಳನ್ನು ಪತ್ತೆ ಹಚ್ಚಲಾಗಿದೆ. ಈ ಪೈಕಿ 10,000 ಕ್ಕೂ ಹೆಚ್ಚು ಜನರನ್ನು ಮಾಸ್ಕ್ ಧರಿಸದ ಕಾರಣ ಬಂಧಿಸಲಾಗಿದೆ ಎಂದು ಸಚಿವಾಲಯದ ಅಧಿಕಾರಿಗಳು ತಿಳಿಸಿದ್ದಾರೆ.

ಸೂಚನೆಗಳನ್ನು ಪಾಲಿಸದ ಸಂಸ್ಥೆಗಳ ವಿರುದ್ಧವೂ ಕ್ರಮ ಕೈಗೊಳ್ಳಲಾಗಿದೆ. ರಿಯಾದ್‌ನಲ್ಲಿ ಅತಿ ಹೆಚ್ಚು ಪ್ರಕರಣಗಳು 8914 ಆಗಿದೆ. ಪೂರ್ವ ಪ್ರಾಂತ್ಯದಲ್ಲಿ 4002, ಮಕ್ಕಾದಲ್ಲಿ 2202,ಅಲ್ ಖಸೀಂ ನಲ್ಲಿ 1806 ಮತ್ತು ಮದೀನಾದಲ್ಲಿ 1775 ಉಲ್ಲಂಘನೆಗಳನ್ನು ಹಿಡಿಯಲಾಗಿದೆ.

ದೇಶವು ಅಧಿಕೃತವಾಗಿ ಕೋವಿಡ್ ಪ್ರೋಟೋಕಾಲ್ ಮೇಲೆ ವಿನಾಯಿತಿ ನೀಡುವವರೆಗೂ ಸೂಚನೆಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವಂತೆ ಸಂಬಂಧಪಟ್ಟ ಇಲಾಖೆಗಳು ಸಾರ್ವಜನಿಕರನ್ನು ಕೋರಿವೆ.