ಯುಎಇ ಮತ್ತು ಕುವೈತ್‌ನಲ್ಲಿ ಅಕ್ಟೋಬರ್ 21 ರಂದು ಈದ್ ಮೀಲಾದ್ ರಜೆ

ಅಬುಧಾಬಿ:ಲೋಕಾನುಗ್ರಹಿ ಪ್ರವಾದಿ ಮುಹಮ್ಮದ್ (ಸ) ರ ಜನ್ಮದಿನಾಚರಣೆಯ ಅಂಗವಾಗಿ ಅಕ್ಟೋಬರ್ 21 ರ ಗುರುವಾರದಂದು ಸಾರ್ವಜನಿಕ ರಜಾದಿನವಾಗಿದೆ ಎಂದು ಯುಎಇ ಮಾನವ ಸಂಪನ್ಮೂಲ ಸಚಿವಾಲಯವು ಘೋಷಿಸಿದೆ.

ಇಸ್ಲಾಮಿಕ್ ಕ್ಯಾಲೆಂಡರ್‌ನ ಮೂರನೇ ತಿಂಗಳಾದ,ರಬೀಉಲ್ ಅವ್ವಲ್,12 ನೇ ದಿನ ಪ್ರವಾದಿ ಮುಹಮ್ಮದ್ (ಸ) ಅವರ ಜನ್ಮದಿನವಾಗಿದೆ. ಪ್ರವಾದಿ ಮುಹಮ್ಮದ್ (ಸ) ರವರ ಜನ್ಮದಿನವನ್ನು ಆಚರಿಸಲು ಗಲ್ಫ್ ರಾಜ್ಯಗಳು ಸೇರಿದಂತೆ 12 ಇಸ್ಲಾಮಿಕ್ ದೇಶಗಳಲ್ಲಿ ರಬೀವುಲ್ ಅವ್ವಲ್ 12 ರಂದು ರಜಾದಿನವನ್ನಾಗಿ ಘೋಷಿಸಿದೆ.

ಯುಎಇಯಲ್ಲಿ ಸಾರ್ವಜನಿಕ ಮತ್ತು ಖಾಸಗಿ ವಲಯಗಳ ರಜಾದಿನಗಳನ್ನು ಸಂಯೋಜಿಸಿರುವ ಹಿನ್ನೆಲೆಯಲ್ಲಿ ಖಾಸಗಿ ವಲಯದಲ್ಲೂ ಅಕ್ಟೋಬರ್ 21 ರಿಂದ ದೀರ್ಘ ವಾರಾಂತ್ಯ ಲಭಿಸಲಿದೆ.ಅಕ್ಟೋಬರ್ 21 ರ ಗುರುವಾರದಿಂದ ಅಕ್ಟೋಬರ್ 23 ರ ಶನಿವಾರದವರೆಗೆ ಸತತ ಮೂರು ರಜಾದಿನಗಳಿರುತ್ತದೆ.

ಆದರೆ ಖಾಸಗಿ ವಲಯದಲ್ಲಿ ರಜಾದಿನಗಳನ್ನು ಮಾನವ ಸಂಪನ್ಮೂಲ ಸಚಿವಾಲಯ ದೃಢ ಪಡಿಸಬೇಕಾಗಿದೆ.

ಕುವೈತ್‌ನಲ್ಲಿ ಪ್ರವಾದಿ ಜನ್ಮದಿನಾಚರಣೆಯ ರಜೆಯು ಅಕ್ಟೋಬರ್ 21 ಗುರುವಾರ. ಈ ನಿಟ್ಟಿನಲ್ಲಿ ನಾಗರಿಕ ಸೇವಾ ಆಯೋಗದ ಶಿಫಾರಸಿಗೆ ಸಂಪುಟ ಅನುಮೋದನೆ ನೀಡಿದೆ. ಈ ತಿಂಗಳ 18 ರಂದು ರಜೆ ಬರಬೇಕಿತ್ತು. ಇದನ್ನು ಅಕ್ಟೋಬರ್ 21 ಗುರುವಾರಕ್ಕೆ ಮುಂದೂಡಲಾಯಿತು.

ಶುಕ್ರವಾರ, ಶನಿವಾರಗಳ ವಾರಾಂತ್ಯದ ರಜಾದಿನಗಳು ಸೇರಿದಂತೆ ಸತತ ಮೂರು ದಿನಗಳ ರಜೆ ಲಭಿಸಲಿದೆ.