ಇಖಾಮಾ ಮತ್ತು ರೀ ಎಂಟ್ರಿ: ಜ.31 ರ ವರೆಗೆ ಮತ್ತೆ ಉಚಿತ ವಿಸ್ತರಣೆ- ಸೌದಿ ದೊರೆ ಆದೇಶ

ರಿಯಾದ್ : ಸೌದಿ ವಲಸಿಗರ ಇಖಾಮಾ ಮತ್ತು ಮರು-ಪ್ರವೇಶ ಅವಧಿಯನ್ನು ಮತ್ತೆ ಉಚಿತವಾಗಿ ವಿಸ್ತರಿಸಲಾಗುತ್ತಿದೆ. ಈ ತಿಂಗಳಲ್ಲಿ ಅವಧಿ ಮುಗಿಯುವ ವೀಸಾಗಳನ್ನು ಜನವರಿ 31, 2022 ರವರೆಗೆ ವಿಸ್ತರಿಸಲಾಗುವುದು. ಈ ನಿರ್ಧಾರವು ಸೌದಿ ಅರೇಬಿಯಾಕ್ಕೆ ತೆರಳಲು ಸಾಧ್ಯವಾಗದೆ ದೇಶದಲ್ಲಿ ಸಿಲುಕಿರುವ ವಲಸಿಗರಿಗೆ ಪ್ರಯೋಜನಕಾರಿಯಾಗಿದೆ.

ವಿಮಾನ ನಿಷೇಧದಿಂದಾಗಿ ದೇಶಕ್ಕೆ ಮರಳಲು ಸಾಧ್ಯವಾಗದವರಿಗೆ ಇಖಾಮಾ, ಮರು ಪ್ರವೇಶ ವೀಸಾ ಮತ್ತು ಸಂದರ್ಶಕ ವೀಸಾಗಳನ್ನು ವಿಸ್ತರಿಸಲಾಗುವುದು. ಸೌದಿ ಅರೇಬಿಯಾದ ರಾಜ ಸಲ್ಮಾನ್ ಅವರು ಜನವರಿ 31, 2022 ರವರೆಗೆ ಉಚಿತ ವಿಸ್ತರಣೆಯನ್ನು ಆದೇಶಿಸಿದ್ದಾರೆ. ಆದಾಗ್ಯೂ, ಸೌದಿ ಅರೇಬಿಯಾದಿಂದ ಎರಡು ಡೋಸ್ ಲಸಿಕೆಯನ್ನು ಪಡೆದವರಿಗೆ ಇದು ಅನ್ವಯಿಸುವುದಿಲ್ಲ.

ನವೀಕರಣಕ್ಕಾಗಿ ಜವಾಝಾತ್ ಕಛೇರಿ ಅಥವಾ ಬೇರೆ ಯಾವುದನ್ನೂ ಸಂಪರ್ಕಿಸುವ ಅಗತ್ಯವಿಲ್ಲ. ಕಾರ್ಯವಿಧಾನಗಳನ್ನು ಈ ಹಿಂದಿನಂತೆ ಸ್ವಯಂಚಾಲಿತವಾಗಿ ಪೂರ್ಣಗೊಳಿಸಲಾಗುತ್ತದೆ. ಈ ಹಿಂದೆ ಉಚಿತವಾಗಿ ವಿಸ್ತರಿಸಿದ ಅವಧಿಯು ಈ ತಿಂಗಳ 30 ರಂದು ಮುಕ್ತಾಯಗೊಳ್ಳಲಿರುವ ಕಾರಣ ಹೊಸ ಪ್ರಕಟಣೆ ಬಂದಿದೆ.

ಆದರೆ,ಭಾರತದ ವಲಸಿಗರಿಗೆ ಡಿಸೆಂಬರ್ 1 ರಿಂದ ನೇರವಾಗಿ ಸೌದಿ ಅರೇಬಿಯಾ ಪ್ರವೇಶಿಸಲು ಅವಕಾಶ ನೀಡಲಾಗಿದೆ. ಹಾಗಾಗಿ ಭಾರತೀಯ ವಲಸಿಗರು ಹೊಸ ಪ್ರಯೋಜನವನ್ನು ಪಡೆಯುತ್ತಾರೆಯೇ ಎಂದು ನೋಡಲು ನವೀಕರಣ ಪ್ರಕ್ರಿಯೆಯು ಪ್ರಾರಂಭವಾಗುವವರೆಗೆ ಕಾಯಬೇಕಾಗಿದೆ.