ಸಂದರ್ಶನ ವೀಸಾದಲ್ಲಿರುವ ಪ್ರವಾಸಿಗರಿಗೆ ಶುಭ ಸುದ್ದಿ- ಉದ್ಯೋಗ ವೀಸಾಗೆ ಬದಲಿಸಲು ‘ಎಕ್ಸಿಟ್’ ಅಗತ್ಯವಿಲ್ಲ

ಮಸ್ಕತ್: ಸಂದರ್ಶನ ವೀಸಾದಲ್ಲಿ (Visit Visa) ಒಮಾನ್‌ಗೆ ಬಂದಿರುವ ಪ್ರವಾಸಿಗರು ಉದ್ಯೋಗ ವೀಸಾಗೆ (Work Visa) ಬದಲಾಗುವುದನ್ನು ರಾಯಲ್ ಒಮಾನ್ ಪೊಲೀಸ್ (ROP) ಈಗ ಇನ್ನಷ್ಟು ಸುಲಭಗೊಳಿಸಿದೆ. ಪ್ರಸ್ತುತ ದೇಶವನ್ನು ಬಿಟ್ಟು ಹೊರಹೋಗದೆಯೇ ವೀಸಾ ಬದಲಾಯಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿದೆ. ಈ ಸಂಬಂಧ ರಾಯಲ್ ಒಮಾನ್ ಪೊಲೀಸ್ ನಿಯಮದಲ್ಲಿ ತಾತ್ಕಾಲಿಕ ಸಡಿಲಿಕೆ ಮಾಡಿದೆ.

ಪ್ರಾದೇಶಿಕ ಸಂಘರ್ಷಗಳು ಉಲ್ಬಣಗೊಂಡಿರುವುದು ಮತ್ತು ವಿಮಾನ ಸೇವೆಗಳು ಸೇರಿದಂತೆ ಹಲವು ಸಾರಿಗೆ ಸೌಲಭ್ಯಗಳು ರದ್ದಾಗಿರುವ ಹಿನ್ನೆಲೆಯಲ್ಲಿ ವೀಸಾ ನಿಯಮದಲ್ಲಿ ಈ ತಾತ್ಕಾಲಿಕ ಸಡಿಲಿಕೆ ನೀಡಲಾಗಿದೆ ಎಂದು ತಿಳಿದುಬಂದಿದೆ.

ಆದರೆ, ಈ ಬಗ್ಗೆ ರಾಯಲ್ ಒಮಾನ್ ಪೊಲೀಸ್ ಯಾವುದೇ ಅಧಿಕೃತ ಪ್ರಕಟಣೆಯನ್ನು ಹೊರಡಿಸಿಲ್ಲ. ಆದಾಗ್ಯೂ, ಸಂದರ್ಶನ ವೀಸಾದಲ್ಲಿ ಒಮಾನ್‌ಗೆ ಬಂದಿದ್ದ ಅನೇಕರು ಕಳೆದ ಕೆಲವು ದಿನಗಳಲ್ಲಿ ದೇಶ ಬಿಟ್ಟು ಹೋಗದೆಯೇ ಉದ್ಯೋಗ ವೀಸಾಗೆ ಬದಲಾಗಿದ್ದಾರೆ. ಪ್ರಸ್ತುತ ಇವರಿಗೆ ದೇಶ ಬಿಡದೆಯೇ ವೀಸಾ ಬದಲಾವಣೆಗೆ ಅನುಮತಿ ನೀಡಲಾಗುತ್ತಿದೆ. ಇದಕ್ಕೆ ಹೆಚ್ಚುವರಿಯಾಗಿ 50 ರಿಯಾಲ್ ವೆಚ್ಚವಾಗುತ್ತದೆ.

ಹಿಂದಿನ ನಿಯಮದಂತೆ, ಸಂದರ್ಶನ ವೀಸಾದಲ್ಲಿರುವ ಪ್ರವಾಸಿಗರು ಉದ್ಯೋಗ ವೀಸಾಗೆ ಬದಲಾಗಲು ಒಮಾನ್‌ನಿಂದ ಹೊರಹೋಗಿ (Exit) ಮತ್ತೆ ಬರಬೇಕಾಗಿತ್ತು. ಈ ಪರಿಷ್ಕೃತ ನಿಯಮವು ಎರಡು ವರ್ಷಗಳ ಹಿಂದೆ ಜಾರಿಗೆ ಬಂದಿತ್ತು. ಈಗ ನೀಡಿರುವ ಸಡಿಲಿಕೆಯು ತಾತ್ಕಾಲಿಕವಾಗಿದ್ದರೂ, ಕನ್ನಡಿಗರು ಸೇರಿದಂತೆ ಎಲ್ಲಾ ಪ್ರವಾಸಿಗರಿಗೆ ಇದು ದೊಡ್ಡ ಸಮಾಧಾನ ತಂದಿದೆ.