ಪುಣ್ಯ ಬರಾಅತ್- ಕವನ

ಪಾವನ ತಿಂಗಳ ಪುಣ್ಯ ಬರಾಅತ್
ಬಂದೇ ಬಿಟ್ಟಿತು ನಮ್ಮೆಡೆಗೆ
ಮುಂದಿನ ವರುಷದ ಲೆಕ್ಕಾಚಾರವ
ಮಂಡಿಸ ಬಂತು ಜನರೆಡೆಗೆ

ಕೊರೋನದಿಂದ ಖಿನ್ನತೆ ಹೊಂದಿದ
ಮೈಮನಗಳನು ಒಂದಿನಿತು
ತಣಿಸಲಿ ಪುಣ್ಯ ಬರಾಅತ್ ಬಂದು
ಅಲ್ಲಾಹ್ ನೀನು ಅನುಗ್ರಹಿಸು

ಮುಕ್ತಿಯ ರಾತ್ರಿ ನಲ್ಮೆಯ ರಾತ್ರಿ
ಪ್ರಾರ್ಥನೆಗುತ್ತರ ದೊರೆಯುವುದು
ವಿಶ್ವಾಸಿಗಳೇ ಬೇಡುವ ನಾವು
ವಿಶ್ರಮವಿಲ್ಲದೆ ಹಗಲಿರುಳು

ಬರಾಅತ್ ರಾತ್ರಿಯ ಬರ್ಕತ್ತಿನಲಿ
ಬವಣೆಗಳೆಲ್ಲಾ ತೊಲಗುತಲೀ,
ಕೊರೋನವೇನೋ ಕೊಚ್ಚೇ ಹೋಗಲಿ
ರಮಳಾನ್ ತಿಂಗಳ ಬರವಿನಲೀ

ಆಹಾರ ಆಯುಷ್ಯ ಉಳಿದಂತೆಲ್ಲವು
ಹಂಚಿಕೆಯಾಗುವ ರಾತ್ರಿಯಿದು
ಅಲ್ಲಾಹ್ ನಮ್ಮಲಿ ಕರುಣೆಯ ತೋರಿ
ಒಳಿತಿನ ಬದುಕಿಗೆ ಕೃಪೆ ನೀಡು…..

✍🏻 ಉಮ್ಮು ನಬ್‌ಲ ಜಿ.ಯಂ