ಆರು ವಿಭಾಗ ಜನರಿಗೆ ಮಕ್ಕಾ ಪ್ರವೇಶಕ್ಕೆ ಅನುಮತಿ- ಅಬ್ಶೀರ್ ಮೂಲಕ ಅರ್ಜಿ ಸಲ್ಲಿಸಲು ಅವಕಾಶ

ಜಿದ್ದಾ: ಈ ವರ್ಷದ ಹಜ್ ಸೀಸನ್ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕೆ ಕ್ರಮವಾಗಿ ಮಕ್ಕಾ ಪ್ರವೇಶಕ್ಕೆ ಅಗತ್ಯವಿರುವ ಅನುಮತಿ ಪತ್ರವನ್ನು (Entry Permit) ಪಡೆಯುವ ಪ್ರಕ್ರಿಯೆಯನ್ನು ಸೌದಿ ಪಾಸ್‌ಪೋರ್ಟ್ ವಿಭಾಗ (ಜವಾಝಾತ್) ಮತ್ತಷ್ಟು ಸುಲಭಗೊಳಿಸಿದೆ. ಈಗ ಆಯ್ದ ಆರು ವಿಭಾಗಗಳ ಜನರು ‘ಅಬ್ಶಿರ್’ (Absher) ಪ್ಲಾಟ್‌ಫಾರ್ಮ್ ಮೂಲಕ ನೇರವಾಗಿ ಆನ್‌ಲೈನ್‌ನಲ್ಲಿ ಅರ್ಜಿ ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.
ನೇರ ಪರ್ಮಿಟ್‌ಗೆ ಅರ್ಹರಾದ ಆರು ವಿಭಾಗಗಳು:
ಹಜ್ ಭದ್ರತಾ ಕ್ರಮಗಳ ಭಾಗವಾಗಿ ಏಪ್ರಿಲ್ 19 (ದುಲ್ ಖಅದ್ 1) ರಿಂದ ಮಕ್ಕಾ ಮತ್ತು ಪವಿತ್ರ ಸ್ಥಳಗಳಿಗೆ ಅನುಮತಿ ಪತ್ರವಿಲ್ಲದವರ ಪ್ರವೇಶವನ್ನು ನಿಷೇಧಿಸಲಾಗಿದೆ. ಈ ಹಿನ್ನೆಲೆಯಲ್ಲಿ ಈ ಕೆಳಗಿನ ವರ್ಗದವರಿಗೆ ಆನ್‌ಲೈನ್ ಸೌಲಭ್ಯವನ್ನು ವಿಸ್ತರಿಸಲಾಗಿದೆ:

1. ಪ್ರೀಮಿಯಂ ರೆಸಿಡೆನ್ಸಿ ಹೊಂದಿರುವವರು.
2. ಹೂಡಿಕೆದಾರರು (Investors).
3. ಜಿ.ಸಿ.ಸಿ (GCC) ರಾಷ್ಟ್ರಗಳ ನಾಗರಿಕರು.
4. ಸೌದಿ ನಾಗರಿಕರ ವಿದೇಶಿ ಪತ್ನಿಯರು/ತಾಯಂದಿರು.
5. ಸೌದಿ ನಾಗರಿಕರ ವಿದೇಶಿ ಕುಟುಂಬ ಸದಸ್ಯರು.
6. ಮನೆಯ ಕೆಲಸದವರು (Domestic Workers).

ಕಾರ್ಮಿಕರಿಗೂ ಆನ್‌ಲೈನ್ ವ್ಯವಸ್ಥೆ:
ಇದಲ್ಲದೆ, ಸಾಮಾನ್ಯ ಕಾರ್ಮಿಕರಿಗೆ ಅಗತ್ಯವಿರುವ ಪರ್ಮಿಟ್‌ಗಳಿಗಾಗಿ ಅವರ ಉದ್ಯೋಗದಾತರು (Sponsors) ‘ಅಬ್ಶಿರ್’ ಅಥವಾ ‘ಮುಖೀಮ್’ ಪೋರ್ಟಲ್ ಮೂಲಕ ಅರ್ಜಿ ಸಲ್ಲಿಸಬಹುದು. ಈ ಪ್ರಕ್ರಿಯೆಗಾಗಿ ಜವಾಝಾತ್ ಕಚೇರಿಗಳಿಗೆ ಖುದ್ದಾಗಿ ಭೇಟಿ ನೀಡುವ ಅಗತ್ಯವಿಲ್ಲ ಎಂದು ಸ್ಪಷ್ಟಪಡಿಸಲಾಗಿದೆ.

ಕಟ್ಟುನಿಟ್ಟಿನ ತಪಾಸಣೆ:
ಹಜ್ ಭದ್ರತಾ ಪಡೆಯ ನಿರ್ದೇಶನದಂತೆ, ಪ್ರಸ್ತುತ ಈ ಕೆಳಗಿನವರಿಗೆ ಮಾತ್ರ ಮೆಕ್ಕಾ ಪ್ರವೇಶಕ್ಕೆ ಅನುಮತಿ ನೀಡಲಾಗುವುದು:
1. ಮೆಕ್ಕಾದಲ್ಲಿ ಕೆಲಸ ಮಾಡುವ ಪರ್ಮಿಟ್ ಹೊಂದಿರುವವರು.
2. ಮೆಕ್ಕಾ ವಿಳಾಸದ ಅಧಿಕೃತ ‘ಇಕಾಮಾ’ (Iqama) ಹೊಂದಿರುವವರು.
3. ಸಿಂಧುತ್ವವಿರುವ ಹಜ್ ಪರ್ಮಿಟ್ ಹೊಂದಿರುವವರು.
ಸೂಕ್ತ ದಾಖಲೆ ಅಥವಾ ಪರ್ಮಿಟ್ ಇಲ್ಲದೆ ಆಗಮಿಸುವ ನಿವಾಸಿಗಳನ್ನು ಚೆಕ್ ಪೋಸ್ಟ್‌ಗಳಿಂದಲೇ ವಾಪಸ್ ಕಳುಹಿಸಲಾಗುವುದು. ಹಜ್ ಯಾತ್ರೆಯನ್ನು ಸುರಕ್ಷಿತವಾಗಿಸಲು ಮತ್ತು ಜನದಟ್ಟಣೆಯನ್ನು ನಿಯಂತ್ರಿಸಲು ಸೌದಿ ಸರ್ಕಾರ ಈ ಕಟ್ಟುನಿಟ್ಟಿನ ಕ್ರಮಗಳನ್ನು ಕೈಗೊಂಡಿದೆ.