ಸೌದಿ: ಸಂಚಾರ ದಂಡಗಳಿಗೆ ಶೇ. 50 ವಿನಾಯಿತಿ- ಕೆಲವೇ ದಿನಗಳಲ್ಲಿ ಅವಧಿ ಮುಕ್ತಾಯ

ರಿಯಾದ್: ಸೌದಿ ಅರೇಬಿಯಾದಲ್ಲಿ ಸಂಚಾರ ನಿಯಮ ಉಲ್ಲಂಘನೆ ದಂಡಗಳಿಗೆ ಘೋಷಿಸಲಾದ ವಿನಾಯಿತಿ ಅವಧಿ ಕೊನೆಗೊಳ್ಳಲು ಇನ್ನೂ 9 ದಿನಗಳು ಮಾತ್ರ ಉಳಿದಿವೆ. 50 ಪ್ರತಿಶತ ರಿಯಾಯಿತಿಯೊಂದಿಗೆ ಏಪ್ರಿಲ್ 2024 ರವರೆಗೆ ವಿಧಿಸಲಾದ ದಂಡವನ್ನು ಪಾವತಿಸಲು ಅನುಮತಿಸಲಾದ ಅವಧಿ ಈ ತಿಂಗಳ 18 ರಂದು ಕೊನೆಗೊಳ್ಳಲಿದೆ.

ವಿವಿಧ ಸಂಚಾರ ಉಲ್ಲಂಘನೆಗಳಿಗೆ ವಿಧಿಸಲಾಗುವ ದಂಡವನ್ನು ಒಂದೇ ಬಾರಿಗೆ ಅಥವಾ ಒಂದೊಂದಾಗಿ ಪಾವತಿಸಲು ಅವಕಾಶ ನೀಡುವ ವಿನಾಯಿತಿಯನ್ನು ಹೊರಡಿಸಿದ್ದು, ಚಾಲಕರು ಈ ಅವಕಾಶವನ್ನು ಬಳಸಿಕೊಳ್ಳುವಂತೆ ಮತ್ತು ಸಂಚಾರ ದಂಡವನ್ನು ಪಾವತಿಸುವಾಗ ಜಾಗರೂಕರಾಗಿರಬೇಕು ಎಂದು ಜನರಲ್ ಸಂಚಾರ ಇಲಾಖೆಯು ಸೂಚಿಸಿದೆ. ಏಪ್ರಿಲ್ 18 ರ ನಂತರ ದಂಡ ಪಾವತಿಸುವುದರಿಂದ ಯಾವುದೇ ವಿನಾಯಿತಿ ಇರುವುದಿಲ್ಲ ಎಂದು ಗೃಹ ಸಚಿವಾಲಯ ಮತ್ತೆ ಮತ್ತೆ ಎಚ್ಚರಿಸಿದೆ.

ಕಳೆದ ವರ್ಷ ಅಕ್ಟೋಬರ್ 18 ರವರೆಗೆ ವಿನಾಯಿತಿಯನ್ನು ಆರಂಭದಲ್ಲಿ ಘೋಷಿಸಲಾಗಿತ್ತು. ದೊರೆ ಸಲ್ಮಾನ್ ಮತ್ತು ಕ್ರೌನ್ ಪ್ರಿನ್ಸ್ ಮೊಹಮ್ಮದ್ ಬಿನ್ ಸಲ್ಮಾನ್ ಅವರ ನಿರ್ದೇಶನದ ಮೇರೆಗೆ ಈ ವರ್ಷ ಏಪ್ರಿಲ್ 18 ರವರೆಗೆ ವಿನಾಯಿತಿ ಅವಧಿಯನ್ನು ವಿಸ್ತರಿಸಲಾಯಿತು. ಸಾರ್ವಜನಿಕ ಸುರಕ್ಷತೆಯ ಮೇಲೆ ಪರಿಣಾಮ ಬೀರುವ ಗಂಭೀರ ಉಲ್ಲಂಘನೆಗಳು ದಂಡದ ವಿನಾಯಿತಿಗೆ ಅರ್ಹವಾಗಿರುವುದಿಲ್ಲ.

ಮಾದಕ ದ್ರವ್ಯಗಳು ಅಥವಾ ನಿಷೇಧಿತ ವಸ್ತುಗಳ ಪ್ರಭಾವದಲ್ಲಿ ವಾಹನ ಚಲಾಯಿಸುವಾಗ ವಿಧಿಸಲಾಗುವ ದಂಡಗಳು, ಹಾಗೆಯೇ 120 ಕಿಮೀ ವೇಗದ ಮಿತಿಯನ್ನು ಹೊಂದಿರುವ ರಸ್ತೆಗಳಲ್ಲಿ ಗಂಟೆಗೆ 50 ಕಿಮೀ ಗಿಂತ ಹೆಚ್ಚಿನ ವೇಗದಲ್ಲಿ ಅಥವಾ 140 ಕಿಮೀ ವೇಗದ ಮಿತಿಯನ್ನು ಹೊಂದಿರುವ ರಸ್ತೆಗಳಲ್ಲಿ ಗಂಟೆಗೆ 30 ಕಿಮೀ ಗಿಂತ ಹೆಚ್ಚಿನ ವೇಗದಲ್ಲಿ ವಾಹನ ಚಲಾಯಿಸಿದ ಕಾರಣ ವಿಧಿಸಲಾಗಿರುವ ದಂಡಗಳು ಸಹ ಕಾನೂನಿನ ಗಂಭೀರ ಉಲ್ಲಂಘನೆಗಳಾಗಿವೆ. ಇದಕ್ಕೆ ಯಾವುದೇ ವಿನಾಯಿತಿ ಇರುವುದಿಲ್ಲ.