ದಮ್ಮಾಮ್: ಕಳೆದ ಶನಿವಾರದಂದು ಅಲ್ ಅಹ್ಸಾ ಸಮೀಪ ಸಂಭವಿಸಿದ ಕಾರು ಅಪಘಾತದಲ್ಲಿ ಮರಣ ಹೊಂದಿದ ರಿಝ್ವಾನ್ ಹಳೆಯಂಗಡಿ ಮತ್ತು ನಾಸಿರ್ ಹುಸೈನ್ ಹಾಗೂ ಕೃಷ್ಣಾಪುರದ ಅಕಿಲ್ ನುಅ್ ಮಾನ್ ರವರ ಮಯ್ಯತ್ ದಫನ ಕಾರ್ಯವು ಇಂದು ಇಶಾ ನಮಾಝ್ ಬಳಿಕ ಜುಬೈಲ್ KFC ಮಸ್ಜಿದ್ ಬಳಿ ನಡೆಯಿತು.
ಮೃತ ಯುವಕರು ಕೆಲಸ ನಿರ್ವಹಿಸುತ್ತಿದ್ದ SAQCO ಕಂಪೆನಿಯ ಮಾಲಕರಾದ ಬಶೀರ್ ಸಾಗರ್ ಅವರು ತನ್ನ ಸ್ವಂತ ಸಹೋದರರ ಮಯ್ಯತ್ ಪರಿಪಾಲನೆಗೆ ಸಹಕರಿಸಿದಂತೆ ಸಕ್ರಿಯರಾಗಿದ್ದರು. ಕಂಪೆನಿಯ ಸಹ ಉದ್ಯೋಗಸ್ಥರು ಮತ್ತು ಗೆಳೆಯರು ಸಹಿತ ನೂರಾರು ಮಂದಿ ಆಗಮಿಸಿ, ಮೃತ ಸಹೋದರರ ಜನಾಝವನ್ನು ದರ್ಶಿಸಿದರು. ಬಳಿಕ ಮಗ್ರಿಬ್ ಇಶಾ ನಮಾಝಿನ ನಡುವೆ ಜುಬೈಲ್ KFC ಬಳಿಯ ಜನಾಝ ಮಸೀದಿಯ ಬಳಿ ದಫನ ಕಾರ್ಯ ನೆರವೇರಿಸಲಾಯಿತು.
ಮೃತ ಯುವಕರ ಅಗಲಿಕೆಗಾಗಿ ಮಾಜಿ ಶಾಸಕರಾದ ಮೊಯ್ದಿನ್ ಬಾವಾ, ಕೃಷ್ಣಾಪುರ ಜಮಾಅತ್ ಅಧ್ಯಕ್ಷರಾದ ಜನಾಬ್ ಬಿ ಮಮ್ತಾಜ್ ಅಲಿ ಹಾಗೂ ವಖ್ಫ್ ಅಧ್ಯಕ್ಷರಾದ ಶಾಫಿ ಸಅದಿ ಅವರು ಸಂತಾಪವನ್ನು ಸೂಚಿಸಿದ್ದಾರೆ. ಮೃತರ ಮಗ್ಫಿರತ್ ಮತ್ತು ಮರ್ಹಮತ್ ಗಾಗಿ ಪ್ರತ್ಯೇಕ ದುಆ ನಡೆಸುವಂತೆ ಮೃತರ ಕುಟುಂಬಸ್ಥರು ವಿನಂತಿಸಿದ್ದಾರೆ.
ಕಳೆದ ಶನಿವಾರದಂದು ಕೆಲಸಕ್ಕೆಂದು ಸಂಚರಿಸುತ್ತಿದ್ದ ಕಾರಿಗೆ ಒಂಟೆಯೊಂದು ಡಿಕ್ಕಿ ಹೊಡೆದ ಪರಿಣಾಮ ಭೀಕರ ಅಪಘಾತ ಸಂಭವಿಸಿತ್ತು. ಘಟನೆಯಲ್ಲಿ ಹಳೆಯಂಗಡಿ ಕದಿಕೆಯ ರಿಝ್ವಾನ್, ಕೃಷ್ಣಾಪುರದ ಅಕೀಲ್, ನಾಸಿರ್ ಹಾಗೂ ಬಾಂಗ್ಲಾದೇಶದ ಶಿಹಾಬ್ ಎಂಬ ನಾಲ್ವರು ಯುವಕರು ಮೃತಪಟ್ಟಿದ್ದರು.
