ಗಾಜಾ ಸಿಟಿ |ತನ್ನ ತಂದೆಯಿಂದ ಬಲವಂತದ ತಪ್ಪೊಪ್ಪಿಗೆಯನ್ನು ಪಡೆಯುವ ಸಲುವಾಗಿ ಇಸ್ರೇಲ್ ಸೈನ್ಯವು 18 ತಿಂಗಳ ಹಸುಗೂಸಿನ ಮೇಲೆ ಕ್ರೂರವಾಗಿ ದೌರ್ಜನ್ಯ ಎಸಗಿದೆ ಎಂದು ಪ್ಯಾಲೆಸ್ಟೈನ್ ಟಿವಿ ವರದಿ ಮಾಡಿದೆ. ಅಲ್-ಮಗಾಜಿ ನಿರಾಶ್ರಿತರ ಶಿಬಿರದ ಸಮೀಪದಿಂದ ಕರೀಮ್ ಹೆಸರಿನ ಈ ಮಗು ಮತ್ತು ತಂದೆ ಒಸಾಮಾ ಅಬು ನಾಸರ್ ಅವರನ್ನು ಸೈನ್ಯವು ಕಸ್ಟಡಿಗೆ ತೆಗೆದುಕೊಂಡಿತ್ತು. ಚಾನೆಲ್ ಬಿಡುಗಡೆ ಮಾಡಿದ ದೃಶ್ಯಗಳಲ್ಲಿ ಮಗುವಿನ ದೇಹದ ಮೇಲೆ ಗಂಭೀರ ಗಾಯಗಳಾಗಿರುವುದು ಕಂಡುಬಂದಿದೆ ಎಂದು ಎನ್ಡಿಟಿವಿ ವರದಿ ಮಾಡಿದೆ.
ತನ್ನ ಜೀವನೋಪಾಯವಾಗಿದ್ದ ಕುದುರೆಯು ಕಳೆದ ದಿನವಷ್ಟೇ ಮೃತಪಟ್ಟಿದ್ದರಿಂದ ಅಬು ನಾಸರ್ ತೀವ್ರ ಮಾನಸಿಕ ಸಂಕಷ್ಟದಲ್ಲಿದ್ದರು. ತನ್ನ ಪುಟ್ಟ ಮಗುವಿನೊಂದಿಗೆ ಸಾಮಗ್ರಿಗಳನ್ನು ಖರೀದಿಸಲು ಹೋಗುತ್ತಿದ್ದಾಗ ಮನೆಯ ಸಮೀಪವೇ ಇಸ್ರೇಲ್ ಸೈನ್ಯವು ಗುಂಡಿನ ದಾಳಿ ನಡೆಸಿತು. ಸೈನಿಕರ ಸೂಚನೆಯಂತೆ 18 ತಿಂಗಳ ಮಗುವನ್ನು ನೆಲದ ಮೇಲೆ ಮಲಗಿಸಿದ ನಂತರ ಅಬು ನಾಸರ್ ಸೈನಿಕ ಚೆಕ್ಪೋಸ್ಟ್ಗೆ ತೆರಳಿದರು. ಅಲ್ಲಿ ಅವರ ಬಟ್ಟೆಗಳನ್ನು ಬಿಚ್ಚಿಸಿ ಸೈನ್ಯವು ವಿಚಾರಣೆ ನಡೆಸಿತು.
ವಿಚಾರಣೆಯ ಸಂದರ್ಭದಲ್ಲಿ ತಂದೆಯ ಸಮ್ಮುಖದಲ್ಲೇ ಇಸ್ರೇಲ್ ಸೈನ್ಯವು ಮಗುವಿನ ಮೇಲೆ ಕ್ರೂರವಾಗಿ ದೌರ್ಜನ್ಯ ಎಸಗಿದೆ ಎಂದು ವರದಿ ತಿಳಿಸಿದೆ.
ವೈದ್ಯಕೀಯ ತಪಾಸಣೆಯ ವೇಳೆ ಮಗುವಿನ ಕಾಲಿನ ಮೇಲೆ ಸಿಗರೇಟಿನಿಂದ ಸುಟ್ಟ ಗಾಯಗಳು, ಹಳೆಯ ಗಾಯದ ಗುರುತುಗಳು ಮತ್ತು ಮೊಳೆ ಹೊಡೆದಂತಹ ಗಂಭೀರ ಗಾಯಗಳಿರುವುದು ದೃಢಪಟ್ಟಿದೆ.ಸುಮಾರು ಹತ್ತು ಗಂಟೆಗಳ ನಂತರ ಮಗುವನ್ನು ಇಸ್ರೇಲ್ ಸೈನ್ಯವು ಬಿಡುಗಡೆ ಮಾಡಿದೆ.
ಅಲ್-ಮಗಾಜಿಯಲ್ಲಿರುವ ಅಂತರಾಷ್ಟ್ರೀಯ ರೆಡ್ ಕ್ರಾಸ್ ಸಂಸ್ಥೆಯ ಮೂಲಕ ಮಗುವನ್ನು ಕುಟುಂಬಕ್ಕೆ ಹಸ್ತಾಂತರಿಸಲಾಯಿತು. ಆದರೆ ಮಗುವಿನ ತಂದೆ ಇನ್ನೂ ಇಸ್ರೇಲ್ ಕಸ್ಟಡಿಯಲ್ಲಿದ್ದಾರೆ. ಅವರಿಗೆ ತುರ್ತು ವೈದ್ಯಕೀಯ ನೆರವಿನ ಅಗತ್ಯವಿದ್ದು, ಅವರ ಬಿಡುಗಡೆಗಾಗಿ ಅಂತರಾಷ್ಟ್ರೀಯ ಸಂಸ್ಥೆಗಳು ಮಧ್ಯಪ್ರವೇಶಿಸಬೇಕೆಂದು ಸಂಬಂಧಿಕರು ಮನವಿ ಮಾಡಿದ್ದಾರೆ.
ಕೌನ್ಸಿಲ್ ಫಾರ್ ಅಮೇರಿಕನ್ ಇಸ್ಲಾಮಿಕ್ ರಿಲೇಶನ್ಸ್ (CAIR) ಈ ಘಟನೆಯನ್ನು “ಅತ್ಯಂತ ಅಸಹ್ಯಕರ ನೈತಿಕ ಪತನ” ಎಂದು ಬಣ್ಣಿಸಿದ್ದು, ಕಾಂಗ್ರೆಸ್ ತಕ್ಷಣವೇ ಮಧ್ಯಪ್ರವೇಶಿಸಬೇಕೆಂದು ಒತ್ತಾಯಿಸಿದೆ.
ಇರಾನ್ ಸಂಸತ್ತಿನ ಸ್ಪೀಕರ್ ಮೊಹಮ್ಮದ್ ಬಾಗರ್ ಘಾಲಿಬಾಫ್ ಈ ಸುದ್ದಿಯನ್ನು ಎಕ್ಸ್ (X) ನಲ್ಲಿ ಹಂಚಿಕೊಳ್ಳುತ್ತಾ ಹೀಗೆ ಬರೆದಿದ್ದಾರೆ:
“ಇರಾನ್ ಮಾನವೀಯತೆಗಾಗಿ ಹೋರಾಡುತ್ತಿದೆ. ಜಗತ್ತು ಒಂದೋ ಗಜಾದ ಪರವಾಗಿ ಮತ್ತು ಈ ವಸಾಹತುಶಾಹಿ ಭಯೋತ್ಪಾದಕ ಆಡಳಿತದ ವಿರುದ್ಧವಾಗಿ ನಿಲ್ಲಬೇಕು, ಇಲ್ಲವೇ ಮಕ್ಕಳನ್ನು ಪೀಡಿಸುವವರ ಪರವಾಗಿ ನಿಲ್ಲಬೇಕು. ಇದರ ನಡುವೆ ಬೇರೆ ಯಾವುದೇ ಆಯ್ಕೆಯಿಲ್ಲ.”
ಆರೋಗ್ಯ ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, 2025ರ ಅಕ್ಟೋಬರ್ನಲ್ಲಿ ಇಸ್ರೇಲ್ ಮತ್ತು ಹಮಾಸ್ ನಡುವೆ ಕದನ ವಿರಾಮ ಒಪ್ಪಂದ ಜಾರಿಗೆ ಬಂದ ನಂತರವೂ ಗಾಜಾದಾದ್ಯಂತ ನಡೆದ ಇಸ್ರೇಲ್ ದಾಳಿಗಳಲ್ಲಿ ಕನಿಷ್ಠ 677 ಪ್ಯಾಲೆಸ್ಟೀನಿಯನ್ನರು ಕೊಲ್ಲಲ್ಪಟ್ಟಿದ್ದಾರೆ ಮತ್ತು 1,813 ಜನರು ಗಾಯಗೊಂಡಿದ್ದಾರೆ.
