ಯುಎಇ: ಸಾರ್ವಜನಿಕ ಸ್ಥಳಗಳಲ್ಲಿ ಮಾಸ್ಕ್ ಕಡ್ಡಾಯವಿಲ್ಲ- ಇಂದಿನಿಂದಲೇ ನಿಯಮ ಜಾರಿ

ಅಬುಧಾಬಿ:ಯುಎಇಯಲ್ಲಿ ತೆರೆದ ಸ್ಥಳಗಳಲ್ಲಿ ಇಂದಿನಿಂದ ಮಾಸ್ಕ್ ಉಪಯೋಗಿಸುವುದು ಕಡ್ಡಾಯವಿಲ್ಲ. ಈ ಹಿಂದೆ ಮಾರ್ಚ್ ಒಂದರಿಂದ ಎಂದು ಪ್ರಕಟಿಸಲಾಗಿತ್ತು. ಬಳಿಕ, ವಿಪತ್ತು ನಿರ್ವಹಣಾ ಸಮಿತಿಯು ಇಂದಿನಿಂದಲೇ ಈ ನಿಯಮ ಅನ್ವಯಿಸುವುದಾಗಿ ತಿಳಿಸಿದೆ.

ಮುಚ್ಚಿದ ಸಾರ್ವಜನಿಕ ಸ್ಥಳಗಳಲ್ಲಿ ಮಾಸ್ಕ್ ಅಗತ್ಯವಿದೆ. ಕೋವಿಡ್ ಪಾಸಿಟಿವ್ ಆಗಿದ್ದರೆ,ಐಸೋಲೇಶನ್ ನಿಯಮಗಳು ಹಿಂದಿನಂತೆ ಇರಲಿದೆ. ಆದಾಗ್ಯೂ, ರೋಗಿಗಳನ್ನು ಮೇಲ್ವಿಚಾರಣೆ ಮಾಡಲು ವಾಚ್ ಅನ್ನು ಇನ್ನು ಮುಂದೆ ಲಗತ್ತಿಸಲಾಗುವುದಿಲ್ಲ. ರೋಗಿಯ ಸಂಪರ್ಕದಲ್ಲಿರುವವರಿಗೆ ಕ್ವಾರಂಟೈನ್ ಇಲ್ಲ. ಆರ್ಥಿಕ ಮತ್ತು ಪ್ರವಾಸೋದ್ಯಮ ಕಾರ್ಯಕ್ರಮಗಳಲ್ಲಿ ಸಾಮಾಜಿಕ ಅಂತರ ಅಗತ್ಯವಿಲ್ಲ.ಆದಾಗ್ಯೂ, ಪ್ರದರ್ಶನಗಳು ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಿಗೆ ಹಾಜರಾಗಲು ಗ್ರೀನ್‌ಪಾಸ್ ಪ್ರೋಟೋಕಾಲ್ ಮುಂದುವರಿಯಲಿದೆ.

ಮಸೀದಿಗಳಲ್ಲಿ ಧರ್ಮಗ್ರಂಥಗಳನ್ನು ಮರಳಿಸಲಾಗುವುದು.ಆದರೆ,ಇವುಗಳನ್ನು ಪ್ರತಿ ಬಾರಿ ಸೋಂಕುರಹಿತಗೊಳಿಸಬೇಕು.ಮಸೀದಿಗಳಲ್ಲಿ ಅಝಾನ್ ಕರೆ ಮತ್ತು ಪ್ರಾರ್ಥನೆಗಳ ನಡುವಿನ ಮಧ್ಯಂತರವು ಹಳೆಯ ರೀತಿಗೆ ಮರಳಲಿದೆ. ಈ ಎಲ್ಲಾ ವಿನಾಯಿತಿಗಳನ್ನು ಮಾರ್ಚ್ 1ರಿಂದ ಜಾರಿಗೆ ತರುವುದಾಗಿ ಮೊದಲು ಘೋಷಿಸಲಾಗಿತ್ತು. ಆದರೆ, ಇಂದಿನಿಂದಲೇ ಜಾರಿಗೆ ಬರಲಿದೆ ಎಂದು ವಿಪತ್ತು ನಿರ್ವಹಣಾ ಸಮಿತಿ ಪ್ರಕಟಿಸಿದೆ.

ಪಿಸಿಆರ್ ಪರೀಕ್ಷೆಯ ನೆಗಟಿವ್ ಫಲಿತಾಂಶ ಅಗತ್ಯವಿಲ್ಲ
ಅಬುಧಾಬಿ: ಎರಡು ಡೋಸ್ ಕೋವಿಡ್ ಲಸಿಕೆ (ಸಂಪೂರ್ಣ ಲಸಿಕೆ) ಪಡೆದವರಿಗೆ ಇನ್ನು ಮುಂದೆ ಯುಎಇಗೆ ಪ್ರಯಾಣಿಸಲು ಪಿಸಿಆರ್ ಪರೀಕ್ಷಾ ಫಲಿತಾಂಶ ಅಗತ್ಯವಿಲ್ಲ. ಇದು ಇಂದಿನಿದಲೇ ಜಾರಿಗೆ ಬರಲಿದೆ.

ತುರ್ತು ಪರಿಸ್ಥಿತಿ, ಬಿಕ್ಕಟ್ಟು ಮತ್ತು ವಿಪತ್ತು ನಿರ್ವಹಣೆ ರಾಷ್ಟ್ರೀಯ ಪ್ರಾಧಿಕಾರವು ಶುಕ್ರವಾರ ಯುಎಇಯಲ್ಲಿ ಕೋವಿಡ್ ನಿರ್ಬಂಧಗಳಲ್ಲಿ ಹೊಸ ಸಡಿಲಿಕೆಗಳನ್ನು ಪ್ರಕಟಿಸಿದ್ದು,ಮಾರ್ಚ್ ಒಂದರಿಂದ ಜಾರಿಗೆ ತರುವುದಾಗಿ ಹೇಳಲಾಗಿತ್ತು. ಆದರೆ, ಇಂದಿನಿಂದಲೇ ಜಾರಿಗೆ ಬಂದಿರುವುದಾಗಿ ಬಿಕ್ಕಟ್ಟು ಮತ್ತು ವಿಪತ್ತು ನಿರ್ವಹಣೆ ಸಮಿತಿಯು ತಿಳಿಸಿದೆ.
ಕೋವಿಡ್ ಲಸಿಕೆಯನ್ನು ಪೂರ್ಣಗೊಳಿಸಿದವರು ಇನ್ನು ಮುಂದೆ ಹೊರಡುವ ಮೊದಲು ಪಿಸಿಆರ್ ಪರೀಕ್ಷೆಗೆ ಒಳಗಾಗಬೇಕಾಗಿಲ್ಲ. ಬದಲಾಗಿ, ಲಸಿಕೆಯ ಅನುಮೋದಿತ ಡೋಸೇಜ್ ಸ್ವೀಕಾರದ,QR ಕೋಡ್ ಅನ್ನು ಹೊಂದಿರುವ ಪ್ರಮಾಣಪತ್ರವನ್ನು ಹಾಜರುಪಡಿಸಬೇಕು.
ಲಸಿಕೆಯನ್ನು ಪಡೆಯದ ಪ್ರಯಾಣಿಕರು ನಿರ್ಗಮನದ 48 ಗಂಟೆಗಳ ಒಳಗೆ ನಡೆಸಿದ ಕೋವಿಡ್ ಪಿಸಿಆರ್ ಪರೀಕ್ಷೆಯ ನಕಾರಾತ್ಮಕ ಫಲಿತಾಂಶವನ್ನು ಪ್ರಸ್ತುತಪಡಿಸಬೇಕು. ಪರ್ಯಾಯವಾಗಿ, ಒಂದು ತಿಂಗಳೊಳಗೆ ಕೋವಿಡ್ ಸೋಂಕಿನಿಂದ ಚೇತರಿಸಿಕೊಂಡಿದ್ದಾಗಿ ಸಾಬೀತುಪಡಿಸುವ ಪರೀಕ್ಷಾ ಫಲಿತಾಂಶವನ್ನು ಹಾಜರುಪಡಿಸಿದರೂ ಸಾಕಾಗಬಹುದು. ಕ್ಯೂಆರ್ ಕೋಡ್ ಕೂಡ ಕಡ್ಡಾಯವಾಗಿದೆ.

ಯುಎಇ ಮೂಲಕ ಪ್ರಯಾಣವನ್ನು ಮುಂದುವರಿಸುವವರು ಅವರು ತೆರಳುವ ದೇಶದ ಕೋವಿಡ್ ಮಾರ್ಗಸೂಚಿಗಳನ್ನು ಅನುಸರಿಸಲು ಸಲಹೆ ನೀಡಲಾಗಿದೆ.