ಅಮೆರಿಕದ ದಿಗ್ಗಜ ಕಂಪನಿಗಳಿಗೆ ಇರಾನ್ ಎಚ್ಚರಿಕೆ: ಏಪ್ರಿಲ್ 1ರಿಂದ ಆಪಲ್, ಗೂಗಲ್ ಮೇಲೆ ದಾಳಿಯ ಭೀತಿ?

ಟೆಹ್ರಾನ್: ತನ್ನ ಭೂಪ್ರದೇಶದ ಮೇಲೆ ನಡೆದ ಸರಣಿ ದಾಳಿಗಳಿಗೆ ಪ್ರತೀಕಾರ ತೀರಿಸಿಕೊಳ್ಳಲು ಇರಾನ್ ಈಗ ನೇರವಾಗಿ ಅಮೆರಿಕದ ಪ್ರಮುಖ ತಂತ್ರಜ್ಞಾನ ಮತ್ತು ಕೈಗಾರಿಕಾ ಸಂಸ್ಥೆಗಳನ್ನು ಗುರಿಯಾಗಿಸಿಕೊಂಡಿದೆ. ಏಪ್ರಿಲ್ 1ರಿಂದ ಆಪಲ್, ಮೈಕ್ರೋಸಾಫ್ಟ್ ಮತ್ತು ಗೂಗಲ್ ಸೇರಿದಂತೆ 18 ಜಾಗತಿಕ ಕಂಪನಿಗಳ ಮೇಲೆ ದಾಳಿ ನಡೆಸುವುದಾಗಿ ಇರಾನ್‌ನ ರೆವಲ್ಯೂಷನರಿ ಗಾರ್ಡ್ಸ್ (IRGC) ಆತಂಕಕಾರಿ ಎಚ್ಚರಿಕೆ ನೀಡಿದೆ.
ದಾಳಿಯ ಸಮಯ ಮತ್ತು ಗುರಿ
ಇರಾನ್ ಪ್ರಕಟಣೆಯ ಪ್ರಕಾರ, ಬುಧವಾರ (ಏಪ್ರಿಲ್ 1) ತೆಹ್ರಾನ್ ಸಮಯ ರಾತ್ರಿ 8 ಗಂಟೆಗೆ (ಭಾರತೀಯ ಕಾಲಮಾನ ರಾತ್ರಿ 10 ಗಂಟೆ) ಈ ಕಾರ್ಯಾಚರಣೆ ಆರಂಭವಾಗಲಿದೆ. ಈ ಕಂಪನಿಗಳ ಪ್ರಾದೇಶಿಕ ಕಚೇರಿಗಳು ಮತ್ತು ಕಾರ್ಯಾಚರಣೆ ಕೇಂದ್ರಗಳ ಮೇಲೆ ದಾಳಿ ನಡೆಯುವ ಸಾಧ್ಯತೆಯಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಈ ಸಂಸ್ಥೆಗಳಲ್ಲಿ ಕಾರ್ಯನಿರ್ವಹಿಸುತ್ತಿರುವ ಉದ್ಯೋಗಿಗಳು ತಕ್ಷಣವೇ ಕೆಲಸದ ಸ್ಥಳಗಳನ್ನು ಖಾಲಿ ಮಾಡುವಂತೆ IRGC ಸೂಚಿಸಿದೆ.
ಪಟ್ಟಿಯಲ್ಲಿರುವ ಪ್ರಮುಖ ಕಂಪನಿಗಳು:
ಇರಾನ್ ಬಿಡುಗಡೆ ಮಾಡಿರುವ 18 ಕಂಪನಿಗಳ ಪಟ್ಟಿಯಲ್ಲಿ ತಂತ್ರಜ್ಞಾನ ಲೋಕದ ದಿಗ್ಗಜರ ಹೆಸರುಗಳಿವೆ:
ಮೈಕ್ರೋಸಾಫ್ಟ್, ಗೂಗಲ್, ಆಪಲ್, ಇಂಟೆಲ್, ಐಬಿಎಂ, ಟೆಸ್ಲಾ (ಆಟೋಮೊಬೈಲ್), ಬೋಯಿಂಗ್ (ವೈಮಾನಿಕ).
ಇರಾನ್ ಆರೋಪವೇನು?
ಅಮೆರಿಕದ ಮಿಲಿಟರಿ ಕಾರ್ಯಾಚರಣೆಗಳಿಗೆ ತಾಂತ್ರಿಕ ನೆರವು ನೀಡುವ ಐಸಿಟಿ (ICT) ಮತ್ತು ಕೃತಕ ಬುದ್ಧಿಮತ್ತೆ (AI) ಕಂಪನಿಗಳನ್ನು ಇನ್ನು ಮುಂದೆ ತನ್ನ ‘ಕಾನೂನುಬದ್ಧ ಗುರಿಗಳು’ ಎಂದು ಇರಾನ್ ಘೋಷಿಸಿದೆ.
ಉಪಗ್ರಹ ಚಿತ್ರಗಳು, ಡ್ರೋನ್ ತಂತ್ರಜ್ಞಾನ ಮತ್ತು ಎಐ ವ್ಯವಸ್ಥೆಗಳ ಮೂಲಕ ಅಮೆರಿಕವು ಇರಾನ್ ವಿರುದ್ಧ ಮಿಲಿಟರಿ ಸಂಚು ರೂಪಿಸುತ್ತಿದೆ ಎಂಬುದು ತೆಹ್ರಾನ್‌ನ ಪ್ರಬಲ ವಾದ. ಇರಾನ್‌ನಲ್ಲಿ ನಡೆಯುತ್ತಿರುವ ಭಯೋತ್ಪಾದನಾ ಚಟುವಟಿಕೆಗಳಿಗೆ ಈ ಕಂಪನಿಗಳ ತಂತ್ರಜ್ಞಾನವೇ ಮೂಲಾಧಾರವಾಗಿದೆ, ಆದ್ದರಿಂದ ಪ್ರತಿಯೊಂದು ದಾಳಿಗೂ ಪ್ರತಿಯಾಗಿ ಈ ಕಂಪನಿಗಳ ಘಟಕಗಳನ್ನು ನಾಶಪಡಿಸಲಾಗುವುದು ಎಂದು ಇರಾನ್‌ನ ತಸ್ನಿಮ್ ಸುದ್ದಿ ಸಂಸ್ಥೆ ವರದಿ ಮಾಡಿದೆ.