ಭಾರತಕ್ಕೆ ಎಲ್ಲಾ ಸೇವೆಗಳನ್ನು ರದ್ದು ಪಡಿಸಿದ ಸಲಾಮ್ ಏರ್- ಟಿಕೆಟ್ ಕಾಯ್ದಿರಿಸಿದವರಿಗೆ ರೀಫಂಡ್

ಮಸ್ಕತ್: ಒಮಾನ್‌ನ ಬಜೆಟ್ ಏರ್‌ಲೈನ್ ಸಲಾಮ್ ಏರ್ ಭಾರತಕ್ಕೆ ಎಲ್ಲಾ ಸೇವೆಗಳನ್ನು ರದ್ದುಗೊಳಿಸಿದೆ. ಮುಂದಿನ ತಿಂಗಳ ಒಂದರಿಂದ ಭಾರತಕ್ಕೆ ಸೇವೆ ಸ್ಥಗಿತಗೊಳ್ಳಲಿದೆ.

ಅಕ್ಟೋಬರ್ 1 ರಿಂದ ಬುಕ್ಕಿಂಗ್ ಸೌಲಭ್ಯವನ್ನು ವೆಬ್‌ಸೈಟ್‌ನಿಂದ ತೆಗೆದುಹಾಕಲಾಗಿದೆ. ಬುಕಿಂಗ್ ಮಾಡಿದವರ ಟಿಕೆಟ್ ಶುಲ್ಕವನ್ನು ಮರುಪಾವತಿಸಲಾಗುವುದು. ಸಲಾಮ್ ಏರ್ ಪ್ರಸ್ತುತ ಭಾರತದ ನಾಲ್ಕು ಪ್ರಮುಖ ನಗರಗಳಿಗೆ ಸೇವೆಗಳನ್ನು ನಿರ್ವಹಿಸುತ್ತಿದೆ. ಕೇರಳದಲ್ಲಿ, ಕೋಝಿಕ್ಕೋಡ್ ಮತ್ತು ತಿರುವನಂತಪುರಂ ವಿಮಾನ ನಿಲ್ದಾಣಗಳಿಗೆ ಮತ್ತು ಜೈಪುರ ಹಾಗೂ ಲಕ್ನೋಗೆ ಸೇವೆಗಳು ಲಭ್ಯವಿದೆ.

ವಿಮಾನಯಾನ ಸಂಸ್ಥೆಯು ಭಾರತಕ್ಕೆ ಎಲ್ಲಾ ಸೇವೆಗಳನ್ನು ಸ್ಥಗಿತಗೊಳಿಸಿದೆ ಎಂದು ಟ್ರಾವೆಲ್ ಏಜೆನ್ಸಿಗಳು ದೃಢಪಡಿಸಿವೆ. ಹೊಸ ನಿರ್ಧಾರದಿಂದ ಒಮಾನ್ ನಲ್ಲಿರುವ ವಲಸಿಗರಿಗೆ ಹಿನ್ನಡೆಯಾಗಿದೆ. ಸಲಾಮ್ ಏರ್ ಪ್ರಸ್ತುತ ಭಾರತಕ್ಕೆ ಮಸ್ಕತ್‌ನಿಂದ ತಿರುವನಂತಪುರಂ, ಲಕ್ನೋ ಮತ್ತು ಜೈಪುರ ವಲಯಗಳಿಗೆ ಮತ್ತು ಸಲಾಲಾದಿಂದ ಕ್ಯಾಲಿಕಟ್‌ಗೆ ನೇರ ಸೇವೆಗಳನ್ನು ಹೊಂದಿದೆ.

ಈ ಹಿಂದೆ ಟಿಕೆಟ್ ಕಾಯ್ದಿರಿಸಿದ ಎಲ್ಲ ಪ್ರಯಾಣಿಕರಿಗೆ ಸೇವೆಯನ್ನು ರದ್ದುಗೊಳಿಸಲಾಗಿದೆ ಎಂಬ ಸಂದೇಶ ಬಂದಿದೆ. ಅವರಿಗೆ ಟಿಕೆಟ್ ಮೊತ್ತವನ್ನು ಸಂಪೂರ್ಣವಾಗಿ ಹಿಂತಿರುಗಿಸಲಾಗುತ್ತದೆ. ಸಲಾಮ್ ಏರ್ ಅಥವಾ ಟಿಕೆಟ್ ಖರೀದಿಸಿದ ಅಧಿಕೃತ ಏಜೆನ್ಸಿಗಳನ್ನು ಮರುಪಾವತಿಗಾಗಿ ಸಂಪರ್ಕಿಸಬಹುದು. ಯಾವ ಕಾರಣಕ್ಕಾಗಿ ಮತ್ತು ಎಷ್ಟು ದಿನಗಳವರೆಗೆ ಸೇವೆ ಸ್ಥಗಿತಗೊಳಿಸಲಾಗುತ್ತದೆ ಎಂಬ ಬಗ್ಗೆ ಅಧಿಕಾರಿಗಳು ವಿವರಣೆ ನೀಡಿಲ್ಲ.