ಖತಾರ್ ಏರ್ವೇಸ್: ಆರು ವಿಭಿನ್ನ ಟಿಕೆಟ್ ದರ ಪ್ರಕಟ

ದೋಹಾ: ಕತಾರ್ ಏರ್ವೇಸ್ ಹೊಸ ಟಿಕೆಟ್ ದರವನ್ನು ಪ್ರಕಟಿಸಿದೆ. ಎಕಾನಮಿ ಮತ್ತು ಬಿಸಿನೆಸ್ ಕ್ಲಾಸ್‌ಗಳಿಗೆ ಆರು ವಿಭಿನ್ನ ದರಗಳನ್ನು ಪರಿಚಯಿಸಲಾಗಿದೆ. ಹೆಚ್ಚು ಆನಂದದಾಯಕ ಮತ್ತು ಅನುಕೂಲಕರ ವಿಮಾನ ಪ್ರಯಾಣವನ್ನು ಒದಗಿಸುವ ಉದ್ದೇಶದಿಂದ ಕತಾರ್ ಏರ್ವೇಸ್ ಹೊಸ ಟಿಕೆಟ್ ದರವನ್ನು ಘೋಷಿಸಿದೆ.

ಬಿಸಿನೆಸ್ ಕ್ಲಾಸ್‌ನಲ್ಲಿ ಕ್ಲಾಸಿಕ್, ಕಂಫರ್ಟ್ ಮತ್ತು ಎಲೈಟ್ ಎಂಬ ಮೂರು ವಿಧದ ದರಗಳು ಹಾಗೂ ಎಕಾನಮಿ ಕ್ಲಾಸ್‌ನಲ್ಲಿ ಕ್ಲಾಸಿಕ್, ಕನ್ವೀನಿಯನ್ಸ್ ಮತ್ತು ಕಂಫರ್ಟ್ ಎಂಬ ಮೂರು ವಿಧ ಟಿಕೆಟ್ ದರಗಳಿವೆ.

ಪ್ರತಿ ಟಿಕೆಟ್‌ನಲ್ಲಿ ವಿಭಿನ್ನ ಸೇವೆಗಳು ಮತ್ತು ಸೌಲಭ್ಯಗಳಿವೆ. ಎಕಾನಮಿ ಯಲ್ಲಿ ಕಂಫರ್ಟ್ ಟಿಕೆಟ್ ಕಾಯ್ದಿರಿಸುವವರಿಗೆ ತಮ್ಮ ಇಚ್ಛೆಯಂತೆ ಆಸನವನ್ನು ಆಯ್ಕೆ ಮಾಡಲು ಅವಕಾಶವಿದೆ. ಬಿಸಿನೆಸ್ ಎಲೈಟ್ ಫ್ಯಾಮಿಲಿ ಟಿಕೆಟ್ ಆಗಿದ್ದರೆ, ಪ್ರಯಾಣದ ದಿನಾಂಕವನ್ನು ಅನುಕೂಲವಾಗುವಂತೆ ಬದಲಾಯಿಸಬಹುದಾಗಿದೆ. ಈ ಟಿಕೆಟ್ ಹೊಂದಿರುವವರಿಗೆ ಯಾವುದೇ ಶುಲ್ಕವಿಲ್ಲದೆ ತಮ್ಮ ಹಣವನ್ನು ಮರಳಿ ಪಡೆಯಲು ಅವಕಾಶವಿದೆ.ಪ್ರತಿ ಟಿಕೆಟ್‌ನಲ್ಲಿ ಲಭ್ಯವಿರುವ ವಿವಿಧ ಸೌಲಭ್ಯಗಳ ಬಗ್ಗೆ ಹೆಚ್ಚಿನ ಮಾಹಿತಿ ಕತಾರ್ ಏರ್‌ವೇಸ್ ವೆಬ್‌ಸೈಟ್‌ನಲ್ಲಿ ಲಭ್ಯವಿದೆ.

ಎಕಾನಮಿ ವರ್ಗದಲ್ಲಿ ತಾವು ಕಾಯ್ದಿರಿಸಿದ ಶುಲ್ಕದಿಂದ ಹೆಚ್ಚಿನ ಶುಲ್ಕಕ್ಕೆ ಬದಲಾಯಿಸಿದಾಗ ಐದು ಕಿಲೋ ಹೆಚ್ಚುವರಿ ಲಗೇಜ್ ಉಚಿತವಾಗಿ ಪಡೆಯುತ್ತೀರಿ. ನೇರವಾಗಿ ಬುಕ್ ಮಾಡುವವರಿಗೆ ವಿಶೇಷ ಪ್ರಯೋಜನಗಳನ್ನು ಸಹ ಘೋಷಿಸಲಾಗಿದೆ. ಕತಾರ್ ಡ್ಯೂಟಿ ಫ್ರೀ ಮಳಿಗೆಗಳಲ್ಲಿ 40% ರಿಯಾಯಿತಿ ಲಭಿಸಲಿದೆ. ಹೊಸ ದರಗಳು ಸೋಮವಾರದಿಂದಲೇ ಜಾರಿಗೆ ತರಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.