ಹಜ್ ಯಾತ್ರಿಕರಿಗೆ ಡಿಜಿಟಲ್ ದಾಖಲೆಗಳ ಸೌಲಭ್ಯ- ಪಾಸ್‌ಪೋರ್ಟ್‌ಗಳ ಅಗತ್ಯವಿಲ್ಲ

ರಿಯಾದ್: ಸೌದಿ ಅರೇಬಿಯಾದ ಒಳಗೆ ಹಜ್ ಯಾತ್ರಿಕರ ಪ್ರಯಾಣವನ್ನು ಸುಗಮಗೊಳಿಸುವ ಉದ್ದೇಶದಿಂದ ಸೌದಿ ಪಾಸ್‌ಪೋರ್ಟ್ ಮಹಾನಿರ್ದೇಶನಾಲಯವು (ಜವಾಝಾತ್) ಹೊಸ ಡಿಜಿಟಲ್ ಸೇವೆಯನ್ನು ಆರಂಭಿಸಿದೆ. ಇನ್ಮುಂದೆ ದೇಶಕ್ಕೆ ಆಗಮಿಸುವ ಹಜ್ ಯಾತ್ರಿಕರು ತಮ್ಮ ಸ್ಮಾರ್ಟ್‌ಫೋನ್‌ಗಳಲ್ಲಿ ‘ಡಿಜಿಟಲ್ ವಿಸಿಟರ್ ಐಡೆಂಟಿಟಿ’ಯನ್ನು (Digital Visitor Identity) ಅಧಿಕೃತ ದಾಖಲೆಯಾಗಿ ಬಳಸಬಹುದು. ಇದರಿಂದಾಗಿ ಪ್ರಯಾಣದ ಉದ್ದಕ್ಕೂ ಭೌತಿಕವಾಗಿ ಪಾಸ್‌ಪೋರ್ಟ್ ಅನ್ನು ಕೈಯಲ್ಲಿ ಹಿಡಿದುಕೊಂಡು ಓಡಾಡುವ ಅಗತ್ಯವಿರುವುದಿಲ್ಲ.

ಯಾತ್ರಿಕರು ‘ಅಬ್ಶೀರ್’ (Absher) ಅಪ್ಲಿಕೇಶನ್ ಅಥವಾ ಪ್ಲಾಟ್‌ಫಾರ್ಮ್ ಮೂಲಕ ತಮ್ಮ ಡಿಜಿಟಲ್ ಗುರುತಿನ ಚೀಟಿಗಾಗಿ ನೋಂದಾಯಿಸಿಕೊಳ್ಳಬಹುದು. ಸೌದಿ ಅರೇಬಿಯಾದೊಳಗೆ ಪ್ರಯಾಣಿಸುವಾಗ ಈ ಡಿಜಿಟಲ್ ಐಡಿಯನ್ನು ಪಾಸ್‌ಪೋರ್ಟ್‌ಗೆ ಸಮಾನವಾದ ಅಧಿಕೃತ ದಾಖಲೆಯಾಗಿ ಜವಾಝಾತ್ ಪರಿಗಣಿಸುತ್ತದೆ.
ಪ್ರಯಾಣದ ಸಮಯದಲ್ಲಿ ಪಾಸ್‌ಪೋರ್ಟ್‌ನಂತಹ ಮೂಲ ದಾಖಲೆಗಳು ಕಳೆದುಹೋಗುವ ಸಾಧ್ಯತೆಗಳನ್ನು ತಪ್ಪಿಸಲು ಮತ್ತು ತಪಾಸಣಾ ಪ್ರಕ್ರಿಯೆಗಳನ್ನು ಸರಳಗೊಳಿಸಲು ಈ ಕ್ರಮ ಕೈಗೊಳ್ಳಲಾಗಿದೆ.
ಪ್ರಯಾಣ ಸುಲಭ:ಈ ಡಿಜಿಟಲ್ ಐಡಿಯನ್ನು ತೋರಿಸುವ ಮೂಲಕ ಯಾತ್ರಿಕರು ದೇಶದ ಯಾವುದೇ ಭಾಗಕ್ಕೆ ಸುರಕ್ಷಿತವಾಗಿ ಮತ್ತು ಸುಲಭವಾಗಿ ಪ್ರಯಾಣಿಸಬಹುದು.
ಹಜ್ ಯಾತ್ರಿಕರ ಅನುಕೂಲಕ್ಕಾಗಿ ಸೌದಿ ಸರ್ಕಾರವು ಜಾರಿಗೆ ತರುತ್ತಿರುವ ಸುಧಾರಿತ ಡಿಜಿಟಲ್ ಸೇವೆಗಳ ಭಾಗವಾಗಿ ಈ ಹೊಸ ವ್ಯವಸ್ಥೆಯನ್ನು ಪರಿಚಯಿಸಲಾಗಿದೆ.