ಕುವೈತ್: ಪ್ಯಾಲೆಸ್ತೀನ್ ಮೇಲಿನ ಭಯೋತ್ಪಾದನಾ ದಾಳಿಯ ಹಿನ್ನೆಲೆಯಲ್ಲಿ ಇಸ್ರೇಲಿಗಳ ವಿರುದ್ಧ ದೇಶಗಳು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳುತ್ತಿವೆ. ಇಸ್ರೇಲಿ ಸಂಸ್ಥೆಗಳು ಸಹ ಬೃಹತ್ ಬಹಿಷ್ಕಾರಗಳನ್ನು ಎದುರಿಸುತ್ತಿವೆ. ಹೆಚ್ಚಾಗಿ ಅರಬ್ ರಾಷ್ಟ್ರಗಳಲ್ಲಿ ಝಿಯೋನಿಸ್ಟ್ ಭಯೋತ್ಪಾದನೆಯ ವಿರುದ್ಧ ವ್ಯಾಪಕ ಪ್ರತಿಭಟನೆಗಳು ನಡೆಯುತ್ತಿವೆ.
ಈ ಹಿನ್ನೆಲೆಯಲ್ಲಿ ಇಸ್ರೇಲಿಗರು ವಿದೇಶಿ ಪಾಸ್‌ಪೋರ್ಟ್‌ಗಳೊಂದಿಗೆ ಕುವೈತ್‌ಗೆ ಪ್ರವೇಶಿಸುವುದನ್ನು ತಡೆಯಬೇಕು ಎಂಬ ಬೇಡಿಕೆಯೊಂದಿಗೆ ಸಂಸದ ಹಮದ್ ಅಲ್ ಒಲಾಯನ್ ಮುಂದೆ ಬಂದಿದ್ದಾರೆ. ಈ ನಿಟ್ಟಿನಲ್ಲಿ ಗೃಹ ಸಚಿವಾಲಯವು ಅಳವಡಿಸಿಕೊಂಡಿರುವ ಪ್ರೋಟೋಕಾಲ್ ಅನ್ನು ಸ್ಪಷ್ಟಪಡಿಸುವಂತೆ ಅವರು ಕೇಳಿದ್ದಾರೆ.
2003 ಮತ್ತು 2023 ರ ನಡುವೆ ವಿದೇಶಿ ಪೌರತ್ವ ಮತ್ತು ಪಾಸ್‌ಪೋರ್ಟ್ ಹೊಂದಿರುವ ಇಸ್ರೇಲಿ ವ್ಯಕ್ತಿಗಳು ಕುವೈತ್‌ಗೆ ಪ್ರವೇಶಿಸಿದ ಘಟನೆಗಳು ನಡೆದಿವೆ ಎಂದು ಅವರು ಗಮನಸೆಳೆದರು.ಇಂತಹ ಸಂದರ್ಭಗಳಲ್ಲಿ ಸಚಿವಾಲಯ ಕೈಗೊಂಡ ಕ್ರಮಗಳ ದಾಖಲೆಗಳಿಗೆ ಅಲ್ ಒಲಾಯನ್ ಬೇಡಿಕೆ ಇಟ್ಟಿದ್ದಾರೆಂದು ಸ್ಥಳೀಯ ಮಾಧ್ಯಮ ಅರಬ್ ಟೈಮ್ಸ್ ವರದಿ ಮಾಡಿದೆ.
ಇಸ್ರೇಲ್ ವಿರುದ್ಧ ಕಠಿಣ ನಿಲುವು ತಳೆಯುವಲ್ಲಿ ಕುವೈತ್ ಮುಂಚೂಣಿಯಲ್ಲಿದೆ. ತಜ್ಞರ ಪ್ರಕಾರ, ಮುಂದಿನ ದಿನಗಳಲ್ಲಿ ಇಸ್ರೇಲಿ ನಾಗರಿಕರು ಪ್ರಪಂಚದಾದ್ಯಂತ ಬಲವಾದ ಕ್ರಮಗಳನ್ನು ಎದುರಿಸಲಿದ್ದಾರೆ.
