ರಿಯಾದ್: ಗಾಝಾದಲ್ಲಿ ಸಂಪೂರ್ಣ ಕದನ ವಿರಾಮದ ಅಗತ್ಯವಿದೆ ಎಂದು ಅರಬ್ ಮತ್ತು ಇಸ್ಲಾಮಿಕ್ ರಾಷ್ಟ್ರಗಳ ಸಚಿವ ಸಮಿತಿಯು ಕರೆ ನೀಡಿದೆ. ಅದಕ್ಕಾಗಿ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಮತ್ತು ಅಂತಾರಾಷ್ಟ್ರೀಯ ಸಮುದಾಯದ ಸದಸ್ಯರು ಪರಿಣಾಮಕಾರಿ ಮತ್ತು ತಕ್ಷಣದ ಕ್ರಮಗಳನ್ನು ಕೈಗೊಳ್ಳಬೇಕು ಎಂದು ಬ್ರಿಟಿಷ್ ವಿದೇಶಾಂಗ ಸಚಿವರೊಂದಿಗೆ ನಡೆಸಿದ ಸಮಾಲೋಚನೆಯ ವೇಳೆ ಸಮಿತಿಯ ಸದಸ್ಯರು ಆಗ್ರಹಿಸಿದ್ದಾರೆ.
ಸೌದಿ ವಿದೇಶಾಂಗ ಸಚಿವ ಅಮೀರ್ ಫೈಸಲ್ ಬಿನ್ ಫರ್ಹಾನ್ ನೇತೃತ್ವದ ಅರಬ್ ಮತ್ತು ಇಸ್ಲಾಮಿಕ್ ಮಂತ್ರಿ ಸಮಿತಿಯು ಪ್ಯಾಲೆಸ್ತೀನ್-ಇಸ್ರೇಲ್ ಸಮಸ್ಯೆಗೆ ಪರಿಹಾರದ ಹುಡುಕಾಟದಲ್ಲಿ ವಿವಿಧ ದೇಶಗಳೊಂದಿಗೆ ಸಮಾಲೋಚಿಸಲು ನಡೆಯುತ್ತಿರುವ ಪ್ರವಾಸದ ಭಾಗವಾಗಿ ಬ್ರಿಟನ್‌ಗೆ ಆಗಮಿಸಿದೆ. ಈ ತಂಡವು ಬ್ರಿಟಿಷ್ ವಿದೇಶಾಂಗ ಸಚಿವ ಡೇವಿಡ್ ಕ್ಯಾಮರೂನ್ ಅವರೊಂದಿಗೆ ಅಧಿಕೃತ ಸಭೆ ನಡೆಸಿದೆ.
ತಾತ್ಕಾಲಿಕ ಕದನ ವಿರಾಮಕ್ಕಾಗಿ ಈಜಿಪ್ಟ್, ಕತಾರ್ ಮತ್ತು ಯುನೈಟೆಡ್ ಸ್ಟೇಟ್ಸ್ ಜಂಟಿ ಮಧ್ಯಸ್ಥಿಕೆ ಪ್ರಯತ್ನಗಳನ್ನು ಸಭೆ ಸ್ವಾಗತಿಸಿತು. ಅಂತರಾಷ್ಟ್ರೀಯ ಕಾನೂನು ಮತ್ತು ಮಾನವೀಯ ನಿಯಮಗಳಿಗೆ ಅನುಸಾರವಾಗಿ ಪ್ಯಾಲೇಸ್ಟಿನಿಯನ್ ವಿಷಯದಲ್ಲಿ ಸಮತೋಲಿತ ಪಾತ್ರವನ್ನು ವಹಿಸಲು, ತಕ್ಷಣದ ಕದನ ವಿರಾಮವನ್ನು ತಲುಪಲು ಮತ್ತು ಎಲ್ಲಾ ಸಂಬಂಧಿತ ಅಂತರರಾಷ್ಟ್ರೀಯ ನಿರ್ಣಯಗಳನ್ನು ಜಾರಿಗೆ ತರಲು ಮಂತ್ರಿ ಸಮಿತಿಯ ಸದಸ್ಯರು ಬ್ರಿಟನ್‌ಗೆ ಕರೆ ನೀಡಿದರು.
ಇದು ಎಲ್ಲಾ ಅರಬ್ ಮತ್ತು ಇಸ್ಲಾಮಿಕ್ ದೇಶಗಳಿಗೆ ಆದ್ಯತೆಯ ವಿಷಯವಾಗಿದೆ ಎಂದು ಅವರು ಹೇಳಿದರು. ಸಭೆಯಲ್ಲಿ ಶಾಂತಿ ಪ್ರಕ್ರಿಯೆ ಪುನಶ್ಚೇತನದ ಅಗತ್ಯತೆ ಕುರಿತು ಚರ್ಚಿಸಲಾಯಿತು. 1967 ರ ಗಡಿಯಲ್ಲಿ ಪೂರ್ವ ಜೆರುಸಲೆಮ್‌ ರಾಜಧಾನಿಯಾಗಿ ಸ್ವತಂತ್ರ ಪ್ಯಾಲೆಸ್ಟೈನ್‌ನ ದ್ವಿರಾಷ್ಟ್ರ ಪರಿಹಾರಕ್ಕೆ ಸಂಬಂಧಿಸಿದ ಅಂತರರಾಷ್ಟ್ರೀಯ ನಿರ್ಣಯಗಳ ಅನುಷ್ಠಾನದ ಮೂಲಕ ಮಾತ್ರ ನ್ಯಾಯ, ಶಾಶ್ವತ ಮತ್ತು ಸಮಗ್ರ ಶಾಂತಿಯನ್ನು ಸಾಧಿಸಬಹುದು ಎಂದು ಅವರು ಹೇಳಿದ್ದಾರೆ.
ಸಮಿತಿಯ ಸದಸ್ಯರಾದ ಜೋರ್ಡಾನ್ ಉಪಪ್ರಧಾನಿ ಮತ್ತು ವಿದೇಶಾಂಗ ಸಚಿವ ಅಯ್ಮಾನ್ ಅಲ್-ಸಫಾದಿ, ಈಜಿಪ್ಟ್ ವಿದೇಶಾಂಗ ಸಚಿವ ಸಮಿಹ್ ಶುಕ್ರಿ, ಪ್ಯಾಲೆಸ್ತೀನ್ ವಿದೇಶಾಂಗ ಸಚಿವ ರಿಯಾದ್ ಅಲ್-ಮಲಿಕಿ, ಟರ್ಕಿಯ ವಿದೇಶಾಂಗ ಸಚಿವ ಹಕನ್ ಫಿಡಾನ್, ಇಂಡೋನೇಷ್ಯಾದ ವಿದೇಶಾಂಗ ಸಚಿವ ರೆಟ್ನೋ ಮರ್ಸುದಿ, ನೈಜೀರಿಯಾದ ವಿದೇಶಾಂಗ ಸಚಿವ ಯೂಸುಫ್ ಮೈತಾಮಾ ತೊಗರ್, ಅರಬ್ ಲೀಗ್ ಸೆಕ್ರೆಟರಿ ಜನರಲ್ ಅಹ್ಮದ್ ಅಬುಲ್ ಘೈತ್ ಮತ್ತು ಪಶ್ಚಿಮ ಏಷ್ಯಾ, ಉತ್ತರ ಆಫ್ರಿಕಾ, ದಕ್ಷಿಣ ಏಷ್ಯಾ ಮತ್ತು ಯುಎನ್‌ನಲ್ಲಿ ಬ್ರಿಟಿಷ್ ವಿದೇಶಾಂಗ ವ್ಯವಹಾರಗಳು ಮತ್ತು ಅಭಿವೃದ್ಧಿ ಸಚಿವಾಲಯದ ಪ್ರತಿನಿಧಿಯಾಗಿರುವ ತಾರಿಕ್ ಅಹ್ಮದ್ ಅವರು ಸಭೆಯಲ್ಲಿ ಭಾಗವಹಿಸಿದರು. ಸಮಿತಿಯ ಪ್ರವಾಸ ಚೀನಾದಲ್ಲಿ ಆರಂಭವಾಗಿದೆ. ನಂತರ ವಿವಿಧ ದೇಶಗಳನ್ನು ದಾಟಿ ಬ್ರಿಟನ್‌ಗೆ ಆಗಮಿಸಿದೆ.
