ಭಾರತೀಯರಿಗೆ ಜೀವಮಾನದ ಯುಎಇ ಗೋಲ್ಡನ್ ವೀಸಾ- ಸತ್ಯಾಂಶವೇನು?

ಅಬುಧಾಬಿ: ಭಾರತೀಯರಿಗೆ ಜೀವಮಾನದ ಗೋಲ್ಡನ್ ವೀಸಾ ನೀಡುವುದಾಗಿ ಪ್ರಚಾರಗೊಂಡ ವರದಿಗಳನ್ನು ಯುಎಇ ನಿರಾಕರಿಸಿದೆ. ಕನ್ನಡ ಸೇರಿದಂತೆ ಭಾರತದ ಪ್ರಮುಖ ಮಾಧ್ಯಮಗಳಲ್ಲಿ ಭಾರತೀಯರು 23 ಲಕ್ಷ ರೂ. ಪಾವತಿಸಿದರೆ ಯುಎಇಯಲ್ಲಿ ಜೀವಮಾನದ ಗೋಲ್ಡನ್ ವೀಸಾ ಪಡೆಯಬಹುದು ಎಂಬ ಸುದ್ದಿಯನ್ನು ಎರಡು ದಿನಗಳ ಹಿಂದೆ ಪ್ರಕಟಿಸಿದ್ದವು. ಕೆಲವು ಮಾಧ್ಯಮಗಳು ಪ್ರಧಾನಿ ನರೇಂದ್ರ ಮೋದಿಯವರ ಚಿತ್ರದೊಂದಿಗೆ ಈ ಸುದ್ದಿಯನ್ನು ಪ್ರಸಾರ ಮಾಡಿದ್ದವು.

ಅಂತರರಾಷ್ಟ್ರೀಯ ಮಾಧ್ಯಮಗಳು ಸೇರಿದಂತೆ ವ್ಯಾಪಕವಾಗಿ ಕಾಣಿಸಿಕೊಂಡಿರುವ ಈ ಸುದ್ದಿ ಆಧಾರರಹಿತವಾಗಿದೆ ಎಂದು ಯುಎಇ ಫೆಡರಲ್ ಅಥಾರಿಟಿ ಫಾರ್ ಐಡೆಂಟಿಟಿ ಅಂಡ್ ಸಿಟಿಜನ್‌ಶಿಪ್ ಹೇಳಿದೆ.

ವಿದೇಶದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಸಲಹಾ ಕಚೇರಿಯಿಂದ ಬಿಡುಗಡೆಯಾದ ಪತ್ರಿಕಾ ಪ್ರಕಟಣೆಯ ಆಧಾರದಲ್ಲಿ ಈ ಸುದ್ದಿ ಪಾರಚಾಗೊಂಡಿದೆ. ಅದರಲ್ಲಿ ನೀಡಲಾದ ಮಾಹಿತಿಯು ವಾಸ್ತವಕ್ಕೆ ವಿರುದ್ಧವಾಗಿದೆ. ಯುಎಇ ಗೋಲ್ಡನ್ ವೀಸಾ ಎಲ್ಲರಿಗೂ ಸುಲಭವಾಗಿ ಲಭಿಸುವಂತಿಲ್ಲ. ಇದಕ್ಕಾಗಿ ಅರ್ಜಿಗಳನ್ನು ಯುಎಇಯೊಳಗಿನ ಅಧಿಕೃತ ವ್ಯವಸ್ಥೆಗಳ ಮೂಲಕ ಮಾತ್ರ ಸ್ವೀಕರಿಸಲಾಗುತ್ತದೆ ಎಂದು ಯುಎಇ ಫೆಡರಲ್ ಅಥಾರಿಟಿ ಫಾರ್ ಐಡೆಂಟಿಟಿ ಅಂಡ್ ಸಿಟಿಜನ್‌ಶಿಪ್ ಹೇಳಿದೆ.

ಸಾಮಾನ್ಯವಾಗಿ ಕನ್ನಡ ಮಾಧ್ಯಮಗಳು ಗಲ್ಫ್ ಸುದ್ದಿಗಳನ್ನು ಪ್ರಕಟಿಸುವುದು ವಿರಳವಾಗಿದೆ. ಆದರೆ, ಇದು ಪ್ರಧಾನಿ ನರೇಂದ್ರ ಮೋದಿಯವರ ಸಾಧನೆ ಎಂಬಂತೆ ಹಲವು ಮಾಧ್ಯಮಗಳು ಈ ಸುಳ್ಳು ಸುದ್ದಿಯನ್ನು ಬಹಳ ಆವೇಶದಿಂದ ಪ್ರಕಟಿಸಿದೆ. ಅನಿವಾಸಿ ಮಿತ್ರರು, ಯುಎಇ ಪ್ರಯಾಣ ಬಯಸುವವರು ಇಂತಹಾ ಯಾವುದೇ ವಂಚನೆಗಳಿಗೆ ಬಲಿಯಾಗದಂತೆ ಎಚ್ಚರಿಕೆ ವಹಿಸುವುದು ಅಗತ್ಯವಾಗಿದೆ.