ಕುವೈತ್: ನಕಲಿ ಕಂಪನಿಗಳ ಹೆಸರಿನಲ್ಲಿ ವೀಸಾ ವ್ಯಾಪಾರ- ವ್ಯಾಪಕ ತಪಾಸಣೆ

ಕುವೈತ್ ಸಿಟಿ: ನಕಲಿ ಕಂಪನಿಗಳ ಹೆಸರಿನಲ್ಲಿ ವೀಸಾ ವ್ಯಾಪಾರ ನಡೆಸುವವರ ವಿರುದ್ಧ ಕುವೈತ್ (Kuwait) ಸರ್ಕಾರ ಕಠಿಣ ಕ್ರಮಕ್ಕೆ ಮುಂದಾಗಿದೆ. ಕಳೆದ ದಿನ ಅಬ್ಬಾಸಿಯಾ ಪ್ರದೇಶದಲ್ಲಿ ನಡೆದ ಅಭಿಯಾನದಲ್ಲಿ ಮಾನವಶಕ್ತಿ ಮತ್ತು ಗೃಹ ಸಚಿವಾಲಯದ ಸಾರ್ವಜನಿಕ ಪ್ರಾಧಿಕಾರದ ಅಧಿಕಾರಿಗಳು ಭಾಗವಹಿಸಿದ್ದರು.

ತಪಾಸಣೆ ವೇಳೆ ಸುಮಾರು 80 ನಕಲಿ ಕಂಪನಿಗಳು ಅಕ್ರಮ ನಡೆಸುತ್ತಿರುವ ಬಗ್ಗೆ ಉನ್ನತ ಅಧಿಕಾರಿಗಳಿಗೆ ವರದಿ ಸಲ್ಲಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ದೇಶದಲ್ಲಿ ಅಗತ್ಯಕ್ಕಿಂತ ಹೆಚ್ಚು ಕಾರ್ಮಿಕರಿಲ್ಲದಂತೆ ಮತ್ತು ಶಾಡೋ(Shado) ಕಂಪನಿಗಳ ಹೆಸರಿನಲ್ಲಿ ವೀಸಾ ನೀಡುವುದನ್ನು ತಪ್ಪಿಸಲು ಸಾರ್ವಜನಿಕ ಪ್ರಾಧಿಕಾರವು ಹಲವು ಕ್ರಮಗಳನ್ನು ಕೈಗೊಂಡಿದೆ.

ಶಂಕಿತ ಕಂಪನಿಗಳ ಹೆಚ್ಚಿನ ವಿವರಗಳನ್ನು ವಾಣಿಜ್ಯ ಸಚಿವಾಲಯದ ಸಹಯೋಗದೊಂದಿಗೆ ಪರಿಶೀಲಿಸಲಾಗುತ್ತದೆ. ನಕಲಿ ವಹಿವಾಟು ಪತ್ತೆಯಾದರೆ ಕಂಪನಿಗಳ ಕಡತಗಳನ್ನು ಸ್ಥಗಿತಗೊಳಿಸಲಾಗುವುದು ಮತ್ತು ಗೃಹ ಸಚಿವಾಲಯದ ಸಹಕಾರದೊಂದಿಗೆ ಸಂಸ್ಥೆಗಳಿಗೆ ಸಂಬಂಧಿಸಿದ ಕಾರ್ಮಿಕರ ನಿವಾಸದ ಬಗ್ಗೆ ನಿರ್ಧಾರ ತೆಗೆದುಕೊಳ್ಳಲಾಗುವುದು ಎಂದು ಮಾನವಶಕ್ತಿ ಸಾರ್ವಜನಿಕ ಪ್ರಾಧಿಕಾರದ(Public Authority Of Manpower) ಅಧಿಕಾರಿಗಳು ತಿಳಿಸಿದ್ದಾರೆ.

ಮಾನವ ಕಳ್ಳಸಾಗಣೆ ಮತ್ತು ಅಕ್ರಮ ವೀಸಾ ವ್ಯಾಪಾರವನ್ನು ತಡೆಗಟ್ಟುವ ಭಾಗವಾಗಿ, ಅಧಿಕಾರಿಗಳು ದೇಶದ ಉದ್ಯೋಗ ಸಂಸ್ಥೆಗಳಲ್ಲಿ ತಪಾಸಣೆಯನ್ನು ವ್ಯಾಪಕಗೊಳಿಸಿದ್ದಾರೆ ಮತ್ತು ನೇಮಕಗೊಂಡ ಉದ್ಯೋಗಿಗಳು ಕಂಪನಿ ಮತ್ತು ಕೆಲಸದ ಸ್ಥಳದಲ್ಲಿ ಇದ್ದಾರೆಯೇ ಎಂದು ಪರಿಶೀಲಿಸಲಾಗುವುದು ಎಂದು ಹೇಳಿದರು.