ರೆಸಿಡೆನ್ಸಿ ನಿಯಮ ತಿದ್ದುಪಡಿ- ವಿದೇಶಿಯರಿಗೆ ಇನ್ನು ಮುಂದೆ ಸ್ಪಾನ್ಸರ್ ರಹಿತವಾಗಿ ವೀಸಾ ಲಭ್ಯ

ಮಸ್ಕತ್: ವಿದೇಶಿ ಹೂಡಿಕೆದಾರರು ಮತ್ತು ಆಸ್ತಿ ಮಾಲೀಕರಿಗೆ ಭಾರಿ ರಿಯಾಯಿತಿಗಳನ್ನು ಘೋಷಿಸುವ ಮೂಲಕ ಒಮಾನ್‌ನಲ್ಲಿ ಹೊಸ ರೆಸಿಡೆನ್ಸಿ ಕಾನೂನು ತಿದ್ದುಪಡಿಯನ್ನು ಹೊರಡಿಸಲಾಗಿದೆ. ಹೊಸ ಕಾನೂನಿನ ಪ್ರಕಾರ, ಅರ್ಹ ವಿದೇಶಿ ನಾಗರಿಕರು ಒಮಾನಿ ಸ್ಪಾನ್ಸರ್ ನೆರವಿನ ಅಗತ್ಯವಿಲ್ಲದೆಯೇ ರೆಸಿಡೆನ್ಸಿ ಪರ್ಮಿಟ್ ಮತ್ತು ವೀಸಾಗಳನ್ನು ಪಡೆದುಕೊಳ್ಳಬಹುದು.

ರಾಯಲ್ ಒಮಾನ್ ಪೊಲೀಸ್ ಇನ್ಸ್‌ಪೆಕ್ಟರ್ ಜನರಲ್ ಹಸನ್ ಬಿನ್ ಮೊಹ್ಸಿನ್ ಅಲ್ ಶುರೈಕಿ ಹೊರಡಿಸಿದ ಆದೇಶದ ಅನ್ವಯ ಈ ಸುಧಾರಣೆಯನ್ನು ಜಾರಿಗೆ ತರಲಾಗುತ್ತಿದೆ. ಒಮಾನ್‌ನಲ್ಲಿ ಹೆಚ್ಚು ಉದ್ಯಮ ಸ್ನೇಹಿ ವಾತಾವರಣವನ್ನು ಕಲ್ಪಿಸುವುದು ಮತ್ತು ವಿದೇಶಿಯರಿಗಾಗಿ ವೀಸಾ ಪ್ರಕ್ರಿಯೆಗಳನ್ನು ಸರಳಗೊಳಿಸುವುದು ಇದರ ಪ್ರಮುಖ ಉದ್ದೇಶವಾಗಿದೆ.

ಹೊಸ ನಿಯಮಾವಳಿಗಳ ಪ್ರಕಾರ, ನಿರ್ಮಾಣಕ್ಕಾಗಿ ಮಂಜೂರು ಮಾಡಲಾದ ಭೂಮಿ ಅಥವಾ ನೋಂದಣಿ ಪ್ರಕ್ರಿಯೆಯಲ್ಲಿರುವ ರಿಯಲ್ ಎಸ್ಟೇಟ್ ಯೂನಿಟ್‌ಗಳನ್ನು ಖರೀದಿಸುವ ವಿದೇಶಿಯರು, ಸಂಬಂಧಪಟ್ಟ ಅಧಿಕೃತ ಸಂಸ್ಥೆಯ ಧೃಢೀಕರಣದ ಆಧಾರದ ಮೇಲೆ ಸ್ಪಾನ್ಸರ್ ಇಲ್ಲದೆಯೇ ವೀಸಾ ಮತ್ತು ರೆಸಿಡೆನ್ಸಿಗಾಗಿ ಅರ್ಜಿ ಸಲ್ಲಿಸಬಹುದು. ಆಸ್ತಿ ಮಾಲೀಕರ ಸಂಗಾತಿಗಳು (ಪತಿ/ಪತ್ನಿ) ಮತ್ತು ಪ್ರಥಮ ದರ್ಜೆಯ ರಕ್ತಸಂಬಂಧಿಗಳಿಗೆ ಹಾಗೂ ಒಮಾನ್‌ನಲ್ಲಿ ಭೂಮಿ ಅಥವಾ ರಿಯಲ್ ಎಸ್ಟೇಟ್ ಯೂನಿಟ್‌ಗಳನ್ನು ಹೊಂದಿರುವ ಕಂಪನಿಗಳ ಕಾನೂನುಬದ್ಧ ಪ್ರತಿನಿಧಿಗಳಿಗೂ ಈ ಸೌಲಭ್ಯ ಲಭ್ಯವಿರಲಿದೆ.

ಆರು ತಿಂಗಳಿಂದ ಒಂದು ವರ್ಷದವರೆಗೆ ಅವಧಿಯನ್ನು ಹೊಂದಿರುವ ಇಂತಹ ವೀಸಾಗಳು, ಆಸ್ತಿಯನ್ನು ಮಾರಾಟ ಮಾಡಿದರೆ ಅಥವಾ ಕಾನೂನುಬದ್ಧ ವಹಿವಾಟಿನ ಮೂಲಕ ಬೇರೆಯವರಿಗೆ ವರ್ಗಾಯಿಸಿದರೆ, ವಿದೇಶಿ ಮಾಲೀಕರು ಮತ್ತು ಅವರ ಕುಟುಂಬದ ಸದಸ್ಯರ ರೆಸಿಡೆನ್ಸಿ ಅನುಮತಿಯೊಂದಿಗೆ ಸ್ವಯಂಚಾಲಿತವಾಗಿ ರದ್ದಾಗಲಿವೆ.