ಕೋವಿಡ್: 15 ದಿನಗಳೊಳಗೆ ದಂಡ ಪಾವತಿಸದಿದ್ದಲ್ಲಿ ಪ್ರಕರಣ ದಾಖಲು- ವಲಸಿಗರು ಕಂಗಾಲು

ರಿಯಾದ್: ಸೌದಿ ಅರೇಬಿಯಾದಲ್ಲಿ(Saudi Arabia), ಕೋವಿಡ್ ನಿಯಮಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ವ್ಯಕ್ತಿಗಳಿಗೆ ವಿಧಿಸಲಾದ 10,000 ರಿಯಾಲ್‌ಗಳ ದಂಡವನ್ನು 15 ದಿನಗಳಲ್ಲಿ ಪಾವತಿಸುವಂತೆ ಅಂತಿಮ ಗಡುವು ನೀಡಲಾಗಿದೆ. ತಪ್ಪಿದ್ದಲ್ಲಿ, ಕುಂದುಕೊರತೆಗಳ ಮಂಡಳಿಯಲ್ಲಿ (Diwan Al Madhalim) ಪ್ರಕರಣ ದಾಖಲಿಸಲಾಗುವುದು ಎಂದು ರಾಷ್ಟ್ರೀಯ ಉಲ್ಲಂಘನೆಗಳ ವೇದಿಕೆ National Violations Forum (ifaa) ಎಚ್ಚರಿಸಿದೆ.

ಕಳೆದೆರಡು ದಿನಗಳಿಂದ 10,000 ರಿಯಾಲ್ ದಂಡ ಪಡೆದವರು ಕೂಡಲೇ ಪಾವತಿಸುವಂತೆ ಮೊಬೈಲ್ ಗೆ ಸಂದೇಶ ಬರುತ್ತಿದೆ. ಇದೇ ವೇಳೆ, ದಂಡದ ಸಂದೇಶವನ್ನು ಪಡೆದವರು ಸುಮಾರು ಮೂರು ವರ್ಷಗಳಿಂದ ಪಾವತಿಸಲು ಸಾಧ್ಯವಾಗದ ದಂಡವನ್ನು 15 ದಿನದಲ್ಲಿ ಹೇಗೆ ಪಾವತಿಸುವುದು ಎಂಬ ಚಿಂತೆಯಲ್ಲಿದ್ದಾರೆ.

ಹತ್ತು ಸಾವಿರ ರಿಯಾಲ್ (Ten Thousands Riyal) ದಂಡ ಪಡೆದವರಿಗೆ ಮಾತ್ರ ಸದ್ಯಕ್ಕೆ ಸಂದೇಶ ಬರುತ್ತಿದ್ದು,1,000 ರಿಯಾಲ್ ದಂಡವಿರುವವರಿಗೆ ಸಂದೇಶ ಇನ್ನೂ ತಲುಪಿಲ್ಲ. ಈ ಸಂದೇಶ ಬಂದ 15 ದಿನಗಳೊಳಗೆ ನಿಗದಿತ ಬಿಲ್ ನಂಬರ್ ಮೂಲಕ ಹತ್ತು ಸಾವಿರ ರಿಯಾಲ್ ಪಾವತಿಸಬೇಕು ಮತ್ತು ಇದನ್ನು ಅಂತಿಮ ಎಚ್ಚರಿಕೆ ಎಂದು ಪರಿಗಣಿಸಬೇಕು ಎಂದು ಸಂದೇಶದಲ್ಲಿ ತಿಳಿಸಲಾಗಿದೆ.

ಕೋವಿಡ್ ಅವಧಿಯಲ್ಲಿ, ಮಾಸ್ಕ್ ಧರಿಸದಿರುವುದು ಮತ್ತು ಪರವಾನಗಿ ಇಲ್ಲದೆ ಹೊರಗೆ ಹೋಗುವುದು ಮುಂತಾದ ಉಲ್ಲಂಘನೆಗಳಿಗೆ ದಂಡವನ್ನು ವಿಧಿಸಲಾಗಿತ್ತು. ಆದರೆ, ಅಂದು ದಂಡದ ಸಂದೇಶ ಬಂದಿದ್ದರೂ ಇಖಾಮ ನವೀಕರಿಸಲು ಅಥವಾ ರೀ ಎಂಟ್ರಿ ಮತ್ತು ಫೈನಲ್ ಎಕ್ಸಿಟ್ ಗೆ ಯಾವುದೇ ಅಡ್ಡಿಯಾಗಲಿಲ್ಲ. ಈ ಕಾರಣದಿಂದಾಗಿ ಹಲವರು ದಂಡ ಪಾವತಿಸಿರಲಿಲ್ಲ.

ಕೋವಿಡ್ ಹರಡುವಿಕೆ ಮುಗಿದ ನಂತರ ಮತ್ತು ಷರತ್ತುಗಳನ್ನು ಹಿಂಪಡೆದ ನಂತರ ಈ ದಂಡವನ್ನು ಮನ್ನಾ ಮಾಡಲಾಗುವುದು ಎಂಬುದು ಹಲವರ ನಿರೀಕ್ಷೆಯಾಗಿತ್ತು. ಆದರೆ, ಇದೀಗ ಅಂತಿಮ ಎಚ್ಚರಿಕೆ ಬಂದಿರುವುದರಿಂದ ಎಲ್ಲರೂ ಆತಂಕಕ್ಕೊಳಗಾಗಿದ್ದಾರೆ.